49
Iit tasov pale tamaat
Mbouŋ to yes Kora
1-2 Yam nughmariŋ, alooŋ saveeŋ tsiau tane.
Yam tamtamon tau aleep irau taan na, aghur taliŋamim payau poi.
Yam tau lemim ezamim mako, ve yam tau ezamim tintiina na paam.
Ve yam tau kuaz tauŋa, ve yam mbolaaŋa paam.
Yam asov alooŋ poghania aliŋag tane.
3 Pa avog pale ivotia ŋgar popoia siriv tau igheen ila lolog ne.
Saveeŋ tsiau tane irau ipaburigin ŋgar tsiam, leso aghilaal ŋgar poia. * Mbo 37:30
4 Yau naghe nasavia saveeŋ palelaaŋ siriv payam.
Le isov o, narav gita ve napaghazoŋai puughu payam.
5 Isaav ighe saawe saghati eta ivot, ve zeran sasaghati tomania zeran karomŋa tilivutin ghau to tivaghamun ghau, ene irau naroi mako. * Mbo 23:4, 27:1
6 Onoon, yes tindoundou lezi gabua katini.
Tauta tinumeer gabua toozi tawe, ve tipakur zi pani. * Mbo 73:12; 1Tim 6:17
7-8 Eemon gabua toozi tawe irau igham mulin zi pa mateegh mako.
Pasaa, tamtamon eta irau ighol Maaron leso ipaghau mateegh pani ve lepoogh tooni to taan iseeŋga taghon gha ila ne mako.
Ŋgar tauvene, tapuli ileple.
Pa lepoogh tauvene, atuya ite kat. * 1Pe 1:18+
9 Tauvene kuaz toit eta irau ipoon ghiit pa mateegh mako.
Gabua eta to taan irau igham ghiit taleep le alok ne mako. Mako kat! * Mt 16:26
10 Iit taghita yes ŋgara timatmaat raraate imin yes kankanooŋa tau lezi ŋgar mako na.
Ve saawe tau timaat, yes pale tipuliir gabua toozi naol isov izi ileple, ve gabua tawe imin tamtamon siriv lezi.
11 Saawe tau tileep matazi yaryaare, yes ezazi tintiina. Pasaa, lezi taan tiina ve gabua katini.
Eemon saawe tau timaat, naal toozi imin lezi niazi irau saawe.
12 Tauvene isaav ighe tamtamon eta eeza tiina, ve le gabua popoia katini, ene poia.
Eemon gabua tooni irau ipaghau mateegh pani ne mako. Pale ileep rigmon, ve isov.
Pale imaat gha ilale, raraate imin ŋgavuun ve ŋgai.
13 Ene eez to yes tau tigham ŋgar to borauŋa ve tipakur zi pa gabua toozi.
Aghita ŋgar tau ivotvot pazi ve yes tau titaghon zi pa ŋgar toozi, o aghilaal. * Lu 12:20
14 Yes timin sipsip tau timbit zi pa ravuuŋ zi.
Mateegh pale imin ŋginiiŋ pazi, ve igherev zi gha tizila mateegha niazi, ve patazi imbuuz ta sewe.
Ve mboŋoozo, mako zeran duduŋazi pale tighit zi ve lolozi poia.
15 Eemon yau, nugh to mateegha le tapiri to ikis ghau mako.
Pasaa, Maaron pale igham mulin ghau pa mateegh.
I pale ipas ghau pa mateegh, ve igham ghau nala yeiru nileep. * Mbo 56:13; 1Kor 15:51+; 1Tes 4:13+
16 Tauvene isaav ighe tamtamon eta indoundou le kuaz,
ve gabua popoia katini ivon ila ruum tooni, na ugham ŋgar naol pani sov.
17 Pa saawe tau i imaat, i irau ikis gabua tooni eta ve ila ne mako.
Gabua popoia naol tau i eeza tiina pani na, irau ila tomania mako. * Lu 12:15+; 1Tim 6:7
18-19 Saawe tau tamtamon tana ileep maata yaryaare, i ileep poia toman tintini.
Ve eval tiina tipait eeza pasaa, tighita tighe i irao.
Eemon i pale imaat, ve ileep tomania timŋa ila ndoroom loolo.
Yes to nugh tawe irau tighita ghazooŋa muul mako.
20 Tauvene tamtamon tau ighe eeza tiina ve le gabua katini, ene poia. Eemon i ighilaal mako.
Murei, i pale imaat gha ilale, raraate imin ŋgavuun ve ŋgai.