Saveeŋ Tau Tiboode Ila Pa Yes Hibrua
Hibru—Hebrews
1
Maaron Naatu ta ipaghazoŋai ghiit pa Taama Maaron
1 Muuŋ, Maaron isavia aliiŋa pa propet tooni pai katini ila eez maata maata. Tauta tigham aavo, ve tivotia aliiŋa pa timbuunŋa. 2 Eemon aazne, taleep ila saawe paaghu tau Maaron ighe ipasov uraat tooni. Tauvene saawe tane, iit talooŋ Maaron aliiŋa ila tauu Naatu aavo. Saawe tau Maaron ighur sambam ve taan tomania gabua naol isov, i ighur zi tivot ila Naatu tawe niima. Ve i ighe ighur gabua naol isov tawe timin Naatu le, leso iŋgin zi. * Mt 11:27; Yo 1:3; Kol 1:16; Hib 12:25
3 I ta imin ghazooŋa pait ve isul ghiit, ve ipaghazoŋai ghiit pa Taama Maaron tapiri ve poia tooni. I igham Taama Maaron naagho kat. Maaron tapiri ve ŋgar isov tau igheen tooni, ene ighenaar to Naatu paam. Saveeŋ tooni, ene tapiri tiina kat, ve ikis gabua naol isov tigheen tuŋia. I imaat gha ireu sosor toit, ve igham ghiit taŋgalaaŋ ila Maaron maata. Ra imuul izala pa sambam, ve mboole izi ila Maaron saksaki tauu niima tapir. * Yo 1:14; Mk 16:19; Kol 1:15+
Maaron Naatu iliiv yes aŋela
4 Tauvene Maaron Naatu iliiv yes aŋela kat. Pasaa, eeza tau Maaron igham pani na, ene tiina ve poia kat iliiv yes aŋela ezazi. * Pil 2:9+
5 Pasaa, Maaron isaav pa Naatu ighe:
“Aazne yau nasaav ghazooŋa tauvene: Yau natug yo. Yo tamam ta yau. Aazne, yau naghur ghom pa uraat.” * Mbo 2:7; Mt 3:17; Hib 5:5
Ve isaav muul ighe:
“I taama yau, ve i yau natug.” * 2Sam 7:14
Maaron isavia saveeŋ tauvene pa aŋela eta mako. Saveeŋ tane iŋarui Naatu mon.
6 Ve saawe tau Maaron ighe imbaaŋ Naatu aidaaba izilam taan, i isaav tauvene:
“Aŋela tisov to Maaron aat tiput aghezi pani, ve tipakuru.” * Mbo 97:7
7 Ve yes aŋela, Maaron isavi zi ighe:
“Aŋela, ene uraata tooni tau tibesbees pani. I igham zi timin yaghur ve yav yaama.” * Mbo 104:4
8 Eemon i isavia Naatu ighe:
“Maaron, pooz tsio irau isov ne mako. Uleep ila niam to ghamuuŋ pooz irau saawe.
Ve ilaal to pooz tsio, ene ŋgar duduuŋa.
9 Yo lolom pa ŋgar duduuŋa, ve ughurghur koi pa ŋgar sasaghati tau isapir pa tutuuŋ.
Tauvene Maaron tsio ipakur ghom le uliiv zetamŋa siriv, ve iliŋ ŋgoreeŋ izala pavom to ighur ghom umin kinik.
Tauta igham ghom lolom poia le poia kat.” * Mbo 45:6+
10 Ve saveeŋ ziiri ite tau iŋarui Maaron Naatu na isaav tauvene ighe:
“Tiina, muuŋ geeg, yo ughur taan, ve ugharaat puughu le iyaryaaŋ. Ve sambam saamba paam, ene nimam muuri.
11-12 Sambam saamba ve taan pale tisaghat imin uuli tau muŋginaaŋ gha perekia.
Tauvene yo pale ululun zi imin nonoghiiŋa muŋgaana,
ve uyol zi pa sambam saamba paaghu ve taan paaghu.
Eemon yo, o ulepleep mon tauvene. Saawe tsio irau isov mako. Pale iseŋseeŋga tauvene gha ila.” * Mbo 102:25; Hib 13:8; Yems 1:17; 2Pe 3:13
13 Ve muuŋ, Maaron isaav pa Naatu ighe:
“Ulam mbolem izi ila pa nimag tapir, le irau natatan koiamŋa ve tapirizi isov kat, ve uvaghaaz zi ila aghem saamba.” * Mbo 110:1; Mk 12:36
Aghita. Saawe eta, i isaav tauvene pa aŋela eta? Mako. Saveeŋ tane iŋarui Naatu mon. 14 Pasaa, aŋela, yes besooŋa to Maaron. I imbaŋmbaaŋ zi to tiuul yes tau i ighe igham mulin zi. * Mbo 34:7, 91:11, 103:20; Mbaŋ 12:7