22
Paulus ivotia puughu tau i ighur ila to Yesu
1 Paulus isaav pazi ighe: “Yam tamaŋŋa ve toŋvetaz tsiau, aghur taliŋamim payau. Pa yau naghe nasavia puughu tau nataghon eez paaghu tane. Leso aghilaal aghe yau nagham sosor eta mako.”
2 Yes tilooŋ Paulus isaav pazi ila aliŋazi duduuŋ Hibru, le tineneeŋ kat.
3 Paulus isaav muul ighe: “Yau Yuda. Tipoop ghau izi nugh Tarsus tau igheen taan sirivu to Silisia. Saawe tau yau kukuag, tigham ghau nalam ta sene. Naleep izi nugh tane le namin olman. Tutuuŋ to timbuunŋa, olman Gamaliel ipaghazoŋai ghau pani le isov. Ve yau nazuari ghau naghe le nataghon duduŋai ŋgar isov tau Maaron loolo pani na, raraate imin aazne yam asov azuari gham pa taghoniiŋni. * Ga 1:13+; Pil 3:5+
4 Yes tau titaghon eez paaghu tane, muuŋ yau naghurghur pataŋani pazi ve nagham saghatin zi kat. Tamtamon toozi siriv, narav zi timatmaat. Ve siriv, nagherev zi tila, ve naghur zi tiloŋ tila ruum to yavyavuuŋ. Yes zitamoot, ve zilivaa paam. * Mbaŋ 8:3; 1Kor 15:9; 1Tim 1:13
5 Daaba to watooŋrau tomania ŋginiiŋa tisov tau tileep ila lupuuŋ tiina to pooza toit, yes tiwatagh ŋgar tau muuŋ naghamghamu. Yes irau tipariaaŋ saveeŋ tsiau tane. Muuŋ, yau naghe nakis yes tau titaghon eez paaghu tane izi nugh Damaskus, ve nagham zi tilam Yerusalem, leso tighur yavyavuuŋ pazi. Tauvene naghason yes daaba toit gha tibood saveeŋ yokiiŋ payau ila rau siriv. Leso nagham zi nala, ve natotoi zi pa yes toŋvetaz toit tau tileep izi Damaskus, ve tiwatagh tighe yau ezag pa uraat tauvene.
Paulus isavia saawe tau Yesu ivot tooni
(Mbaŋ 9:1-18, 26:9-18)
6 “Tauvene naburig ve nala. Nalaagh nala le nagharau nugh Damaskus. Aaz izalam imin zegmatuugh ma vene. Malau mako ve mbonari tiina kat igheen sambam ve izilam, le isul livutin ghau. 7 Tauvene natap nazi taan, ve nalooŋ saveeŋ ilam payau ighe: ‘Saul, Saul, puughu mindai ta unoknok ghuruuŋ pataŋani payau?’
8 Yau nayol aliiŋa naghe: ‘Tiina, yo sei?’
Ve i isaav payau ighe: ‘Yau Yesu to Nasaret. Yau ta yo ughurghur pataŋani payau ne.’ * 1Kor 15:8-9; Ga 1:15-16
9 Zetagŋa tau yeŋa nilaghlaagh na tighita mbonari tawe paam. Eemon tilooŋ ŋeer tau isavsaav payau na aliiŋa mako.
10 “Yau naghasoni naghe: ‘Tiina, ughe nagham mindai?’
I iyol aliŋag ighe: ‘Uburig ve uloŋ ula nugh Damaskus. Mako tipaes payo pa uraat naol isov tau naghe naghuru ila nimam.’ 11 Mbonari tana isul tiina kat le igham matag ikumkuum. Tauvene zetagŋa tilam tikis nimag, ve tipalele ghau gha niloŋ nila nugh Damaskus.
12 “Nugh tawe, ŋeer ee ilepleep, eeza Ananias. I maata iŋgalŋgal Maaron, ve izuari ghi ighe le itaghon duduŋai tutuuŋ tooni. Tauvene Yuda tisov to nugh Damaskus tipapait eeza tighe i ŋeer poia ee. 13 I iŋarui ghau ilam, iyooz zigeg, ve isaav payau ighe: ‘Tazig Saul, matam poia ve ughita nugh!’ Saawe duduuŋ tana, matag poia, ve naghita Ananias iyozyooz. 14 Ra isaav payau ighe: ‘Maaron to timbuunŋa, i tauu isiigh ghom wa. Leso igham ghom ughazooŋ pa loolo ve ŋgar tooni. Tauta ughit katin Ŋeer To Ŋgar Duduuŋa, * Ŋeer To Ŋgar Duduuŋa, ene Yesu.
ve ulooŋ saveeŋ ila i tauu aavo. * Ga 1:12+; Ep 3:2+
15 Gabua tau ulooŋa ve ughita pa taum matam na, yo aat usavia irau nughmariŋ. Leso upariaaŋ Yesu saveeŋ tooni, ve tamtamon tighur ila tooni. * Mbaŋ 23:11, 26:16
16 Tauvene usaŋan saa muul? Uburig ta aazne, ugham yaa, ve ughason Yesu. Leso ireu sosor tsio ilale, ve igham ghom uŋgalaaŋ ila Maaron maata.’ * Ro 10:13; 1Pe 3:21
Maaron imbaaŋ Paulus ighe ila pa yes tau Yuda mako na
17 “Murei ra, namuul nalam Yerusalem, ve nalepleep ta sene le saawe ee, naloŋ nala sirsiir to Rumei Tiina loolo, leso nasuŋ. Nasuŋsuŋ ila, le tandaghiiŋ ee ivot payau. 18 Naghita Yesu isaav payau ighe: ‘Uburig rekia mon, upul Yerusalem, ve ughau. Pa ighe yo upariaaŋ saveeŋ tsiau izi ta sene, yes irau tilooŋ ghom mako.’
19 “Yau nasaav pani naghe: ‘Tiina, tamtamon to nugh tane tiwatagh tighe: Muuŋ, yau nalaghlaagh irau rumei toozi, ve naghurghur yes tau tighur ilat tsio na tiloŋ tila ruum to yavyavuuŋ, ve naloslos zi. 20 Ve saawe tau Stepanus ivotia saveeŋ tsio, ve tiliŋ siŋ pani gha imaat, yau nayok pa ŋgar tana. Tauta nayooz tomania yes tau tiravu na, ve naŋgin nonoghiiŋa toozi to ŋgoaaŋ.’ * Mbaŋ 7:58, 8:1
21 “Eemon Tiina tsiau isaav payau ighe: ‘Uburig ve ula. Yau naghe nambaaŋ ghom ula pa nugh malau. Leso ugham uratoi yes tau Yuda mako na.’ ” * Mbaŋ 9:15, 26:17+; 1Tim 2:7
Paulus ipaes pa yes zaaba ighe i tamtamon to Rom
22 Eval tiina tighur taliŋazi pa Paulus ila ila le tilooŋ aliiŋa ighe Maaron imbaaŋo ila pa yes tau Yuda mako na. Ra tiboob muul tighe: “Ah, aravu imaat ila! Ileep ne, i poia eta? Tamtamon tauvene ileep sov!” * Mbaŋ 21:36
23 Yes tiboboob, ve tizuzuum nonoghiiŋa toozi to ŋgoaaŋ gha tisuruuv zi tizi, ra tikor taan, ve tisuruuva izazaa. † Isaav ighe yes Yuda tilooŋ saveeŋ eta tau irau lolozi mako kat, ene tighamgham tauvene.
24 Tauvene tiina to yes zaaba isaav pa zaaba tooni ighe tigham Paulus gha tiloŋ tila ruum toozi loolo, ve tilosi ‡ Ravraav tau Roma tiloslos tamtamon pani na, timbit gabua matazi ila, leso iraŋgat mizazi. Saawe naol, tilos tamtamon timaat.
le irau i ivotia puughu tau eval tiina atezi yavyav kat ve tiboboob pani tauvene.
25 Tauvene tiloŋ tila ve tipagheena izi, ve tikau niima ila ai, leso tilosi. Eemon Paulus ighason daaba to yes zaaba tau iyooz igharau na ighe: “Mindai, isaav ighe tamtamon eta, i to Rom, ve yes daaba to gharatooŋ saveeŋ titiir saveeŋ tooni soone, ve yam alos sorokini, pale iduduuŋ pa tutuuŋ to Rom?” * Mbaŋ 16:37
26 Daaba tawe ilooŋ saveeŋ tane, ve ila ipaes pa daaba toozi tau iŋgin zaaba tisov na ighe: “Uyamaan ghiit wa? Pa ŋeer tawe, i to Rom. Pale ugham saa ŋgar pani?”
27 Daaba tana ilooŋ paesiiŋ tooni, ra i tauu ila ighason Paulus ighe: “Ai, usaav ghazooŋa payau. Onoon? Yo to Rom?”
Paulus iyol aliiŋa ighe: “Vee. Yau to Rom.”
28 Daaba tana isaav pani ighe: “Yau napul maet tiina kat, tauta namin tamtamon to Rom.” § Tamtamon lezi eez naol to timin tamtamon (o sitisen) to Rom. Isaav ighe ŋeer eta, i to Rom, ene pale natŋa paam to Rom. Ve isaav ighe tamtamon eta, i to Rom mako, eemon kinik to Rom loolo poia pani ve ighe igham poghania, ene i irau ighamu imin tamtamon to Rom. Zeran siriv tighol maet tiina pa gavman to Rom, leso timin tamtamon to Rom. Gavman to Rom irau tighur pataŋani pa tamtamon to Rom imin tighamgham pa tamtamon siriv ne mako. Ve yes aat tiŋgin poghani zi.
Paulus isaav pani muul ighe: “Ena yo. Ve yau napul maet eta mako. Pasaa, saawe tau tipoop ghau, yau to Rom.”
29 Yes zaaba tau tighe tilos Paulus na, tilooŋ saveeŋ tane, ve rekia mon tipuli. Ve daaba toozi paam iroi pa tauu. Pasaa, Paulus, i tamtamon to Rom. Eemon daaba tana isaav gha tikau niima ma aaghe sorok.
Tipayooz Paulus ila lupuuŋ to yes pooza tau tiŋginŋgin yes Yuda na naghozi
30 Daaba tau iŋgin zaaba tisov na ighe iwatagh kat: Paulus igham saa ŋgar ta yes Yuda tighita tighe isosor. Leso ighazooŋ pa saveeŋ tooni puughu. Tauvene tileep mboŋ nughizau, ra isaav gha tipool sen tau tikau Paulus pani na, ve ipoi yes daaba to watooŋrau tomania pooza tisov to yes Yuda tilam tilup zi, ve igham Paulus ilam gha ipayooze ila naghozi.
*22:4: Mbaŋ 8:3; 1Kor 15:9; 1Tim 1:13
*22:8: 1Kor 15:8-9; Ga 1:15-16
*22:14: Ŋeer To Ŋgar Duduuŋa, ene Yesu.
*22:15: Mbaŋ 23:11, 26:16
*22:21: Mbaŋ 9:15, 26:17+; 1Tim 2:7
†22:23: Isaav ighe yes Yuda tilooŋ saveeŋ eta tau irau lolozi mako kat, ene tighamgham tauvene.
‡22:24: Ravraav tau Roma tiloslos tamtamon pani na, timbit gabua matazi ila, leso iraŋgat mizazi. Saawe naol, tilos tamtamon timaat.
§22:28: Tamtamon lezi eez naol to timin tamtamon (o sitisen) to Rom. Isaav ighe ŋeer eta, i to Rom, ene pale natŋa paam to Rom. Ve isaav ighe tamtamon eta, i to Rom mako, eemon kinik to Rom loolo poia pani ve ighe igham poghania, ene i irau ighamu imin tamtamon to Rom. Zeran siriv tighol maet tiina pa gavman to Rom, leso timin tamtamon to Rom. Gavman to Rom irau tighur pataŋani pa tamtamon to Rom imin tighamgham pa tamtamon siriv ne mako. Ve yes aat tiŋgin poghani zi.