3
Uraat tau Paulus ighamu, ene itotoia ighe i mbaŋooŋa tauu to Krisi
1 Mindai, saveeŋ tsiei tane, yei nisavia imin paitooŋ taumai muul, leso aghur ila uraat tsiei? Mako. Onoon, tamtamon siriv tikis lezi rau to ipaghazoŋai zi ighe ezazi pa uraat toozi. Eemon yei lemai puughu eta to nitotoi rau tauvene payam mako, ma nighason gham to abood rau tauvene payei ne mako. * 2Kor 5:12, 10:12
2 Pasaa, yam taumim ta amin rau payei. Uraat tau nighamu ila sosomim gha anooŋa ivot, tauta itotoi ighe ezamai pa uraat tau nighamghamu ne. Saveeŋ isov to rau tana igheen ila yei lolomai, ve igheen ila yam lolomim paam. Rau tana, tamtamon tisov irau tiwaato ve tigham ŋgar pani, leso tighur ila saveeŋ tsiei. * 1Kor 9:2
3 Tauvene yam taumim amin rau to Krisi tau igheen ghazooŋa. Rau tana, ene uraat tau nighamu ila sosomim na anooŋa. Krisi iboode pa gabua eta imin gabgab mako. Iboode pa Maaron maata yaryaare Avuvu. Ve iboode ila maet babaŋazi imin Maaron igham pa tutuuŋ to Mose ne mako. I iboode ila tamtamon lolozi. * Igham 24:12; Yer 31:33; Ezek 36:27; 1Kor 3:5+; Hib 8:10
4 Ila Maaron maata, yei nighur ila ariaaŋ nighe saveeŋ tane, ene onoon. Pasaa, Krisi ileep tomani ghei pa uraat tsiei. 5 Eemon yei irau nipait taumai mako. Pasaa, irau nigham uraat tauvene ila taumai tapirimai mako. Maaron ipapalot ghei, tauta nirao. * Yo 15:5; 1Kor 15:10; Pil 2:13
6 Tauvene Maaron tauu igham ghei nirao pa uraat tooni. Tauta nimin besooŋa pa eez paaghu to i yesŋa tamtamon tooni tivalupu zi timin eemon. Eez tane, ene eez to taghoniiŋ tutuuŋ tau tiboode na mako. Ene eez to Maaron Avuvu tau itortoor ghiit tamin paaghu. Pasaa, tutuuŋ tau tiboode na, ene igham ghiit tamaat. Ve Maaron Avuvu, i igham ghiit taleep poia ila to Maaron. * Yo 6:63; Ro 7:6; Ga 3:10+; Hib 8:6+
Eez paaghu to Krisi iliiv eez muŋgaana to tutuuŋ
7 Eez tau muuŋ tamtamon tibees pa Maaron, ene igham ghiit taleep ila eez to mateegh. * Eez muŋgaana to tutuuŋ, ene vene: Isaav ighe tataghon duduŋai tutuuŋ tisov to Maaron, ene pale taleep poia. Ve ighe mako, ene pale aatyavyav to Maaron izaa toit.
Eemon saawe tau Maaron irav tutuuŋ tawe ila maet, ve igham pa yes Israela, ene ilam toman mbonari ve tapiri tiina. Tauta yes Israela irau timarar Mose naagho malau mako. Pasaa, mbonari tawe tiina kat le iŋgowar matazi. Eemon mbonari tana igheen rigmon, ve isov. * Igham 34:1, 28; Hib 12:18
8 Ve eez paaghu tau aazne tabees pa Maaron, ene vene: Maaron Avuvu igham uratoi ghiit ve itoor ghiit tamin paaghu. Tauvene eez tane mbonari ve tapiri tiina kat iliiv eez muŋgaana. * Ro 7:6; Ga 3:2-5
9 Eez paaghu, i le mbonari ve tapiri tiina kat iliiv eez muŋgaana. Onoon, eez muŋgaana ilam toman mbonari ve tapiri tiina. Eemon eez tawe isaav pait tauvene: Iit aat tamaat pa sosor toit. Ve eez paaghu tau aazne tataghoni, ene igham ghiit taduduuŋ ila Maaron maata. * Ezek 18:4; Ro 3:21, 8:1+
10 Onoon, eez muŋgaana ilam toman mbonari ve tapiri tiina. Eemon isaav ighe taghazooŋ pa eez paaghu ŋgara, ene aat taghita taghe eez muŋgaana, le mbonari ve tapiri geeg mako. Pasaa, eez paaghu mbonari, ene tiina kat iliiv eez muŋgaana. 11 Saawe tau Maaron ivotia eez muŋgaana to tutuuŋ, ene ilam toman mbonari ve tapiri. Eemon eez tawe irau igheen le alok mako. Pale isov. Ve eez paaghu tane irau isov mako. Pale igheen tauvene taghon taghon gha ila. Tauvene, i le mbonari ve tapiri tiina kat. * Ro 10:4; Hib 7:18, 8:13
12 Yei nighur ila ariaaŋ tauvene, tauta niroi mako, ve nasavsaav ghazooŋa pa tamtamon. * Mbaŋ 4:13; Ep 6:19; Pil 1:20
13 Yei nimin Mose mako. Muuŋ, i iponpoon naagho pa uuli sirivu. Leso yes Israela timarar naagho tau isul na sov. Pasaa, mbonari tawe igheen malau mako. Igheen rig, ve isov. * Igham 34:33+
14 Eemon yes Israela ŋgar toozi iyaryaaŋ, tauta tighilaal gabua tawe puughu mako. Ve aazne paam, isaav ighe tiwaat saveeŋ to eez muŋgaana, tighilaal puughu mako. Ene imin uuli sirivu iponpoon matazi soone. Pasaa, Krisi mon ta irau itir uuli sirivu tawe ighau pazi. * Ro 11:7, 25; 2Kor 4:4
15 Tauta muuŋ ve ilam aazne, isaav ighe yes Israela tiwaat saveeŋ to Mose, yes tighilaal puughu mako. Ene imin gabua eta iponpoon lolozi ve ŋgar toozi. 16 Eemon isaav ighe tamtamon eta itoor ŋgar tooni, ve ighur ila to Tiina toit, Krisi pale igham gabua tana ighau pani.
17 Tiina tau nasavia ne, ene Maaron Avuvu. Isaav ighe i ilepleep tomani ghiit, i aat ipas ghiit ila saghati tapiri. Leso tamin besooŋa sorok muul sov. * Yo 8:32, 36; Ro 8:2, 15; Ga 4:6, 5:1
18 Aazne, iit taghazooŋ pa Maaron. Gabua eta ipoon mataan muul mako. Pasaa, iit tasov taghita Ŋeer Tiina mbonari tomania tapiri ve poia tooni ila to Krisi. I itotoi Ŋeer Tiina naagho pait imin taghita Ŋeer Tiina anunu ila natiloŋa. Tauvene mataan ilala pani, ve Tiina toit Avuvu itortoor ghiit. Leso tagham naagho, ve anaan tatotoi mbonari tomania tapiri ve poia tooni pa tamtamon. * Yo 1:14; Ro 8:29; 1Kor 15:49; 2Kor 4:6
*3:1: 2Kor 5:12, 10:12
*3:3: Igham 24:12; Yer 31:33; Ezek 36:27; 1Kor 3:5+; Hib 8:10
*3:5: Yo 15:5; 1Kor 15:10; Pil 2:13
*3:6: Yo 6:63; Ro 7:6; Ga 3:10+; Hib 8:6+
*3:7: Eez muŋgaana to tutuuŋ, ene vene: Isaav ighe tataghon duduŋai tutuuŋ tisov to Maaron, ene pale taleep poia. Ve ighe mako, ene pale aatyavyav to Maaron izaa toit.
*3:7: Igham 34:1, 28; Hib 12:18
*3:9: Ezek 18:4; Ro 3:21, 8:1+
*3:11: Ro 10:4; Hib 7:18, 8:13
*3:12: Mbaŋ 4:13; Ep 6:19; Pil 1:20
*3:17: Yo 8:32, 36; Ro 8:2, 15; Ga 4:6, 5:1
*3:18: Yo 1:14; Ro 8:29; 1Kor 15:49; 2Kor 4:6