14
Timbou mbouŋ paghu izi lolooz Zion
1 Ghoro matag ila le naghita Sipsip to Maaron toman tamtoghon toni ndiŋndiŋ ndiŋndiŋ (144,000) tiyondyood izi lolooz Zion. Tamtoghon tonowen, timbood yesuru Tama Maaron izadi ila ndamodi. Syg 7:3+
2 Mala maau ve nalooŋ ival tiina aliŋadi ineep sambam ve izi inim. Avolutu tiina kat inimale ya katindi tiyatyaat tizizi, ma lalaav avolutu. Ve nalooŋ mbeb avolutu poia kat inimale tamtoghon tirab gita ma venen. 3 Ival tiina tonowen timbou mbouŋ paghu igharau Maaron ina to ghamuuŋ pooz ila yes ŋginiiŋa tamoot ee ve paaŋ (24) toman mbeb matadi yaryaara paaŋ matadi. Ival tiina tonenen, yes tamtoghon ndiŋndiŋ ndiŋndiŋ (144,000) to taan to Sipsip to Maaron ighol di tinim le, ve ipas di tivot pa samia tapiri. Ve yes moghon to irau tiwatag mbouŋ tonowen ve timboui. Mbo 149:1; Syg 5:9
4 Nene yes to tighur maat maau. Tiŋgin taudi pooi. Tovenen tiŋgalaaŋ ila Maaron mata.* Saveeŋ to Yoan imbooda, isaav tovene: Tamtoghon 144,000 to saveeŋ waaro tonene isavia di, tila to yes ndiliva ve yesŋa tigheen maau. Ndiran ŋgara katindi tighaze saveeŋ tonene, nene saveeŋ palelaaŋ to iŋarua yes to tineep saguan pa maaron kaaromŋa ve ŋgar samsamia to taan, ve titaghon ŋgar ŋgalaaŋa moghon ila Maaron mata.
Ve ndug sine to Sipsip to Maaron ighaze ila pani, nene yes titaghoni moghon. Ye ipas di ila ival tiina to taan lolodi, ve ighol di tinim le wa. Tovenen yes tinimale aniiŋ mata to tighuri ila to Maaron yesuru Sipsip toni pa tipait di. 2Kor 11:2; Ep 5:27; Yems 1:18
5 Ve saveeŋ kaarom eta ivot ila avodi maau. Tauto ledi sosor eta ila Maaron mata maau. Kol 3:9
Aŋela tol
6 Ghoro matag ila le naghita aŋela eez iroov ila tata. Varu poia to ineep irau sawa isob, nene ineep toni. Ye le uraat pa ivotia saveeŋ tonowen pa tamtoghon tisob to tineep izi taan. Yes to ndug ndug. Ve tinidi toman aliŋadi, ve gabuadi, naol naol. Mk 13:10
7 Aŋela tonowen isaav aliŋa tiina ighaze: “Sawa to gabizooŋ tamtoghon ve ghuruuŋ atia padi, tauto ivot wa. Tovenen amatughez pa Maaron, ve apait iza pa tapiri ve poia toni. Ye to ighur sambam, taan, te, ve ya tisob to tivotvot ila taan lolo. Tovenen aput aghemim pani ve apaiti.” Syg 15:4
8 Mala maau ve aŋela ite, ana itaghoni inim, ve isaav ighaze: “Ndug tiina Babilon itap wa! Itap le isami kat! Ndug to igheghereb tamtoghon pa ŋgar toni samsamia, ve ighamun ŋgar todi inimale ipaghun di pa ya ariaŋa, tauto aazne izi inim mbeb sorok.” Is 21:9; Yer 51:8; Syg 17:1+
9 Aŋela tonowen inim ila, ghoro ite inim tol pani, ana itaghon yesuru inim, ve isaav aliŋa tiina tovene: “Ighaze tamtoghon eta iput aghe pa mbeb samia, ma mbeb tonowen anunu, ve ipaiti, ve igham ghilalooŋ toni ila ndamo ma nima, 10 nene ye pale ighun ila rubruub to ivon kat pa mbalmbali to Maaron. Mbalmbali toni tonowen, nene inimale vaen to ariaŋa kat. Irau Maaron itoor ya ite paam tomani ve irab matin tapiri ne maau. Tovenen tamtoghon tonenen pale tighur yabyabuuŋ tiina pani, ve yab toman yaam salfa tuntunu to vuzi samia ighani ila aŋela patabuaŋa to Maaron ve Sipsip toni matadi. Mbo 11:6, 75:8; Is 51:17; Syg 13:16+
11 Ndiran tovene, yab to ighan di, nene pale mbuasa izaza tovene itaghoni taghoni gha ila. Irau isob maau. Tovenen yes to tiput aghedi pa mbeb samia, ma mbeb tonowen anunu, toman yes to tigham ghilalooŋ toni, yab pale ighan di tovene irau mboŋ ve ndag itaghoni taghoni gha ila. Irau atedi izi pa yabyabuuŋ maau. Jud 1:7
12 Tovenen Maaron tamtoghon toni patabuaŋa irau tiyoon ariaŋa pa badooŋ pataŋani. Nene yes to titaghon tutuuŋ to Maaron ve tighur ila to Yesu ariaŋa.”
13 Aŋela tonowen isavsaav le isob, ghoro nalooŋ saveeŋ ineep sambam ve izi inim ighaze: “Umbood saveeŋ tovene: Aazne ve ila, yes to tineep tuŋia ila to Tiina toit Yesu le irau mateeŋ todi, nene pale poia to Maaron iza todi ve tinidi iza.”
Maaron Avuvu paam isavia saveeŋ ee moghon ighaze: “Onoon kat, yes pale atedi izi pa uraat ve pataŋani todi. Ve ŋgar popoia to tigham di, pale tineep toman di ve tila.” 2Tes 1:7; Hib 4:10
Sawa to youŋ aniiŋ to Maaron to imatu wa
14 Ghoro matag ila le naghita yaghur tae pisosooŋa, ve ŋgeu eez mbole izala pogho. Ŋgeu tonowen, nagho inimale Tamtoghon Natu, ve moghar to kinik ineep ila daba. Moghar tonowen, tigharaata pa gol. Ve ye ikis buza kooka eez to mata kat. Ezek 1:26; Dan 7:13; Mk 13:26
15 Ghoro aŋela ite ivot pa Rumai Tiina to sambam we, ve imboob pa ŋgeu to ineep izala yaghur tae ighaze: “Sawa to ŋgogaaŋ aniiŋ, ighaze ivot tonene. Pasa, aniiŋ wit tiom to titub izi taan, timatu wa. Tovenen ugham buza tiom kooka tonanan, ve undeeb di tizi.” Mk 4:29
16 Tovenen ŋgeu to ineep ila yaghur tae pogho, igham buza toni, ve indeeb wit tisob to titub izi taan, leso tiyou di ve tilup di ila ruum to aniiŋ.† Saveeŋ waaro tonene avaat isavia sawa to Krisi imuul inim ve iyou tamtoghon toni.
Mbalmbali to Maaron iza to tamtoghon
17 Mala maau ve aŋela ite, ana ivot pa Rumai Tiina to sambam we. Ye paam, ikis buza kooka eez to mata kat. 18 Ghoro aŋela ite paam to iŋgin yab to artaal, ipul artaal ve ivot, ve imboob pa ita ite to ikis buza kooka ighaze: “Vaen to taan tisob tibulbuul wa. Ugham buza tiom tonanan ula utotoor di, ve ulup di.” 19-20 Tovenen aŋela tonowen igham buza toni, ve ila itotoor vaen to tineep izi taan ne anoŋadi tisob tizi. Ghoro iyou di ve ilup di, ve igham di ila, ve isuruuv di tila Maaron ndug toni to pisooŋ vaen to ineep ndug tiina dige. Pasa, sawa to mbalmbali to Maaron iza todi, tauto ivot wa. Tovenen tivazag vaen anoŋa tonowen izi ndug to pisooŋ vaen le suru tiina kat ivot. Ve ipot iza le raraate pa hos aze. Ve ireer ila ndug mala irau 300 kilomita ma venen. Vaen suru tonowen, nene siŋ to tamtoghon to imaliŋ. Syg 19:15
*14:4: Saveeŋ to Yoan imbooda, isaav tovene: Tamtoghon 144,000 to saveeŋ waaro tonene isavia di, tila to yes ndiliva ve yesŋa tigheen maau. Ndiran ŋgara katindi tighaze saveeŋ tonene, nene saveeŋ palelaaŋ to iŋarua yes to tineep saguan pa maaron kaaromŋa ve ŋgar samsamia to taan, ve titaghon ŋgar ŋgalaaŋa moghon ila Maaron mata.
†14:16: Saveeŋ waaro tonene avaat isavia sawa to Krisi imuul inim ve iyou tamtoghon toni.