MATEO-GAYABURBA-NUED
MATEO
GEBE-SOGLENAID
Garda-nug
Mateo we-garda narmaksad. Mateo, Levíʼye bimarbalid. Mateo, Judío-dule gued, Jesús-sapingan-warambe-gakabogwad-wargwenadid. Judíoʼmar bilebalid, Israel-dulemarye. E-gayabardi bileged, Hebreo-dulemarye.
Mateo-Gardagi weyob sunmaklenaid
Israel-dulemarga epenne Bab-Dummad sogsagusad, be-bendakegala, yoedse Dule-Wargwen an bega barmidagoye. We-dule, Griego-gayaba, Cristoʼye bileged, Hebreo-gayabardi, Mesíasʼye bileged. We-dulede, Bab-Dummad-Machid, Jesúsʼye-bimarbalid. Jesús we-napneggi gudigusgu, Judíoʼmar aku Jesús-daksa gusmalad, we, Bab-Dummad-Dule-Wargwen-Barmidagoed-Duleye.
Jesús we-napneggi-gudigu, deun, Roma-dulemar bela yar-ganikid. A-ulale, Mateo Jesús-sapinga-gued-iduale, Roma-dummadga Judíoʼmargi-mani-gaedga arbadii gusad. Degine, Judíoʼmar-ibe mani-atursabalid-dule dabalid.
Mateo, Bab-Dummad-Burba-Isligwaledba Judíoʼmarga garda narmaksad, ega sogega, Jesús Bab-Dummad-dule-wargwen-barmidagoye-sogsad-dule-sunnadye.
Jesús Bab-Dummad-negdakmaidgi anmarga sunmaknonikid. Mateo anmarga soged, igi Jesús dulemar-isgued-ular, nakrusgi burgwisa, adi, dulemar Jesúsʼgi abonolemalagar. Mateo na e-uayagwar Jesús-sunmaksad itosad, degine, e-ibyagwar Jesús-ibmar-imaksad daksabalid.
We-garda weyob ilemakar narmakar naid:
1. Jesucristo-e-dad-dummagan, degi, e-gwalulesad (1:1–2:23).
1a. Jesucristo-e-dad-dummagan (1:1-17).
1b. Jesucristo-bipigwaun-gudigusad (1:18–2:23).
2. Jesús gebe e-arbaed-onoded (3:1–4:11).
2a. Diigi-dule-oged-Juan, Bab-Dummad-igargi sunmaksad (3:1-12).
2b. Diigi-dule-oged-Juan, diigi Jesús-ogsad (3:13-17).
2c. Jesús, nia-sailase wilubdaklesad (4:1-11).
3. Jesús ibmar-dakdisurmalad imaksad (4:12–13:58).
3a. Jesús gannar Galilea-yargi e-arbaed-onoded (4:12-25).
3b. Jesús yarbirgi dulemar odurdaksad (5:1–7:29).
3c. Jesús ibmar-dakdisurmalad imaksad (8:1–9:38).
3d. Jesús, e-sapin-dummaganga igar-uksad (10:1–11:1).
3e. Jesús baigan ibmar imaksad (11:2–12:50).
3f. Jesús Bab-negsemaidgi burbar sunmaksad (13:1-58).
3g. Diigi-dule-oged-Juanʼye-nugad, burgwisad (14:1-12).
4. Jesús, neggwebur-baid-baidgi arbaed imaksad (14:13–20:34).
4a. Jesús ibmar-dakdisulid baigan imaksad (14:13–17:27).
4b. Dulemar-daed-igargi Jesús sunmaksad (18:1–20:34).
5. Jesús, Jerusalénʼgi napi gudigusad (21:1–23:39).
6. Jesús, napneg-bergudanikidgi sunmaksad (24:1–25:46).
7. Jesúsʼga oburgwileged-igar-mesisad (26:1–27:66).
8. Jesús gannar durgusad (28:1-20).
Binsamardo, we-garda birga 37ʼgi narmakles-insaye.
Be itogua.
1. JESÚS-E-DAD-DUMMAGAN, DEGI, E-GWALULESAD
1
(1:1–2:23)
1a. Jesucristo-e-dad-dummagan
(1:1-17)
(Lucas 3:23-38)
1 Jesucristo e-dadgansiki ilekwaa-danikid-e-garda. Jesucristo, David-e-wagwad, degi, Abraham-e-wagwabalid.
2 Abraham-machidi, Isaacʼye nugad,
Isaac-machidi, Jacobʼye nugad,
Jacob-machidi, Judáʼye nugad,
degi, e-masmala-baigan.
3 Judá-machidi, Faresʼye nugad,
degi, e-machi-baiddi, Zaraʼye nugad.
We-machi-warbogwad-e-nandi, Tamarʼye nugad.
Fares-machidi, Esromʼye nugad,
Esrom-machidi, Aramʼye nugad.
4 Aram-machidi, Aminadabʼye nugad,
Aminadab-machidi, Naasónʼye nugad,
Naasón-machidi, Salmónʼye nugad.
5 Salmónʼdi, Rahab-ebo Booz-baksad.
Boozʼdi, Rut-ebo Obed-baksad.
Obed-machidi, Isaíʼye nugad.
6 Isaí-machidi, Rey-Davidʼye nugad,
Rey-David-machidi, Salomónʼye nugad.
Salomón-e-nandi Urías-e-omega-gusadid.
7 Salomón-machidi, Roboamʼye nugad,
Roboam-machidi, Abíasʼye nugad,
Abías-machidi, Asaʼye nugad,
8 Asa-machidi, Josafatʼye nugad,
Josafat-machidi, Joramʼye nugad,
Joram-machidi, Uzíasʼye nugad,
9 Uzías-machidi, Jotamʼye nugad,
Jotam-machidi, Acazʼye nugad,
Acaz-machidi, Ezequíasʼye nugad,
10 Ezequías-machidi, Manasésʼye nugad,
Manasés-machidi, Amónʼye nugad,
Amón-machidi, Josíasʼye nugad.
11 Judíoʼmar Babiloniaʼse gales ebipilesmargu, Josías machimala-nikunonikid:
Jeconías, degi, e-masmala-baigan.
12 Judíoʼmar gales Babiloniaʼse ebipilesmalad-sorba,
Jeconías, Babiloniaʼgi e-machi-Salatiel-baknonikid.
Salatiel-machidi, Zorobabelʼye nugad.
13 Zorobabel-machidi, Abiudʼye nugad,
Abiud-machidi, Eliaquimʼye nugad,
Eliaquim-machidi, Azorʼye nugad.
14 Azor-machidi, Sadocʼye nugad,
Sadoc-machidi, Aquimʼye nugad,
Aquim-machidi, Eliudʼye nugad.
15 Eliud-machidi, Eleazarʼye nugad,
Eleazar-machidi, Matánʼye nugad,
Matán-machidi, Jacobʼye nugad.
16 Jacob-machidi Joséʼye nugad.
José, María-e-suiga gusadid, geb agi Jesús gwalulesad.
We-Jesús, Cristoʼye nugad.
17 Degisoggu, Jesús-e-dadgan, Abraham-akar, Davidʼse, e-ambe-gakabake (14) gued.
Degi, David-akar, Judíoʼmar gales Babiloniaʼse-ebipilesmaladse, Jesús-e-dadgan e-ambe-gakabakebalid (14).
Degi, Judíoʼmar gales Babiloniaʼse ebipilesmalad-akar, Cristoʼse, Jesús-e-dadgan e-ambe-gakabakebalid (14).
1b. Jesucristo-bipigwaun-gudigusad
(1:18–2:23)
(Lucas 2:1-7)
18 Jesucristo weyob gwalulesad: María, Jesús-e-nan, deun José-ebo igar nabosmalad na nikumaloye. Nikued-idu, María daklealid, Bab-Dummad-Burba-Isligwaled-egi-ataksadba bato gurgin-nika gudii. 19 María-e-sui-José, dule-gwage-nuedsoggu, yapa-María-obingegsaedba arbakee mete-sokalinad.
20 Ar José degi-binsadii, gabgi Bab-Dummad-e-baliwitur ese nonikid, ega sognonikid: “David-wagwa-José, mer be dobgu. María be-omega-guega be abingae. Ar María-bonigwar be dakedi, Bab-Dummad-Burba-Isligwaled-sogedba deyob gusad. 21 María, machi-wargwen nikuoed, Jesúsʼye be onugsaoed, ar ade, isguedgi e-neggwebur abonogoed.”
22 Weyob bela ibmar-gusadi, deyob gusad, adi, Bab-Dummad na e-gayaburba-barsogedba ibmar-sogsadba guegar, deun sogsagusgu:
23 “Emi be dake, yagwa-wargwen gurgin-nika guoed, goe nikunonikoed.
Emanuelʼye onugsaoed.”
Isaías 7:14
Emanuel sogleged, “Bab-Dummad anmarba gudiiye.”
24 José gabdakmai ataksagu, ar igi Bab-Dummad-e-baliwitur ega sogsa, deyob imaksad. José, María-nikunonisunnad. 25 Degi-inigwele, amba Maríaʼse gochasurgweled. José, María-machi-gebe-nikusad-sorba geb Maríaʼse gochad. Machigwa-gwalulesadi, Jesúsʼye onugsasad.