OSEAS-GARDA
OSEAS
GEBE-SOGLENAID
Garda-nug
Oseas-Garda. Oseas, Bab-gayaburbagi sunmakdii gusad. Abonolegedye, Oseas-nug obarileged.
Oseas-Gardagi weyob sunmaklenaid
Oseas Israel-yarginedid, Judá-yarginedsulid. Unnila Israel-yargingi Bab-Gayaburba-barsogdii gusad.
Binsaleged, we-garda (Cristo-idu) birga 750ʼsik, degi, 730ʼsik narmaklesye. We-ibagangine, we-reymar Judá-reyga maigusmalad: Uzías, Jotam, Acaz, degi, Ezequías. Degine, Israel-yalagindi, Joás-machi-Jeroboam reyga maigusad.
Oseas, Bab-Dummad-dulemar-sabedi magar itosad. Oseas, Bab-Dummad-ega-sogsadba ome-gambasaed nikusad. Oseas, e-ome gambasaega egi-wakitele, na e-ome-abegedba gannar aminaddaed. Deyobi, Bab-Dummad dule-egi-bangudele, dule-amididaed. E-dulamar egi bangubisuli abedaed. Oseas, Israel-dulemarga sabedba Bab-Dummad-gayaburbagi sunmaksad, adi, Israel-dulemar melle Bab-Dummadgi bangumalagar, unnila Bab-Dummadbarbi nanadii gumalagar.
We-gardagine, weyob ilemakar sunmaklenaid:
1. Bab-Dummad, Oseas-ome-nikusadba, burbar Israel-dulemargi sunmaknaid (1:1–3:5).
2. Bab-Dummad Israel-dulemargi sunmaked (4:1–14:9).
2a. Israel-dulemar-nue-isgusmalad (4:1–5:15).
2b. Israel-dulemar-sabsur-odurdaklegoed (6:1–10:15).
2c. Bab-Dummad Israel-dulemar-sabesailad (11:1–14:9).
Be itogua.
1. BAB-DUMMAD, OSEAS-OME-NIKUSADBA, BURBAR ISRAEL-DULEMARGI SUNMAKNAID
1
(1:1–3:5)
Oseas ome-gambasaed nikusad
1 Deunni, Judá-dulemar-e-reymar Uzías, Jotam, Acaz, degi, Ezequías, negsemamaigusad-ibagangine, degi, Israel-dulemar-e-rey Joás-machi-Jeroboam neg-semaigusmogad-ibagangine, Bab-Jehová weyob Beeri-machi-Oseasʼga sunmaknonikid.
2 Gebedgi, Bab-Jehová weyob Oseasʼga sunmaksad. Weyob ega sogsad: “Be nao, ome-gambasaed be nikuna, ebo be anagan-nikuo. Ar Israel-dulemar bela nue-isgusbukwad, ar bela angi bangudmalad.”
3 Degine, geb Oseas Bab-Dummad-sogedba imaksad. Agi, Oseas Diblaim-e-sisgwa Gomerʼye-nugad nikunonikid. Degiidbali, Gomer gurgin-nika gunonikid, geb ega susugwa uklenonikid.
4 Geb degine, Bab-Jehová Oseasʼga sogded: “We-susugwa Jezreelʼye be onug-imako. Ar ade, emisgwasaale, an Jehú-e-gwenadgan sabsur-wiogoed. Ar Jehúʼde Jezreel-nebagi dulemar-ogilos gusad. Deyob an Israel-yar-selemaid ilagwen-obelogar imakoed. 5 We-ibagangine, Jezreel-nebagi Israel-dulemar-e-bila-onomalad-e-gargangued an obelogoed.”
6 Geb ibagan-nasadgi, Gomer gurgin-nika gunonibalid, geb ega bunolo uklenonikid. Degine, geb Bab-Jehová Oseasʼga sogded: “We-goe Lo-Ruhamaʼye be onugsao. A-sogleged, ‘wiledaklegarsulidye.’ Ar ade, bar an Israel-dulemar wiledakosulid, ar e-isgusmalad an ega eliosulid. 7 Unnila Judá-dulemarginbi an ise-wile binsaoed, a-dulemardi an bendakoed. Bila-onogedgi Judá-dulemar-bendakegala, warsi an abesulid, es-suid an abesurbalid, molimar an abesurbalid, dule-moligi-sii-urwemalad an abesurbalid. Ar anbi walagwen unni gued. Ar ani an e-Bab-Dummad gued, ani an bendakoed.”
8 Lo-Ruhama mam-iargusgu, Gomer, gannar gurgin-nika gunonibalid, geb gannar ega susugwa-uklenonikid. 9 Agine, Bab-Jehová Oseasʼga sogded: “Lo-Ammiʼye be onug-imako. A-sogleged, ‘an-dulamarsulidye.’ Ar bemar bar an-dulasurmalad, degine, bar an be-Bab-Dummadsurmogad.
10 ”Ar ibagwengine, Israel-dulemar ukub-merguedyob dule-bukib-gunonimaloed. Dogdar-merguedba geg wilubsalege, geg ebislege gunonimaloed. Bia e-annik soglesa, ‘an-neggwebursulidye,’ agine, ‘Bab-Dummad-Dula-Maid-e-mimmiganye’ bilenonikoed. 11 Judá-dulemar, Israel-dulemarbo ambikunonimaloed, agi, e-iduedga dule-gwensak onugsanonimaloed. Gannar dule-soggwennayob e-yargi ambikudmaloed. Ar Jezreelʼga iba-dummad nagunonikoed.”