1 Hierana gua sa zinama te Zihova pa guguana Izireli. Se Zihova pu repahia sa maṉauru, pu va habotu ia sa vina sokiraena sa popoa pepeso, meke Asa pu va podaka ia sa maqomaqona sa tie pa korapana sa, si zama vura guahe: 2 “Kote tavete guni nia na kapa Arau sa vasileana Zerusalema sapu kote napo nia ri doduru tinoni pa vari likohaena sa meke kote tedeve. 3 Koasa rane asa, totoso varigara nia ari doduru butubutu si asa, si kote tavete ia Rau sa popoa Zerusalema pude na patu hihiu koari doduru butubutu. Doduru pu podekia pude va rizu ia si kote va bakora pule ni mo. 4 Koasa rane asa si kote seke ni minatagutu Arau sari doduru hose meke sari tie koidi si kote pekipeki,” zama vura gua se Zihova. “Arau kote kopu totoko nia sa butubutu te Ziuda, ba kote va behu beto i Rau sari doduru hose tadi na kana. 5 Meke sari na tie tuturaṉa pa Ziuda si kote zama guahe pa bulodia, ‘Sari tie pa Zerusalema si ṉiṉiradi, sina sa dia Tamasa si e Zihova Tadi na Qeto Minate,’ kote gua.

6 Koasa rane asa si kote tavete i Rau sari tie tuturaṉa pa Ziuda pude guana raro sapu siṉi ia na nika meke habotu nana pa iqoso huda, guana zuke huruṉuna pa duduli popana. Kote sulu la si arini pa kali gede meke pa matao koari doduru tie pa vari kalina, ba Zerusalema si kote koa pa nana vasina meke lopu ta tiqu la.

7 Kote harupu kekenu i e Zihova sari na tie pa Ziuda, pude sa vina lavatana sa tutina e Devita meke tadi tie pa Zerusalema si lopu kote noma hola nia si te Ziuda. 8 Koasa rane asa si kote lavelave ni e Zihova sarini pu koa pa Zerusalema, pude asa sapu hitekena hola koa rini si kote ṉiṉira gua e Devita, meke sa tutina e Devita si kote gua sa Mateana te Zihova sapu ene va kenue koa rini, gugua sa Tamasa. 9 Koasa rane asa si kote qeto vura si Arau pude la huari sari doduru butubutu sapu rapatia sa popoa Zerusalema.”

10 “Meke kote zoropo la nia Rau koasa tutina e Devita meke sari tie pa Zerusalema sa Maqomaqo tataru variharupi meke vinaravara. Kote doṉo mae si arini koa Asa sapu huma ia rini, meke kote koa talotaṉa nia rini, guana sapu koa talotaṉa nia si keke koburu ekeina, meke kabo sisigiti nia, guana sapu na koburu koreo kenuna si kabo sisigiti nia rini.* Zn 19:37; Rev 1:7* Mt 24:30; Rev 1:7 11 Koasa rane asa si sa kabo pa Zerusalema si kote noma hola, kote gua sa totoso sapu kabo si arini pa Hadadi Rimoni koasa pezara pa Meqido. 12 Sa popoa si kote koa talotaṉa, hopeke teledia ri puku butubutu, meke sari dia barikaleqe si kote teledia: sa puku butubutu pa tutina e Devita meke sari dia barikaleqe kote koa teledia, sa puku butubutu pa tutina e Netani meke sari dia barikaleqe, 13 sa butubutu pa tutina e Livae meke sari dia barikaleqe, sa puku butubutu pa tutina e Simei meke sari dia barikaleqe, 14 meke sari doduru puku butubutu pule meke sari dia barikaleqe.”