1 Koasa vina made rane pa vina sia sidara, sa sidara Kisileve, koasa vina made vuahenina sa binaṉara te Dariasi si kamo mae sa zinama te Zihova koe Zakaraea. 2 Garunu lani ri na tie pa Betolo sari Sareza meke Reqemeleki, meke sari kaiqa dia tie pude nanasa poni koe Zihova, gua. 3 Ari na hiama koasa Zelepade te Zihova Tadi na Qeto Minate meke ari poropita kote nanasa poni ni sapu guahe, “Vea, kaqu koa talotaṉa meke madi pa ginani si gami pa vina lima sidara gua sapu ele hoke tavete ia gami koari soku vuaheni sapu ele hola?” gua.

4 Meke kamo mae koa rau sa zinama te Zihova Tadi na Qeto Minate: 5 “Nanasi sari doduru tie koasa popoa meke sari na hiama, ‘Vea, totoso va madi si gamu pa ginani meke koa talotaṉa si gamu koasa vina lima sidara meke pa vina zuapa sidara koari ka zuapa ṉavulu puta vuaheni ele hola, si vegua, hinokara koa Rau tugo si va madi pa ginani gamu? 6 Meke totoso hena na napo gamu, si vegua, lopu inevaṉa pude poni pule ni gamu mo si gamu? 7 Vea, lopu hire mo sari zinama te Zihova sapu zama vurani ari na poropita kekenudi totoso koa va leana meke tagotago sari tie pa Zerusalema? Vea lopu hire sari zinama te Zihova koari na vasileana pa vari likohaena, meke koari na popoa pa Neqevi d, meke koari pa hubidi ri na toqere pa kali lodu rimata sipu koa i ri na tie sari vasidi arini?’ ”

8 Meke kamo pule mae koe Zakaraea sa zinama te Zihova: 9 “Hiera gua si zama nia e Zihova Tadi na Qeto Minate: ‘Tavete vura nia sa ṉinoṉo hinokarana; vata dogoro nia sa tataru variharupi meke sa tataru variva taleosae koari turaṉamia. 10 Lopu ṉoṉovala i sari naboko, sari koburu sapu loke tamadia, sari tie karovodi meke sari tie malaṉadi. Pa bulomia si mi lopu balabala va kaleana la ia si keke turaṉamu,’ gua.

11 Ba korodia va taliṉa mae koa Rau si arini; tuku i rini sari taliṉa dia, va mudi mae si arini koa Rau meke sapu korodia hokara. 12 Va ṉira guni ni rini na patu sari bulodia meke korodia avosia sa tinarae babe sari zinama Taqarau Zihova sapu garunu lani Rau pa Maqomaqoqu koari na poropita koari na totoso ele hola. Gua ke bugoro hola si Rau Zihova Tadi na Qeto Minate.

13 Totoso titioko Arau, si lopu hiva va avoso si arini; ke totoso titioko si arini, si lopu kote avosi Rau, zama gua si Arau Zihova Tadi na Qeto Minate. 14 Pa givusu vivirua va hurakatae lani Arau koari doduru butubutu, vasina sapu na tie karovodi si arini. Sa popoa sapu luara pania rini si ta huara inete ke loke tie si hiva ene nuquru gua vasina. Gua asa meke huara ia rini sa popoa leleana sana.”