108
Vinaravara Tinepa Tinokae pa Vina Kilasadi rina Kana
(Keke kinera te Devita)
1 Kei Tamasa, turu va nabu si rau;
kaqu kera vahesigo rau si Goi pa doduru buloqu!
2 Kaqu vaṉunu vaqavaqasa si rau,
meke va namanama i sari na qua mike.
3 Kei Zihova, kaqu kera vahesigo rau si Goi
pa varikorapadi rina votiki butubutu.
4 Ura sa Mua tataru nabuna si noma hola nia sa sa maṉauru;
meke sa Mua tinaronue, loke tie si pada kamoa;
sage ululu hola nia sa sa maṉauru.
5 Kei Tamasa, Mu vata dogoro vura nia sa Mua linavata pa maṉauru,
meke sa Mua ṉiniraṉira pa kasia popoa.
6 Mu va sare gami pa Mua ṉiniraṉira, Mamu olaṉia sa qua vinaravara,
pude di tava sare sari na Mua tie pu tataru ni Goi.
7 Ele zama sa Tamasa pa Nana vasina hopena,
“Pa Qua minataqara si kote va hia ia Rau sa vasileana Sekemi koari na Qua tinoni,
kaqu paqaha va hia ia Rau sa pezara Sukoti koari na Qua tie.
8 Taqarau se Qileadi, Taqarau tugo se Manase,
sa butubutu Iparemi si na Qua tie varane pa vinaripera.
Sa butubutu Ziuda si kaqu baṉara ni sari na butubutu.
9 Moabi si kaqu guni nia Rau na Qua besini ṉuṉuzapana,
koa sa popoa Edomu si kaqu gona la nia Rau sari na Qua sadolo,
pude na vina gilagilana sapu Taqarau si asa.
Kaqu velavela la nia Rau sa Qua minataqara koari na tie Pilisitia.”
10 Kei Tamasa, esei si kaqu turaṉa gami pude la nuquria sa vasileana ta barana?
Esei si kaqu turaṉa lani gami pa Edomu?
11 Kei Tamasa, etulu pani gami mo Goi si gami?
Lopu kaqu koa turaṉae tu si Goi koari mami qeto minate varipera?
12 Kei, mae tokani gami pude razai sari na kana;
ura sa tinokae tana tie si loke guguana.
13 Be koa turaṉa gami Goi si kaqu koa mataqara si gami,
Agoi mo si boka va kilasi sari na mami kana.