104
Vinahesina sa Tamasa Kurikuri
1 Kei, maqu vahesia se Zihova pa doduruna sa buloqu!
Kei Zihova qua Tamasa, lavatamu hola si Agoi;
guana poko nia Goi sa tinolava variva magasana.
2 Sa kalalasa si guana Mua poko Goi,
repahia Goi sa maṉauru lavata, guana ipi.
3 Kuria Goi sa Mua vasina kokoana koari na kolo panaulu;
sari na lei si guana Mua totopili si arini.
Meke suraṉa si Goi pa givusu, meke paleke Igo sa pa tatapuruna.
4 Evaṉa guni na Mua tie paleke inavoso Goi sari na givusu,* Hib 1:7
meke sari na Mua nabulu si guari na hinuruṉu nika.
5 Ele va sotoa Goi sa kasia popoa koari na sinokirae nabudi,
gua asa ke lopu kaqu hite boka tava rizu si asa.
6 Ele va nobi tamunu nia kolo lamana Goi si asa, guana poko,
meke sa kolo si ululu hola ni sari na toqere.
7 Totoso zamai Goi sari na kolo, rizu taloa si arini;
totolo taloa si arini totoso avosia rini sa Mua zinama ṉiṉira.
8 Ululu hola ni rini sari na toqere, meke totolo gore la koari na pezara,
vasina sapu ta vizata poni nia rini.
9 Ele pada vekoa Goi sa voloso sapu lopu kaqu hola nia rini,
pude di lopu kaqu nobi tamunu pulea rini sa kasia popoa.
10 Va totolo gorei Goi koari na pezara sari na bukaha kolo,
meke sari na ovuku si totolo gore pa varikorapadi rina toqere.
11 Va napoi rini sari na kurukuru pinomo,
tava beto sa memeha tadi na doṉ'ki pinomodi.
12 Sari na kurukuru si tavete dia vori,
meke kerakera dia koari na hudahuda vasina.
13 Va gore mae ia Goi koari na toqere sa ruku pa maṉauru,
meke siṉia na Mua minana Goi sa kasia popoa.
14 Va toqolo poni ni duduli Goi sari na bulumakao,
meke ponini linetelete Goi sari na tie,
pude boka lelete si arini.
15 Meke pude boka tavete napo vaeni si arini meke qetuqetu.
Tavete oela olive si arini pude lumu va ṉedali sari kenudia,
meke na bereti, pude boka henahena meke ṉiṉira.
16 Sari na huda sida pa Lebanoni si vagi valeana kolo ruku;
arini sari na huda pu va toqoli e Zihova telena.
17 Vasina si tavete dia vori sari na kurukuru,
meke sari na hidoko si tavete dia vori pa huda nomadi.
18 Sari na toqere si na vasina tadi na qoti pinomodi,
meke sari na vasina patupatu si na vasina tometomeana tadi na kurukuru pu hoke hore qoqoro.
19 Tavetia Goi sa sidara pude padai sari na totoso pa hopeke sidara,
meke sa rimata si lulia sa sa nana totoso pude lodu.
20 Ele tavetia Goi sa boṉi,
meke sari na kurukuru pinomodi si vura mae pana huporo sa popoa.
21 Sari na laione si kurumu hata gedi ginani,
hata ia rini sa ginani pu va nama veko poni sa Tamasa.
22 Sipu gasa sa rimata, si pule la eko pa dia bae si arini.
23 Sari na tie si la koari na dia tinavete pana rane,
osolae kamo sa veluvelu.
24 Kei Zihova, soku hola sari na tiṉitoṉa pu taveti Goi,
tumatumae hola si Goi pa kinuridi ri doduru.
Sa kasia popoa si ta siṉie kurukuru toadi pu taveti Goi.
25 Dotu sa hebalana lavata, nomana hola, meke labena,
vasina si koa sari na tiṉitoṉa pu lopu boka ta nae, hitekedi na nomadi.
26 Meke vasina tugo si ene lamae sari na vaka,
meke vasina tugo si lopilopi sa kurukuru variva matagutuna pozana Leviatani,* Zob 41:1; Sam 74:14; Ais 27:1
asa sa kurukuru variva mate pa kolo pu tavetia Goi.
27 Sari doduru sara si kalavarae mo koa Goi
pude poni ni sari gedi ginani pana ovia rini.
28 Poni Goi sari gedi ginani, ke ganigani si arini.
Va nago ni Goi sari gedi ginani, ke deṉa si arini.
29 Pana taluarae Goi koa rini, si matagutu si arini,
totoso vagi pania Goi sa dia siniṉo, si mate si arini,
meke pule la pa pepeso vasina mae guadi.
30 Ba sipu siṉo la nia Goi sa Maqomaqomu, si toa si arini,
meke va toa pulea Goi sa popoa pepeso.
31 Mani koa hola ninae rane sa Nana ṉiniraṉira na vina lavata e Zihova.
Mani qetu ni e Zihova sari Nana tinavete.
32 Totoso doṉo la ia mo Sa sa kasia popoa, ba tarazuzu sa pepeso,
tiqui mo Sa sari na toqere ba puzaka sari na nai!
33 Kaqu kera vahesia rau se Zihova pa doduruna sa qua tinoa;
pana korapa toaqu rau, si kaqu kera vahesia rau sa Tamasa.
34 Sari na qua binalabala si madi va qetua si Asa,
ura qetuqetu nia rau se Zihova.
35 Sari na tie sea si madi tava mate palae pa kasia popoa,
meke sari na tie kaleadi si madi tava murimuri palae gedi.
Maqu vahesia rau se Zihova pa doduruna sa buloqu.
Mi vahesia se Zihova.