101
Vina Tatara tana Keke Baṉara
(Keke kinera te Devita)
1 Kei Zihova, kaqu kera atu nia rau koa Goi sa qua sinoto va nabu koa Goi,
meke sa qua vinilasa va toṉoto koari na tie.
Zihova maqu kera vahesi Igo.
2 Sari na qua tinavete na hahanana si kaqu loke tinazutudi.
Kei, panavisa kaqu mae koa rau si Goi?
Kaqu toa nia rau sa tinoa viana vasina koa si rau.
3 Sa kinaleana si lopu kaqu hite qetu nia rau.
Kukiti ni rau sari na tinavete tadirini pu luara pania sa Tamasa;
lopu kaqu hite galagala ni rau si arini.
4 Kaqu tozia rau sa hinokara pa qua tinoa;
lopu kaqu somana nia rau si keke kinaleana tadi na tie.
5 Kaqu va nosoi rau sarini pu nanae na ṉoṉovali sari na turaṉana.
Lopu kaqu hite qetu nia rau sa tie pu vahesihesi pule nia, na doṉo va goregore tie.
6 Kaqu qetu ni rau sarini pu kalavarae zoṉazoṉa koe Tamasa,
meke kaqu mae tavetavete pa qua vetu baṉara.
Arini pu hinokara pa dia tinoa,
si kaqu va malumi rau pude nabulu nau.
7 Loke tie kokoha si kaqu koa pa qua vetu baṉara;
loke tie sekesekei si kaqu koa hola pa kenuqu rau.
8 Lopu kaqu makudo va mate pani rau
sari na tie kaleadi pu koa pa popoa.
Kaqu va vura pani rau sari na tie kaleadi
koa sa vasileana nomana te Zihova.