97
Tamasa sa Ṉati Baṉara tadi na Baṉara
1 E Zihova si koa Baṉara, madi koa qetu sari na tinoni pa kasia popoa,
mi koa qetu gamu pu koa koa rina nunusa koari na lamana.
2 Na lei muho si koa pa vari likohaena,
koa Baṉara si Asa pa tinoṉoto meke pa vinilasa toṉotona.
3 Garunu va kenue la nia Sa sa nika,
pude sulu pani sari Nana kana pa vari likohaena.
4 Sari na Nana kapi si malara pa kasia popoa,
dogoria rina tinoni pa pepeso si asa meke neneqara pa minatagutu.
5 Sari na toqere si noloro guana oto huda pa kenuna e Zihova,
pa kenuna sa Baṉara tana doduruna sa popoa pepeso.
6 Sari na maṉauru si tozi vura nia sa Nana tinoṉoto,
meke sari doduru butubutu si dogoria sa Nana ṉinedala.
7 Sari doduru pu vahesi beku si tava kurekure,
sari doduru tamasa si hoqa todoṉo pa kenuna e Zihova.
8 Qetu sari na tinoni pa Zaione,
meke qetuqetu sari na vasivasileana pa Ziuda,
sina koa gua koari na Mua vinilasa Goi Zihova.
9 Zihova, Tamasa Ululuna Hola, Agoi mo sa Ṉati Baṉara pa doduruna sa kasia popoa.
Agoi mo si noma hola koari doduru tamasa.
10 Tataru ni e Zihova sarini pu lopu qetu nia sa kinaleana,
kopu ni Sa sari na tinoa tadi na Nana tie pu soto va nabu koa Sa,
meke va sarei Sa si arini koari na tie kaleadi.
11 Sa lineana te Tamasa si guana kalalasa pu malara la koari na tie toṉoto,
meke na qinetuqetu koari pu lulia sa Nana hiniva doduru totoso.
12 Mi koa qetu nia gamu se Zihova!
Gamu na tie toṉoto,
mi vahesia se Zihova sa Tamasa Hopena.