85
Vinaravarana sa Minamutu tanisa Butubutu
(Keke kinera tanisa butubutu Kora)
1 Zihova, ele tataru ni na taleoso ni Goi sari na Mua tie pa Mua popoa;
ele va mamutu pulea Goi sa butubutu Zekopi.
2 Ele va mate pani Goi sari na kinaleadi tadi na Mua tinoni,
meke ele taleoso ni Goi sari na dia sinea.
3 Ele beto bugoro ni Goi sarini,
meke veko pania sa Mua tinaṉaziri koa rini.
4 Kei Tamasa mami Hinarupu,
Mu valeana puleni gami;
Mu lopu bugoro ni gami.
5 Kaqu bugoro lani gami mo Goi si gami ninae rane?
Lopu kaqu hite beto tu sa Mua binugoro?
6 Mu va ṉiṉira pule gami,
meke kaqu vahesigo gami na Mua tinoni si Goi.
7 Kei Zihova, Mu tataruni gami pa Mua tataru nabuna,
Mamu harupu gami.
8 Maqu va avosia kamahire gua sapu kaqu zama nia e Zihova sa Tamasa.
Ele va tatarani gita na Nana tie pude koa pa binule,
be lopu pule la tavete pulei gita sari na nada sinea.
9 Hinokara hola sapu kaqu harupi Sa sarini pu va lavatia si Asa,
meke kaqu koa turaṉi Sa sari Nana tie pa Nana popoa.
10 Sa tataru nabuna meke sa kinopuna sa zinama te Tamasa si kaqu varigotoi,
meke sa tinoṉoto na binule si kaqu vari hapahapai guana tie.
11 Kaqu noma sage sa kinopuna sa zinama te Tamasa koari na tie pa pepeso,
meke sa Tamasa toṉotona si kaqu doṉo gore mae pa maṉauru.
12 Kaqu va mamutu gita e Zihova si gita,
meke kaqu masuru sari na nada inuma.
13 Sa tinoṉoto si kaqu mae va kenue koe Zihova
meke va nama nia Sa sa Nana siraṉa.