80
Keke Vinaravara pude Valeana Pulea sa Butubutu Izireli
(Keke vinaravara te Asapa)
1 Kei Agoi na Sepati tana butubutu Izireli, Mu avoso mae gami,* Ekd 25:22
Mu turaṉa gami Goi, Agoi na koimata tadi na Mua tinoni pu guana rovana sipi.
Habotu si Goi pana uludi ri na mateana serubimi,
2 Mu vata dogoro pule Nigo koari butubutu Iparemi, Benisimane, meke Manase!
Vata dogoro vura nia Goi sa Mua ṉiniraṉira,
mae pude harupu gami!
3 Mu valeana pule gami Tamasa,
Mu va dogoro ni gami sa Mua tataru variva taleosae, meke kaqu ta harupu si gami.
4 Kei Zihova Tamasa, sa koimata pa vinaripera.
Vea seunae gua si kaqu bugoro nia Goi sa vinaravara tadi na Mua tinoni?
5 Ele va ganini gami Goi sari na tinalotaṉa,
meke va napo va sokuni gami Goi Sa kapa kolomata mami.
6 Ele va malumi Goi sari na votiki butubutu pude mae varipera nia sa mami popoa;
sari na mami kana si hegehegere ni gami.
7 Kei Tamasa tanisa Qeto Minate, Mu valeana pule gami,
mu va dogoroni gami sa Mua tataru variva taleosae,
meke kaqu ta harupu si gami!
8 Ele turaṉa vura nia Goi sa butubutu Izireli pa Izipi,
meke hadu pani Goi sari na votiki butubutu meke veko hobe lani gami Goi.
9 Guana huda qurepi ta letena si gami koasa pepeso sapu ele va kalalasia Goi.
Meke toqolo sage si gami osolae siṉia gami sa doduruna sa popoa.
10 Guana huda nomana hola si gami sapu va aqori sari na toqere,
meke aqoro pa kaurudi sari na lelaṉana sa huda vaeni sari na huda sida ululudi koari na toqere pa Lebanoni.
11 Sari na lelaṉana sa huda si repaha la pa volosodi rina popoa, podalae pa kolo Meditareniani
meke kamo latu pa Ovuku Iuparetisi.
12 Na vegua ke vata huari Goi sari na gobana sa popoa,
ke sari na tie karovodi pu ene gua vasina si hikoi sari na vua qurepi.
13 Kekeṉoṉo guana boko pinomo sapu neti va konekonea,
meke guana kurukuru pinomo si arini sapu ṉoṉovala koasa linetelete asa.
14 Kei Tamasa, Patutokaemu, Mu pule mae koa gami!
Mu doṉo gore mae pa Maṉauru,
Mamu mae harupi sari na Mua tie!
15 Mae harupia sa Mua butubutu tie;
harupu gami na huda qurepi sapu ele letea Goi,
gami na tumu sapu ele va toqolo gami Goi pa Mua ṉiniraṉira.
16 Ele mae maho pania rina kana sa Mua huda, na sulu pania rini.
Mu doṉo va bubugorae la i sari na kana sara, Mamu va mate pani gedi.
17 Mu kopu valeana ni na va aqori sari na Mua tinoni pu ele vizati Goi,
sa Mua butubutu tie sapu va ṉiṉira ia Goi.
18 Lopu kaqu taluarae si gami koa Goi,
Mu kopu ni gami meke kaqu vahesigo gami si Goi.
19 Kei Zihova, Tamasa Patutokaemu, Mu valeana pule gami,
vata dogoro nia koa gami sa Mua tataru lopu ta ṉana kamona pude mami ta harupu.