Buka Vina Ṉeta
73
Sam 73 kamo Sam 89
(Kinera te Asapa)
Sa Hahanana Toṉoto te Tamasa
1 Leana hola sa Tamasa koari na tie Izireli,
meke koa rini pu via pa bulodi meke lulia sa hiniva te Tamasa pa doduru bulodia.
2-3 Totoso kono ni rau saripu vahesi pule ni,
meke dogoria rau sa rinavutu tadi na tie kaleadi,
si tata hokara malohoro taloa sa qua sinoto koe Tamasa.
Sa qua rinaṉeraṉe si tata mate taloa hokara.
4 Ura na lopu hoke koa ta sigiti si arini,
ba toa valeana, meke ṉiṉira pa tinidia.
5 Lopu koa ta sigiti gua ri kaiqa tie si arini.
Lopu tutuvi rini sari na tinasuna sapu gua tutuvi ari kaiqa tie.
6 Ke sa vinahesi pule si guana dia pakupaku vinasari pa ruadia,
meke sa ṉinovaṉovala si guana dia poko doduru.
7 Sari na bulodia si ta siṉie kinaleadi,
meke sa kinaleana koari na dia binalabala si loke kokoina.
8 Hegehegere ni rini sari na votiki tie, meke zama ni rini sari na zinama kaleadi;
vahesi pule ni meke va namanama pude balabala vekoa rini pude ṉoṉovali sari na votiki tie.
9 Zama va kaleana nia rini sa Tamasa pa Maṉauru,
ke pa dia zinama si hiva koimata ni rini sari na tie pa kasia popoa.
10 Gua asa, ke luli i rina tie te Tamasa sari na dia hahanana,
meke okoro va hinokari rini gua saripu zama ni rini.
11 “Uve, lopu kaqu gilania Tamasa gua sapu ta evaṉa.
Sa Tamasa Ululuna Hola si lopu kaqu gilania gua sapu evaṉia gita,” gua si arini.
12 Gugua asa sari na tie kaleadi.
Soku hola dia likakalae si arini, meke vagi va soku hola doduru totoso.
13 Ke loke qua pinia mo si pude kopu pule nau si rau meke koa via pa buloqu,
meke pezaku i rau sari na limaqu, pude lopu tavete va kaleana pa tie.
14 Ura doduru totoso si vata sigitau Goi,
meke doduru munumunu si va kilasau Goi si arau.
15 Be zama ni rau saripu gua sara si va ilolo pule nau si rau koari na hahanana leadi tadi na Mua tinoni.
16 Podekia rau balabala ia sa tinasuna hie,
ba tasuna hola koa rau,
17 osolae nuquru la si rau koasa vasina hopena te Tamasa,
meke tiqe gilania rau gua sapu kaqu ta evaṉa koa ri na tie kaleadi.
18 Kaqu va turui Goi si arini pa vasina gulazorona,
meke va hoqa huara ineti Goi si arini.
19 Hinoqa ta huarae si arini pa keke totoso papakana mo.
Tava mate si arini pa keke minate kalekaleana hola.
20 Guana pinutagita mo si arini sapu tapuru taloa pana munumunu,
kei Baṉara, sipu vaṉunu Goi, si murimuri taloa si arini.
21 Sipu ta ṉaziri sari na qua binalabala,
meke va gilagila ia rau sa tinasigiti,
22 si duviduvili guana kurukuru ṉame si rau,
ke lopu gilanigo rau si Goi.
23 Gugua asa, ba koa tata koa Goi si rau doduru totoso,
meke tuqe au Goi si rau pa kali lima mataoqu.
24 Turaṉau Goi si rau koari na Mua vina tumatumae,
meke pa vinabetona si va kamo au Goi pa vina lavataqu.
25 Loketoṉa pule si tagoa rau pa Maṉauru, ba Agoi mo;
meke koa gua sapu tago igo rau si Goi,
si loketoṉa pule si kaqu ehaka nia rau pa pepeso.
26 Be goregore hikare sa qua binalabala meke sa tiniqu,
ba sa Tamasa si na qua ṉiniraṉira.
Asa mo si ta hivae koa rau, meke loketoṉa pule.
27 Arini pu koa va seu koa Goi, si kaqu mate palae pa vina kilasa,
kaqu huara pani Goi sarini pu lopu soto va nabu pa dia linuli koa Goi.
28 Ba sapu koa rau, si leana hola pude qu koa tata koa Goi Tamasa,
vizatia rau pude koa aqorae koe Zihova sa Baṉara Lavata,
meke pude tozi vura ni sari doduru Mua tinavete.