61
Vinaravara pude Ta Kopue
(Kinera te Devita pude mikemike nia)
1 Ke Tamasa, mu avosia sa qua kinabo,
mamu va avoso mae ia sa qua vinaravara.
2 Koa va seu si rau pa qua popoa soti,
ke malohoro sa buloqu,
Tepatepa atu koa Goi si rau,
turaṉau la koasa patu hihiu.
3 Mu turaṉa lani au pa Mua aqoroana,
ura Agoi sina qua vetu ṉiṉirana,
sa qua lave pu hukati sari na qua kana.
4 Va malumau, maqu koa pa Mua vetu hopena ninae rane!
Va malumau, maqu koa aqoro koa Goi,
guana kurukuru pu va aqori sari na tuna pa kauru tatapuruna.
5 Ura Agoi Tamasa, ele avosi sari na qua vina tatara,
meke ele poni nau Goi sa minana gua
sapu tagoa rini pu pamaṉa nia sa Pozamu.
6 Mu tomo lani sari na vuaheni sokudi koasa tinoa tanisa baṉara.
Mu va toa va gelenae ia si asa.
7 Mani koa baṉara va gelenae si asa pa kenumu Goi Tamasa.
Mu va aqoria si asa koasa Mua tataru nabuna,
meke kopu nia gua sapu ele tozi nia Goi koari na Mua zinama.
8 Gua asa ke kaqu kera vahesi Igo rau si Goi doduru totoso,
totoso ponigo rau hopeke rane gua saripu va tatara ni rau.