35
Tinepa Tinokae koe Tamasa
(Keke kinera te Devita)
1 Kei Zihova, Mu kanai gedi saripu kanaqu rau,
Mamu varipera koari pu varipera mae koa rau.
2 Mu palekia sa Mua lave na tiṉitoṉa varipera,
Mamu mae va sare au.
3 Mamu hoperi, na seke ni,
karamaho gedi sarini pu korapa hadu luli au.
Mu tozi nau sapu kaqu va sare au Goi si rau.
4 Madi tava kilasa gedi sarini pa kinurekure, sarini pu hatau pude va mate au gua.
Madi tava kekere pule pa ninunala si arini pu kukiti nau.
5 Madi ta givusu palae gua na hikahika huiti,
sipu hadu taloa ni sa mateana te Zihova si arini.
6 Mani tava huporo na gulazoro sa dia siraṉa
sipu hadui sa mateana te Zihova si arini.
7 Ura tavete hobori rini sari na binalabala kaleadi
meke va padapada mae ni koa rau.
Kekeṉoṉo guana gelia rini sa pou pude va hoqau gua.
8 Mani raza pule koarini sa tinahuara totoso lopu hite rovea rini.
Sari na binalabala kaleadi pu va pada ni rini koa rau
si madi raza pule tugo koarini,
madi ta huarae gedi vasina.
9 Meke kaqu qetuqetu nia sa buloqu se Zihova,
sina ele harupau Sa koari na qua kana.
10 Pa doduruna sa qua tinoa si kaqu zama la si rau koe Zihova,
“Kei Zihova, loke tie si kekeṉoṉo gua Agoi.
Va sarei Goi saripu malohoro koari pu ṉiṉira,
meke saripu malaṉa si harupi Goi koarini pu ṉoṉovali si arini.”
11 Sari na tie va sosode kokohadi si turu mae meke zutu au,
koari na tinavete pu lopu hite gilani rau.
12 Hobe nia kinaleana rini sa qua tinavete leana,
ke lodu mate sa maqomaqoqu pa tinalotaṉa.
13 Ba totoso moho rini si hoke va sagei rau sari na poko baika,
meke koa madi pa ginani si rau pa tinalotaṉa.
Todoṉo si rau pa vinaravara,
14 guana varavara nia rau si keke qua baere, babe keke tasiqu.
Ene totodoṉo si rau pa tinalotaṉa nomana
kekeṉoṉo gua sapu talotaṉa nia sa tie sa tinana matena.
15 Ba sipu koa tasuna rau si qetu si arini,
meke habotu varivarigarae na va sisire nau rini.
Sarini pu lopu hite gilanau ba lopu makudo nanae nau.
16 Pesipesi hoborau rini sipu loke dia ginugua koarau.
Garata livodi si arini sipu doṉo mae au rini.
17 Kei Baṉara, vea seunae gua si kote dodogoro Mua mo koa rau pa tinasuna si Goi?
Mu va sare au koari pu ṉoṉovalau.
Harupau koari na qua kana pu ṉiṉira guana laione.
18 Meke kaqu zama leana koa Goi si rau pa varikorapadi ri na Mua puku tie.
Kaqu vahesigo rau pa kenudi ri doduru.
19 Mu lopu va malumi sari kasa tie kokohadi pu kanau* Sam 69:4; Zn 15:25
pude qetu nia sa qua kinilasa.
Madi lopu vari matamatapuri nau rini pu kukiti hoboro nau.
20 Ura lopu koa baere si arini koari na tie,
ba va podopodoe ni koha tu rini sarini pu koa bule.
21 Velavela nau rini meke zama,
“Ele pohoa gami gua sapu tavetia goi!” gua si arini.
22 Kei Zihova, ele dogoria tu Goi gua sapu ta evaṉa.
Ke Mu norei gedi sari na qua kana.
Mu lopu koa va seu koa rau.
23 Kei Zihova,
Mu tuturei mae, Mamu lavelave hukata nau.
Mu tuturei mae, Mamu toka nau Tamasa, qua Baṉara.
24 Mu tozi vura nia sapu viaqu si rau, kei Zihova, qua Tamasa;
madi lopu qetu nia rina qua kana sa qua tinasuna.
25 Madi lopu zama si arini, “Ele gorevura sapu gua hiva nia gita.”
Madi lopu zama “Ele voi pa nada sipata gita si asa,” gua.
26 Madi tava kilasa na tava nunala sarini pu qetu nia sa qua tinasuna.
Madi koa kurekure na talotaṉa si arini pu va lavata puleni.
27 Madi velavela pa qinetuqetu sarini pu okoro dogoria sapu lopu sea si rau.
Madi zama pilipule nia sapu guahe, “Marilaena se Zihova,
qetu nia Sa sa vinasare tanisa Nana nabulu,” gua.
28 Meke kaqu tozi vura nia rau sa Mua tinoṉoto,
meke sa vinahesimu doduru rane.