27
Keke Vinaravara Vinahesi te Devita
1 Zihova tugo sa qua kalalasa meke na qua hinarupu,
esei si kaqu matagutu nia rau?
Lavelave hukata nau e Zihova koari doduru tinasuna;
lopu kaqu hite matagutu si rau.
2 Pana mae raza au na hiva va mate au rina tie kaleadi,
si kaqu tava kilasa meke hoqa mate si arini.
3 Pana mae varidikue nau rina qua kana ba lopu matagutu si rau;
be mae rapata nau sa qeto minate varipera,
ba kaqu raṉea rau sa Tamasa.
4 Keketoṉa mo si tepa ia rau koe Zihova,
asa tugo si kaqu hata zoṉazoṉa ia rau;
pude maqu somana koa si rau pa Zelepade te Zihova ninae rane pa qua tinoa,
pude maqu dogoria, na magasa nia sa Nana tinolava meke lulia sa nana hiniva.
5 Ura pa korapa totoso tasuna si kaqu va aqorau Sa,
kaqu tome au Sa pa korapa Nana Zelepade,
meke kaqu va hake au Sa pa patu hihiu.
6 Gua asa, ke kaqu koa mataqara holani rau sari na qua kana pa vari likohaequ.
Meke kaqu va vukivukihi nia rau sa vinukivukihi vinahesi meke kaqu velavela pa qinetuqetu pa Nana Zelepade hope,
Kaqu kera vahesia rau se Zihova!
7 Mu avoso mae au, Zihova, pana varavara atu rau!
Tataru nau, Mamu olaṉia sa qua tinepatepa!
8 Sipu zama si Agoi, “Mu hata Au,”
si olaṉa atu sa buloqu, “Korapa hata Igo rau, Zihova.”
9 Mu lopu va paere pule nigo koa rau!
Lopu bugoro nau!
Mu lopu gala pani au sa Mua nabulu.
Visoroihe si ele toka nau tugo Goi,
ke Mu lopu kilu au na luara pani au,
Mu lopu koa va seu koa rau, ke Tamasa, qua Hinarupu!
10 Be veko pani au rina tiatamaqu,
ba Agoi Zihova mo si kaqu kopu nau si rau!
11 Zihova, va tumatumae nau sa Mua hiniva koa rau,
Mamu turaṉau pa siraṉa toṉoto,
sina sokudi sari na qua kana!
12 Mu lopu vala au koari na qua kana,
ura na tie sekesekei si arini pu zutu kokoha au pa dia ṉinovaṉovala.
13 Gilania rau sapu kaqu dogoro sotia rau sa learane te Zihova koasa popoa tadi na tie toadi.
14 Mu raṉea se Zihova, koa varane,
mu lopu koa malohoro pa rinaṉeraṉe.
Mu kalavarae koe Zihova!