21
Vinahesi pa Minataqara
(Keke kinera te Devita)
1 Ke Zihova, qetuqetu nia sa baṉara
sa Mua ṉiniraṉira,
sina ele va mataqaria goi
meke tava lavata si asa.
2 Ele ponia Goi sa nana hiniva pa korapa bulona.
Ke lopu heki nia Goi gua sapu tepa ia sa.
3 Ele mae vekoi Goi koasa sari na minana taguedi,
meke ele va hake nia toropae qolo Goi sa batuna.
4 Tepaia sa koa Goi sa tinoa,
ke poni nia Agoi koasa,
sa tinoa gelenaena sapu
koa hola ninae rane ka rane.
5 Mataqara hola si asa koari nana kana,
sina va sarea goi.
Ele ponia goi koasa sa vina lavata na tinolava.
6 Ele ponini Goi koasa sari na Mua minana ninae rane,
meke va qetuqetua Goi si asa pa kenumu Goi.
7 Kalavarae sa baṉara koe Zihova
sapu Ululu Hola koari doduru,
sina koa gua koasa Nana tataru nabuna
si koa tava sare si asa doduru totoso.
8 Kaqu tuqe vagi Goi pa Mua ṉiniraṉira sari doduru Mua kana,
kaqu tuqe vagi Goi sari doduru pu kukiti Nigo.
9 Pana vura mae si Asa si kaqu huruṉu guana nika;
meke pa Nana binugoro si sulu va ineti Sa,
guana nika sapu gani va upati si arini.
10 Lopu keke koari na tutidi rini si kaqu toa hola;
kaqu va mate beto pani Sa sarini.
11 Be mizi vekoi rini sari na dia tinavete kaleadi na sinekesekei,
ba lopu kaqu boka mataqara si arini.
12 Pana va totoanae ni Goi sari na Mua tupi,
si kaqu tarazuzu meke govete taloa si arini.
13 Vahesi Igo gami si Agoi Zihova koasa Mua ṉiniraṉira lavata.
Kaqu kera vahesia gami sa Mua ṉiniraṉira!