14
Sa Kinaleana tadi na Tie
(Keke kinera te Devita)
1 Sa tie duvili si na tie pu zama guahe pa bulona,* Rom 3:10-12
“Loke Tamasa si koa,” gua.
Sari na tie gugua arini si kaleadi pa dia tinoa;
tavete va kaleana sisigiti si arini,
meke lopu keke arini si lulia sa tinoṉoto.
2 Doṉo gore mae pa Maṉauru koari na tinoni pa pepeso se Zihova,
pude hatai be koadia kaiqa tie saripu tumatumae na gilae,
pu hata ia sa Tamasa meke va lavatia si Asa.
3 Lopu keke koa rini sapu soto va nabu koe Tamasa,
ba sea beto sari doduru,
kaleadi beto mo si arini.
Lopu keke arini si tavetia gua sapu leana,
namu loketoṉa hokara.
4 Loke dia ginilagilana sari na tie kaleadi hire
pu ṉoṉovali sari na tie taqarau, kekeṉoṉo gua
sapu hena va murimuri rini sari gedi ginani,
meke lopu hite varavara la si arini koe Zihova!
5 Ba lopu sana matagutu sisigiti si arini,
sina sa Tamasa si koa koari na vinarigara tadi na tie toṉoto.
6 Hiva va nunali rina tie kaleadi sari na hiniva tadi pu malaṉa,
ba e Zihova tugo sa aqoroana tadirini.
7 Kei, mani vura mae mo pa Zaione sa tinaharupu tadi na butubutu Izireli,
pana va mamutu pulei Tamasa sari na Nana tie Izireli
si kaqu qetuqetu hola si arini.