10
Vinaravara pude Tepa ia sa Tinoṉoto
1 (Lamed) Kei Zihova, na vegua ke koa va seu si Goi?
Na vegua ke tome Mua si Goi pa totoso tasuna si gami?
2 Pa dia vinahesi pule si ṉoṉovali rina tie kaleadi sari na habahuala.
Padadi pude va kilasa puleni koari na kinaleadi pu kuhana vekoni rini.
3 (Mem) Sa tie kaleana si vahesi pule nia koari nana inokoro kaleadi pa bulona,
meke va lavatia sa sa tie puhina ba va karia sa se Zihova.
4 (Nun) Sa tie kaleana si lopu hite hata ia sa minana te Tamasa.
Pa nana vinahesi pule si balabala ia sa sapu loke Tamasa si koa, gua.
5 Ravutu sa nana kinoa doduru totoso, gua si asa.
Lopu hite tata pa nana ginilagilana sa guguana sa Mua vinaripitui.
Doṉo va kari sa saripu norena sa.
6 Balabala ia sa sapu lopu kaqu hite tava rizu si asa,
meke lopu kaqu hite tutuvu tinasuna koari doduru sinage na sage, gua.
7 Koba zama leveleve na sekesekei na ṉoṉovala si asa koari na tie.* Rom 3:14
(Pe) Bebeno zamani sa sari na zinama pu vari sigiti, na kaleadi pa tie.
8 Opo tomeni sa pa vasivasileana pude va matei sari na tie leadi,
meke seke tomei sa si arini.
(Ain) Doṉo hatahatai sa saripu malamalaṉadi.
9 Tome aqani sa sarini guana laione pa nana qoqoro,
meke saputu vagi sa saripu malamalaṉadi,
meke ta ṉoṉovala si arini koari nana tinavete sekesekeidi.
10 (Zade) Va kilasi sa si arini pa nana ṉiniraṉira,
meke naqoto goreni sa si arini pu loke dia tinokae.
11 Balabala ia sa sapu “Muliṉi nia Tamasa,” gua,
“Lopu doṉo mae au Tamasa, ke lopu dogorau Sa,” gua si asa.
12 (Qoph) Kei Zihova, qua Tamasa,
Mu mae va sarei pa Limamu sari na tie ta ṉoṉovaladi.
Mu lopu muliṉi ni Goi sari kinabo tadirini pu koa malaṉa.
13 Na venagua ke doṉo va karia sa tie va gugue sa Tamasa?
Meke zama golomo pa bulona, sapu “Lopu kaqu tubehau Sa,” gua?
14 (Resh) Ba ele dogori Mua Goi sari na tinasuna na tinasigiti gua hire,
meke kaqu tubehi Goi si arini.
Kalavarae koa Goi sari na tie ta ṉoṉovaladi,
sina Agoi mo sa tinokae tadi na tie eapa.
15 (Shin) Mu va beto pania Goi sa ṉiniraṉira tanisa tie kaleana.
Mu va kilasia Goi si asa koari nana tinavete kaleadi,
pude lopu kaqu tavete pulea sa si asa.
16 Zihova tugo si na Baṉara, ninae rane ka rane!
Sari na butubutu huporodi si kaqu tava mate palae koasa pepeso.
17 (Tav) Kei Zihova, avosi Goi sari na vinaravara tadi pu ta ṉoṉovala,
meke kaqu va ṉiṉirai Goi si arini.
18 Kaqu tavetia Goi sa Mua vina sare va toṉoto koari pu ta ṉoṉovala na eapa,
pude lopu kaqu tava matagutu pule si arini koari na tie pa pepeso.