10
Sari na Zinama Tumatumae te Solomone
1 Hire sari na zinama tumatumae te Solomone:
Na koreo gilaena si qetu nia sa tamana si asa;
ba sa koreo pekipekina si na tinalotaṉa tanisa tinana.
2 Na tinagotago ta hikodi si loke laedi,
ba sa tinoṉoto si kote harupigo pa minate.
3 Zihova si lopu kaqu va malumi sarini pu toṉoto pude ovia,
ba korona nia Sa sa inokoro tadi na tie kaleadi.
4 Na lima hakohakona si va kamo minalaṉa,
ba sa lima sapu ṉaliṉali pa tinavete si va tagotago tie.
5 Asa pu vagi ginani pa inuma pa totoso komiha si na koreo gilaena,
ba asa pu puta pa totoso pakepakete si na koreo variva kurekurena.
6 Na minana si toropae nia sa tie toṉoto,
ba sari tie kaleadi si na ṉoṉovala mo si zama ni rini.
7 Pude balabala pule la i sari tie toṉoto si na minana,
ba sari pozadi ari tie kaleadi si kote popozu taloa.
8 Sa tie sapu gilae pa bulona si va tabei sari na tinarae,
ba sa tie memeakala si pekipeki meke kote kamoa tinasuna.
9 Sa tie ṉoṉona si kote ene vata bulei si asa,
ba asa pu lulia sa siraṉa koqina si kote ta poho vura.
10 Asa pu putaputa kale mata si va gavoro tinalotaṉa,
ba asa pu tozia sa hinokara si okoro nia sa binule.
11 Sari na zinama tanisa tie toṉoto si na bukaha tanisa tinoa,
ba sari tie kaleadi si na ṉoṉovala mo si zama ni rini.
12 Na vinari kanai si va gevuru vinaripera,
ba sa tataru si taleoso ni sari doduru sinea.* Zem 5:20; 1 Pit 4:8
13 Sa ginilagilana lohina si ta dogoro koa ri na zinama tadi pu bakaladi,
ba sa kolu si pude sekea mudina sa tie sapu lopu gilae.
14 Sari tie gilagilana si hata ia sa tinumatumae,
ba sari na zinama tanisa tie duvili si hata tinasuna.
15 Na tinago si na ṉiha na varane pa totoso tinasuna tadi na tie tagotago,
ba na hinabahuala si ṉovaladi sari tie malaṉa.
16 Sa tinabara tadi tie toṉoto si na tinoa,
ba sa hinia tadi tie kaleadi si na vina kilasa.
17 Asa pu va taliṉa la ia sa tinarae si dogoria sa siraṉa la pa tinoa,
ba arini pu lopu hiva tava toṉoto si turaṉa va sea tie.
18 Asa pu tomea sa kinukiti si na tie kokoha,
meke asa pu zama va kaleana ia si keke tie si na tie duvili.
19 Pana soku sari zinama, si kamo mo sa kinaleana,
ba gilae sa tie pu kopu nia sa meana.
20 Sa meana sa tie toṉoto si guana siliva viana,
ba sa bulona sa tie kaleana si loke laena.
21 Sa beruna sa tie toṉoto si na minana koari soku tie,
ba sa tie duvili si loke nana binalabala leadi.
22 Sa minana te Zihova si va tagotago tie,
meke lopu va somana nia tinasuna Sa.
23 Na tie duvili mo si qetu ni sari na tinavete kaleadi,
ba sa tie sapu gilae si qetu nia sa ginilagilana lohina.
24 Sapu matagutu nia sa tie kaleana si kote raza nana mo koasa;
ba sapu okoro nia sa tie toṉoto si kote ta poni nia sa.
25 Totoso hola taloa sa raneboṉi, si taloa tugo sari tie kaleadi,
ba sari pu toṉoto dia si turu va nabu ninae rane.
26 Sa tie hakohakona koa rini pu garunia,
si guana sile pa livo meke tuṉaha pa mata tie.
27 Sa pinamaṉana e Zihova si va gele tinoa,
ba sari na tie kaleadi si tuturei mate.
28 Sa tie toṉoto si koa qetuqetu nana sina ronua sa sapu kote evaṉa,
ba sa inokoro tadi na tie kaleadi si lopu kaqu tava gorevura.
29 Koa bule sari na tie toṉoto pa siraṉa te Zihova,
ba sa siraṉa asa si na tinasuna koari na tie kaleadi.
30 Sari tie toṉoto si lopu kaqu ta rabutu palae,
ba sari tie kaleadi si lopu kaqu koa hola koasa popoa.
31 Na zinama tanisa tie toṉoto si vura ia ginilagilana lohina,
ba sa mea sapu zama va kaleana si kaqu ta magu palae.
32 Sari na beru tadi tie toṉoto si gilania sa si leana pude zama nia,
ba sari na tie kaleadi si tale zinama bonidi mo si zama ni rini.