1 Tatasana podalae baṉara se Zedekaea tuna koreo e Zosaea baṉara pa Ziuda, si kamo la koe Zeremaea sa zinama te Zihova:* 2 Baṉ 24:18-20; 2 Koron 36:1-13 2 Hiera gua si zama nia e Zihova koa rau: “Tavetia si keke ioki koari na aroso kapu kurukuru meke na huda pilivarata, mamu va hakea pa ruamu. 3 Beto asa mamu garunu la zinama koari na baṉara pa Edomu, Moabi, Amoni, Taea, meke pa Saedoni. Va palekeni koari na puku tie sapu ene mae pa Zerusalema koe Zedekaea sa baṉara pa Ziuda. 4 Poni sa inavoso tadi dia palabatu; mamu zama guahe: Hiera gua si zama nia e Zihova Tadi na Qeto Minate, sa Tamasa pa Izireli: ‘La tozia si hie koari mia palabatu: 5 Pa Qua ṉiniraṉira nomana meke pa Limaqu repahana si tavetia Rau sa popoa pepeso meke sari tiena meke sari na kurukuru ṉame pu koa vasina, meke Arau vala nia koa rini pu hiva vala nia Rau. 6 Ke kamahire si kote vala betoni Rau sari doduru mia popoa la koasa Qua nabulu se Nebukaneza sa baṉara pa Babiloni; ari na kurukuru pinomo ba kote la Rau meke va nabulu lani koasa. 7 Doduru butubutu si kote nabulu la koa sa, sa tuna, meke sapu podoa sa tuna, osolae kamo sa totoso sapu kaqu ta vagi sa nana pepeso; totoso asa kote soku butubutu na binaṉara kote va kilasia meke baṉara nia sa popoa Babiloni.

8 Ba be keke butubutu na binaṉara si korona nabulu la koe Nebukaneza sa baṉara pa Babiloni babe todoṉo nia ruana koasa ioki tanisa, si kote va kilasia Rau sa butubutu asa pa vedara, soṉe, na oza, zama vura gua si Arau Zihova, osolae va huara ia Rau pa limana Nebukaneza si asa, gua. 9 Ke mi lopu va avosi sari mia poropita, mia tie dodogorae, mia tie ililiri pinutagita, mia matemateana na tie sabusabukae pu zama guahe koa gamu, “Lopu kaqu nabulu la si gamu koasa baṉara pa Babiloni,” gua. 10 Na koha si korokorotae ni rini koa gamu; sa koha sapu kote ta turaṉa nia gamu meke la seu pa mia popoa; kote hadu pani gamu Rau meke la mate pa seu. 11 Ba be todoṉo nia ruana si keke butubutu pa kauruna sa ioki tanisa baṉara pa Babiloni meke nabulu la koasa si asa, si kote va malumu ia Rau pude koa pa nana popoa soti meke lelete vasina, zama vura gua si Arau Zihova.’ ”

12 Asa tugo sa inavoso vala nia rau koe Zedekaea sa baṉara pa Ziuda. Zama guahe si rau, “Va todoṉi ruamia pa kauru ioki tanisa baṉara pa Babiloni; mi nabulu la koa sa meke sari nana tinoni, meke kote toa si gamu. 13 Na vegua ke kaqu mate tu si gamu meke sari mia tinoni pa vedara, soṉe, meke pa oza sapu tozi vura ni e Zihova koari butubutu pu lopu hiva nabulu la koasa baṉara pa Babiloni? 14 Mi lopu avoso la i sari zinama tadi na poropita pu zama guahe koa gamu, ‘Mi lopu kote nabulu si gamu koasa baṉara pa Babiloni,’ gua, sina na koha si korokorotae atuni rini koa gamu. 15 ‘Arau lopu hite garuni si arini,’ zama vura gua se Zihova. ‘Na korokorotae kokoha si arini pa Pozaqu. Gua ke kote hadu taloani gamu Rau meke kote la mate si gamu, gamu meke sari poropita pu korokorotae kokoha atu koa gamu.’ ”

16 Beto si zamai rau sari hiama meke sari doduru tinoni, “Hiera gua si zama nia e Zihova: Lopu avosi sari poropita pu zama guahe, ‘Tata kote ta paleke pule mae gua mo pa Babiloni sari na likakalae tanisa vetu te Zihova,’ gua. Sari na koha mo si korokorotae atu ni rini. 17 Mi lopu va avoso la i si arini. Mamu koa nabulu la koasa baṉara pa Babiloni meke kote toa si gamu. Vegua ke kaqu ta huara tu sa vasileana lavata hie? 18 Be na poropita si arini meke tagoa rini sa zinama te Zihova, vekoi mani tepatepa la koe Zihova Tadi na Qeto Minate pude sari likakalae koa holadi koasa vetu te Zihova meke pa vetu baṉara tanisa baṉara pa Ziuda meke pa Zerusalema si lopu kaqu ta vagi taloa la pa Babiloni. 19 Ura hiera gua si zama nia e Zihova pa guguadi ri karua dedegere, sa besini boronizi, sari na tuturuana meke sari kaiqa likakalae saripu koa hola koasa vasileana lavata hie, 20 saripu lopu ta vagi taloa koe Nebukaneza sa baṉara pa Babiloni totoso raovo taloa nia sa se Zehoiakini sa tuna koreo e Zehoiakimi sa baṉara pa Ziuda meke la pa Babiloni turaṉae sari doduru ṉati palabatu pa Ziuda meke Zerusalema. 21 Uve, hiera gua si zama nia e Zihova Tadi na Qeto Minate, sa Tamasa pa Izireli pa guguadi sari na likakalae saripu koa hola pa vetu te Zihova meke vetu baṉara tanisa baṉara pa Ziuda meke Zerusalema: 22 ‘Kote ta vagi taloa si arini pa Babiloni meke vasina si kote koa si arini osolae kamo sa rane sapu kote mae hata puleni Rau. Meke kote paleke pule mae ni Rau meke veko pule ni koasa vasina hie,’ zama vura gua se Zihova.”