20
Se Zeremaea meke se Pasahuru sa Hiama
1 Avoso ni e Pasahuru gua sapu tozi e Zeremaea. Asa si na hiama meke na ṉati palabatu pa Zelepade, meke sa tamana si e Ima. 2 Vagia sa se Zeremaea sa poropita meke komitia sa meke pusi sa sari nene na limana koari na lolomo pa labelabete tata koasa Sasada Panaulu tanisa butubutu Benisimane pa Zelepade te Zihova. 3 Pa koivugona sipu rupahia e Pasahuru koasa labete, si zama ia e Zeremaea si asa, “Sa pozapoza sapu poza nigo e Zihova si lopu e Pasahuru ba e Koa Holoqoru. 4 Ura hiera gua si zama nia e Zihova: ‘Koa goi si kote vura mae sapu variva holoqoru, koa goi telemu meke koari doduru mua baere; pa matamu telemu kote dogori goi pana mate si arini pa vedara tadi dia kana. Kote vala nia Rau sa doduruna sa popoa Ziuda la koasa baṉara pa Babiloni. Asa kote raovo taloa betoni gamu la pa Babiloni babe va mate gamu pa vedara. 5 Kote va karovo lani Rau koari dia kana sari doduru tinagotago tanisa vasileana lavata hie, doduru pu vagi ri na tie pa tinavete, doduru nana likakalae arilaedi meke doduru qolo na siliva na patu arilaedi tadi na baṉara pa Ziuda. Kote vagi taloa ni rini guana vinagi pa vinaripera meke paleke lani pa Babiloni. 6 Ba sapu agoi Pasahuru, meke doduru pu koa pa mua vetu si kote ta raovo la pa Babiloni. Vasina kote mate si agoi meke ta pomunae, agoi meke sari doduru mua baere sapu koarini hoke korokorotae kokoha si agoi.’ ”
Qumiqumi se Zeremaea
7 Zihova, na sekesekei nau Goi, meke ta turaṉa va sea qua;
Agoi ṉiṉira hola nau meke luli nau Mua hiniva.
Va sisire nau rini doduru rane;
meke hegere nau ri doduru tie.
8 Pana zama vura gua, si velavela tu si arau,
korokorotae ni rau sari na vinaripera na tinahuara.
Ke sa zinama Tamugoi Zihova si va kamo nau
na ṉinovaṉovala na kinurekure doduruna sa rane.
9 Ba pana zama guahe si rau, “Maqu lopu poza ia si Asa,
babe lopu zama pule pa Pozana,” gua,
si ṉada guana nika sa zinama Tanisa pa korapa buloqu,
na nika sapu ta tuku tamunu pa susuriqu.
Mabo nia rau sa tuqe pulena;
na hinokara lopu boka si arau.
10 Na manamanasa si avosia rau
“Variva holoqoru sa doduru vari kalina!
Mada la hakehakei nia si asa!”
Doduru qua baere si korapa aqa pude zama va sea hola si rau, meke zama guahe si arini,
“Gina boka ta sekesekei mo si asa;
meke kote va kilasia mo gita
meke kote tubehe hobeda,” gua.
11 Ba e Zihova koa turaṉau si rau, guana keke tie varane ṉiṉirana hola;
ke sarini pu hiva va mate au si kote tubarae ni meke kote lopu boka va kilasau rini.
Kote lopu boka si arini meke kote doṉo hikare;
sa dia kinurekure si lopu kote ta muliṉae.
12 Zihova Tadi na Qeto Minate, Agoi pu viliti sarini pu tavete va toṉoto
meke podekia sa bulo meke sa maqomaqo tie.
Maqu dogoria vea kote va kilasa gunini Goi,
ura koa Goi mo si veko atu nia rau sa qua ginugua.
13 Mi kera la koe Zihova!
Vala nia sa vinahesi koe Zihova!
Asa harupi sari tinoa tadi pu loke gedi
koari limadi ri tie kaleadi.
14 Mani ta levei sa rane sapu podo si arau!* Zob 3:1-19
Mani lopu tamanae sa rane sapu podo au sa tinaqu!
15 Mani ta levei sa tie pu paleke la nia koasa tamaqu sa inavoso,
pu va qetu ia si asa, totoso zama guahe,
“Keke koburu tamugoi si ele podo, na koreo!” gua.
16 Sa tie asa si mani koa gua rina vasileana
sapu lopu tataruni e Zihova meke va kilasi.
Mani avoso kabo si asa pana munumunu,
na kukili varipera pa korapa rane.
17 Ura na lopu va mate au Sa si arau pa tiana sa tinaqu,
pude sa tinaqu si guana qua lovu,
sa tiana si koa molu eko lamo.
18 Na vegua ke vura tu pa tiana sa tinaqu si arau
meke dogori sari tinasuna na tinalotaṉa
meke va hokoti sari na qua rane pa kinurekure?