6
Vari Likohae nia rina Kana sa Popoa Zerusalema
1 Zama vura pule se Zihova, “Govete pude ta harupu mia, gamu na tinoni pa Benisimane!
Mi govete luaria sa popoa Zerusalema!
Mi ivua sa buki pa Tekoa!
Mi ovulu sagea sa vina gilagila pa Beti Hakeremi!
Ura mae gua pa kali gede sa tinasuna,
na tinahuara nomana hola.
2 Kaqu huara pania Rau sa vasileana pa Zaione,
sa popoa Zerusalema leleana.
3 Ari na baṉara tadi na kana si kote mae pude razaia sa popoa
kote va turu ipi pa vari likohaena sa gua ri na sepati pu koa turaṉi sari rovana sipi,
hopeke koa pa hopeke dia vasidi ta vizatadi.”
4 “Kote zama si arini, ‘Va namanama pude rapatia si pa Zerusalema!
Gasa turu, mada rapata pa kali korapa rane!
Ba vea, sa rane si tata hola nana mo,
meke kote huporo nana mo sa popoa.
5 Ke gasa turu, mada rapata pana boṉi
mada huari sari vasidi ta gobadi na ṉiṉiradi tanisa!’ kote zama gua.”
6 Hiera gua si zama pule nia e Zihova Tadi na Qeto Minate:
“Maho goreni sari na huda
meke tomotomo lania sa pepeso pa kali goba pude haele nuquru pa korapana Zerusalema.
Sa vasileana lavata hie si kaqu tava kilasa;
ura na siṉia na hahanana ṉoṉovala tie.
7 Gua sa berukehe sapu zoropo vura nia sa nana kolo,
si zoropo vura nia Zerusalema sa nana kinaleana.
Varipera meke huhuara si ta avoso lamo pa korapana sa;
sari nana minoho meke binakora si koa eko mo pa kenuqu Rau.
8 Zerusalema, mu balau si agoi,
be lopu gua si kote taliri taloa Qua si Arau
meke iliri nia na qega sa mua pepeso
pude loke tie kote koa ia.”
Va Karikari sari pa Izireli
9 Hiera gua si zama nia e Zihova Tadi na Qeto Minate:
“Madi ta vagi beto taloa sari na tie Izireli,
gua sa inuma vaeni sapu ta vagi beto sari qurepi.
Ke mu la harupi si arini pu boka ta vagi sipu korapa koa nana sa totoso.”
10 Koe sei si boka zama la arau pude vala nia sa vina balau?
Esei si kote va avoso pana zama si arau?
Na taliṉa dia si tuku
ke lopu boka avavosae.
Doṉo va gorea rini sa zinama te Tamasa;
lopu qetu sisigiti nia rini.
11 Ba arau si siṉi au na tinaṉaziri te Zihova,
meke lopu boka kopu eko nia arau pa korapaqu.
Zama pule se Zihova, “Mu zoropo vura la nia koari na koburu pa siraṉa
meke koari na vinarigara tie vaqura;
ari na palabatu meke loadia ba kote ta saputu vagi koa sa,
meke ari barogoso pu sokuni na vuaheni ba kaqu somana tugo.
12 Dia vetu si kote ta poni la koari votiki tie,
turaṉae dia inuma meke dia barikaleqe,
pana repaha vura nia Arau sa Limaqu
koarini pu koa koasa popoa,”
zama vura gua se Zihova.* Zer 8:10-12
13 Zama pule si Asa, “Podalae koa rina tie hitekedi kamo koari tie nomadi,
si okoro sisigiti nia pude vagi poata;
ari poropita meke hiama ba kekeṉoṉo mo,
doduru si sekesekei na kokoha.
14 Sari bakora tadi Qua tinoni si ta salaṉa hake ulue i mo rini,
lopu va noma nia binalabala rini.
‘Bule, bule,’ gua si arini
totoso loke binule si koa.* Izk 13:10
15 Vea kurekure tugo si arini koari na dia hahanana variva malederedi?
Namu lokari, loke dia kinurekure hokara;
lopu tumae nia tugo rini sa kurekure.
Ke kote madi eko turaṉi sarini pu mate pa vinaripera;
kote mate pana va kilasi Arau si arini,”
gua se Zihova.
Kilua Izireli sa Siraṉa te Tamasa
16 Hiera gua si zama nia e Zihova:
“Mi turu pa vari pazana sa siraṉa mamu doṉo lamae;
nanasa ni sari siraṉa koadi,
nanasa nia sa siraṉa sapu leana, mi ene vasina,
meke kote vagia gamu sa minagogoso pa maqomaqo mia.
Ba zama si gamu, ‘Lopu kote enea gami sa siraṉa asa.’
17 Veko tie si Arau pude kopuni gamu meke zama,
‘Va avosia sa mamalaiṉi tanisa buki!’ gua.
Ba zama si gamu, ‘Lopu kote va avoso si gami.’
18 Gua ke va avoso, gamu na butubutu;
doṉo viliti, gamu tie va sosode,
sa si kote ta evaṉa koari kasa.
19 Agoi popoa pepeso, mu va avoso mae!
Na vina kilasa si korapa va kamo ni Rau sari Qua tinoni,
na vuana sa dia hahanana kaleadi,
sina korodia avosi sari Qua zinama
meke kilua rini sa Qua tinarae.
20 Na pude sa koa Rau sa oto huda humaṉa lea pa Siba
babe sa oela humaṉa lea koari pa popoa seu?
Sari mia vinukivukihi va uququ si lopu qetuni Rau;
sari kurukuru ṉame pu va vukivukihi mae ni gamu si humaṉa hikare koa Rau.”
21 Gua ke hiera gua si zama nia e Zihova:
“Kote va tubarae i Rau sari tinoni hire pa dia inene,
sari koburu meke tiatamadia si kote hoqani;
sari turaṉa dia meke dia baere si kote mate varigara.”
Na Rinapata Mae Gua pa Kali Gede
22 Hiera gua si zama nia e Zihova:
“Dotu, na qeto minate si korapa mae,
mae gua pa popoa pa kali gede* Kali gede be tia la pa kali gasa rimata.;
na butubutu nomana si korapa tava gevuru sage,
mae gua koari na popoa seudi pa kasia popoa.
23 Na paleke bokala na hopere si arini;
na tie kaleadi meke loke dia tataru.
Vevehe gua ri na ovaṉadi rina kolo lamana,
meke sa puzakadi rina tovovo,
totoso koi rini pa dia hose;
mae pa tokele tie varipera si arini
pude rapatia sa popoa Zerusalema,” gua se Zihova.
24 Gamu si kote zama, “Ele avoso ni gami sari vivineidi,
meke isu hoboro mo sari limamami.
Kamo va hodaka gami na sigiti,
sigiti gua na barikaleqe podopodona,” gua.
25 Mi lopu vura la koari na inuma
babe ene koari na siraṉa,
ura sa kana si ari nana vedara,
meke variva matagutu sari doduru vari kali popoa.
26 Gamu na qua tinoni, mi va sagei sari poko baika
mamu la topili pa eba;
mamu taruqoqo meke uui va ululae
gua sapu na koburu koreo titekena tu si mate,
ura sa tie huhuara si kote hodahodaka
sa kamona koa gita.
27 Zama pule koa rau se Zihova, “Zeremaea, Arau veko igo pude podeki sari Qua tinoni,
gua sapu podekia ri na tie sa aeana pa nika pude va via ia.
Meke agoi kote viliti sari Qua tinoni
meke podeki sapu vegua sari.
28 Doduru arini si na tie nabudi pa vina karikari,
ene la mae pude zama ṉoṉovali sari tie.
Na boronizi meke na aeana si arini;
na tie kaleanadi beto si arini.
29 Sa nika pude va kolo siliva si huruṉu va kaleana,
pude va via ia sa siliva, meke paqahia sa boni koasa siliva,
ba sa nika si lopu boka va via ia,
ke lopu leana pude nono la sa vina via.
Sari na tie kaleadi si lopu boka ta vagi palae pa Zerusalema.
30 Arini si ta pozae na siliva ta kiludi,
sina e Zihova ele kilu i si arini.”