62
Pozapoza Vaqura te Zaione
1 Pa laena Zerusalema si lopu kote koa noso lopu zama si rau,
osolae sa nana tinoṉoto si bakala vura guana vaqavaqasa,
meke sa nana hinarupu si guana zuke halalana.
2 Sari butubutu kote dogoria sa mua tinoṉoto,
meke doduru baṉara kote dogoria sa mua tinolava;
kote ta pozae pa keke pozapoza vaqura si agoi
sapu sa ṉuzuna e Zihova kote tozia.
3 Agoi si kote na toropae leleana pa Limana e Zihova,
na toropae baṉara pa Limana sa mua Tamasa.
4 Lopu kote ta pozae pule “Ta Veko Palaemu” si agoi,
babe poza nigo “Ivulumu”.
Ba kote ta pozae “Hepiziba”* Sa ginuana Hepiziba si “Qetu hola nia Rau si asa.” si agoi,
meke sa mua popoa si kote e “Biula”* Sa ginuana Biula si, “Vari haba si asa.”;
ura e Zihova kote qetu nigo si agoi,
meke sa mua popoa si kote ta pozae Varihabana.
5 Gua sa koreo vaqura sapu haba ia si keke vineki vaqurana,
kote gua haba gunigo ri tumu koreo si agoi;
gua sa koreo sapu qetu nia sa vineki kote haba ia sa,
si kote qetu hola nigo tugo sa Tamasa si agoi.
6 Zerusalema, Arau si ele va turu veko tie kopu koari na mua goba vasileana;
lopu kaqu koa kae kulu si arini boṉi na rane.
Agoi pu tepatepa la koe Zihova si mu lopu makudo pude lopu muliṉi ni Sa sari Nana vina tatara.
7 Lopu va magogoso ia osolae kuri ia Sa sa popoa Zerusalema,
osolae na vinahesi si asa tadi pa popoa pepeso.
8 Se Zihova si ele va tatara pa Nana ṉiniraṉira
meke koasa Lima hehedana Tanisa, la koe Zerusalema:
“Lopu kote poni pule nigo huiti Rau
pude na ginani tadi na mua kana,
meke sari tie karovodi si lopu kaqu napo pule ia rini sa vaeni vaqurana
sapu agoi tavetavete nia;
9 ba arini pu paketia kote hena ia
meke vahesia rini se Zihova,
meke arini pu varigara ni sari qurepi kote napo ia sa vaeni
koari na vasina varivarigarana koasa Qua Zelepade.”
10 Mi ene vura mia, vura gua koari na sasada!
Va nama ia sa siraṉa tadi na tinoni.
Kuri va sagea, kuri va sage ia sa siraṉa vari karovae popoa!
Va rizu pani sari na patu.
Ovulu va sage ia sa pitipiti pude dogoria ri na butubutu.
11 E Zihova ele zama vura nia si hie
kamo la pa vina betona sa popoa pepeso:
“Zama la koasa Vasileana Zaione,
‘Doṉo la, sa mua Hinarupu si mae sana!
Doṉo la, sa Nana pinia si koa koa Sa,
meke somana luli koa Sa sari Nana tinoni pu harupi Sa.’ ”* Ais 40:10; Rev 22:12
12 Kote ta pozae na Tinoni Hopedi si arini,
sari na Tie Ta Harupudi te Zihova;
meke agoi Zerusalema si kote ta pozae “Ta Hatamu”,
sa “Vasileana Beto Ta Kiluna”.