5
Sa Kinerana sa Inuma Vaeni
1 Maqu kera ponia si asa pu tataru nia rau,* Mt 21:33; Mk 12:1; Lk 20:9
na kerana sa nana inuma vaeni:
Asa pu tataru nia rau si tagoa si keke nana inuma vaeni pa keke kali toqere masuruna.
2 Gelia sa sa pepeso meke okipani sa sari patu,
meke letei sa sari vaeni ta vizatadi.
Kuria sa si keke vetu hakehakei ululuna pa korapana
meke tavetia sa sa patu munamunala vaeni.
Beto si aqa ni sari qurepi d pude sagana,
ba sari doduru qurepi si pasa beto.
3 Ke zama sa qua baere, “Kamahire gamu pu koa pa Zerusalema meke pa Ziuda,
mi varipitui ni gami, sa Qua inuma vaeni meke Arau.
4 Sa beka si lopu tavete ponia Rau sa Qua inuma vaeni?
Na doduru si ele tavete ponia mo Rau.
Ba totoso hata qurepi leanadi Rau,
si na vea ke poni Au qurepi kaleanadi tu sa?
5 Ke Maqu tozini gamu
sapu kote tavetia Rau koasa Qua inuma vaeni:
kote vagi pania Rau sa bara pa vari likohaena sa,
pude mani ta ṉovala palae;
meke kote huara pani Rau sari gobana sa,
pude mae sari kurukuru meke neti va gore pania.
6 Kote va emata pania Rau si asa,
lopu kaqu va tana pulei Rau sari na vaeni babe geli pulea sa pepeso;
ba na hiqohiqo rakihi si kote toqolo vasina.
Meke kote tozini Rau sari na lei
pude lopu kaqu va hoqa nia ruku.”
7 Sa inuma vaeni te Zihova Tadi na Qeto Minate,
asa sa butubutu Izireli
meke sari tiena sa popoa Ziuda,
arini sa inuma sapu qetuqetu nia Sa.
Ke na vinilasa toṉotona si doṉo hata ia Sa, ba na ehara tu si dogoria Sa;
hata tinoṉoto gua, ba na kabodi ri na tie sigitidi mo si avosi Sa.
Sa Kinaleana Tavetia ri na Tie
8 Mi talotaṉa gemi si gamu pu holu va sokua sa vetu
meke vari hoda lamo sa vinagi pepeso,
osolae loke lolomo si koa
meke telemia mo si koa pa pepeso.
9 Zihova Tadi na Qeto Minate si zama vura nia meke avosia rau sapu guahe:
“Hinokara sapu sari vetu nomadi si kote kokoba,
sari vetu leleadi si kote loke tie koai.
10 Sa inuma vaeni sapu pa pepeso manege puta eka nomana si kote vesu lita vaeni mo va vura ia.
Ka manege puta tela kiko huiti si kote va vura keke tela vua kiko huiti mo.”
11 Mi talotaṉa gamu pu tekulu vaqavaqasa
pude hata vaeni meke naponapo
pu koa kamo korapa boṉi
osolae va viviri i na vaeni.
12 Tago mike, na likakalae kerakera si arini tana totoso pa dia inevaṉa,
na tabarini, ivivu, meke na vaeni,
ba loke dia binalabala la koari na vina tana te Zihova,
loke pinamaṉa koari Nana tinavete.
13 Gua ke sari na Qua tinoni si kaqu ta raovo vagi la pa votiki popoa,
sina lopu tumae Nau rini;
sari dia ṉiha si kote mate pa inovia
meke sari na tie hoborodi si kote mate pa memeha.
14 Gua ke sa lovu si kote ena hiva gani hola,
meke kote va ṉaṉara va labea sa sa ṉuzuna;
vasina kote gore beto la sari hiteke na lavata
meke saripu viviri na ṉoveorodi tugo.
15 Ke sari tie si kote tava kurekure
meke sari na tinoni si kote tava pepekae,
meke sari matadi ri pu vahesi pule ni si kote tava kurekure.
16 Ba e Zihova Tadi na Qeto Minate si kaqu tava lavata koasa Nana vinilasa toṉotona,
meke sa Tamasa Hopena si kote va bakalia sa Nana minadi koasa Nana tinoṉoto.
17 Sari na sipi si kote ganigani pa dia pepeso duduli;
meke sari na lami si kote deṉa koari na vasidi ta huaradi tadi na tie tagotago.
18 Madi talotaṉa si arini pu ririhia sa dia sinea koari na iku kokoha,
sari kinaleana koari na aroso nomadi.
19 Madi talotaṉa sarini pu zama, “Va bebeno ia sa Tamasa,
va tuturei ia sa Nana tinavete pude mada dogoria.
Va kamo mae ia,
va kamo mae ia sa hiniva tanisa Tamasa Hopena pa Izireli,
pude mada tumae nia.”
20 Madi talotaṉa sarini pu poza nia leana sapu kaleana
meke va kaleana ia sapu leana,
sarini pu va huporo ia sapu kalalasa
meke va kalalasa ia sapu huporo,
sarini pu va lomoso ia sapu pasa
meke va pasa ia sapu lomoso.
21 Madi talotaṉa sarini pu gilae pa matadia teledia
meke tumatumae gua pa dia binalabala teledia.
22 Madi talotaṉa sarini pu varane pa napo vaeni
meke bokaboka hola pa heni napo ṉiṉiradi,
23 sarini pu vagi tinabara golomo meke rupahi sari pu sea,
meke korodia poni tinoṉoto sari pu hinokaradi.
24 Ke gua sapu gani na nika sari rerequtu popadi
meke sari duduli popadi si ta onolo toa pa nika,
si kaqu gugua rina huda sapu popozu karosodi si arini,
meke ta givusu taloa havorodi guana kavuru;
sina ele kilua rini sa tinarae te Zihova Tadi na Qeto Minate,
meke korodia nia rini sa zinama tanisa Tamasa Hopena pa Izireli.
25 Gua ke sa tinaṉaziri te Zihova la koari Nana tinoni si halala;
sa Limana si ovulu sage meke nama pude seke goreni.
Sari toqere si niu,
meke sari tini tie matedi si guana remoremo pa sisiraṉa.
Gua ba sa tinaṉaziri te Zihova si lopu rizu taloa,
sa Limana si ovulu sage eko mo, nama pude seke.
26 Ovulu sage nia Sa sa pitipiti varipera pude titioko va mae i sari na popoa pa seu,
meke hiovo la i Sa sarini pa vina betona sa popoa pepeso.
Ke taluarae mae gedi hire,
rerege meke tuturei hola!
27 Lopu keke arini si mabo babe ta tubarae,
lopu keke si rodoko babe puta;
lopu keke iku sapu dokoho nia pa kopete si lozoko,
lopu keke aroso sadolo si kumata.
28 Sari dia tupi si ṉaru,
meke sari dia bokala si nama pude gona;
sari ola nenedi ri dia hose si ṉiṉira guana patu,
meke sari totopilidi ri na dia totopili varipera si viloro gua na vivirua.
29 Kurumu guana laione si arini,
guana kurumu tadi na laione vaquradi;
kurumu si arini totoso va matea rini si keke kurukuru
meke paleke taloa nia, ura loke tie kote harupia.
30 Koasa rane asa si kote kurumu nia rini sa dia boso,
guana ovaṉana sa lamana.
Meke be doṉo karovo la pa Izireli sari tie,
kote dogoria rini sa huporo meke tinasuna;
sa kalalasa ba kote opo adumia na lei huporona.