1 Duviduvili si gamu pa Qalesia! Esei va duviduvili gamu si gamu? Nake ele tava bakala valeana mo koa gamu guguana sa minate te Zisu pa korosi! 2 Ego, tozi nau si hie! Vea, pa vina tabena sa Tinarae te Mosese si vagi nia gamu sa Maqomaqo Hope? Babe pa vina hinokarana sa Inavoso Leana? 3 Na vegua ke duvili tu si gamu? Ele podalae ni tu gamu sari na mia tinoa koasa Maqomaqona sa Tamasa; ba vea, kamahire si hiva va hokoti tu gamu sari mia inene pa mia ṉiniraṉira soti? 4 Ke gua sapu sari doduru tinasuna, saripu ele raza atu koa gamu koasa linulina sa Inavoso Leana, si loke laedi mo? Lokari na arilaedi si arini koa gamu! 5 Vegua, pa vina tabena sa Tinarae te Mosese si ponini gamu Tamasa sa Maqomaqo Hope, meke evaṉi Sa sari na tinavete variva magasadi koa gamu? Ba pa mia inavosona, na vina hinokarana mo sa Inavoso leana?

6 Mi balabala ia se Ebarahami, gua sapu tozia sa Kinubekubere Hope: “Raṉea sa sa Tamasa, ke koa gua koasa nana rinaṉeraṉe, si poza nia tie toṉoto Tamasa si asa.”* Zen 15:6; Rom 4:3 7 Pada gilania mo gamu, sapu sarini pu raṉea sa Tamasa, si arini sari na tutina hinokara e Ebarahami.* Rom 4:16 8 Sa Kinubekubere Hope si ele koroto nia tu sapu kote va toṉoti Tamasa sari na tie Zenitailo pa korapa dia rinaṉeraṉe koa Sa. Ke ele tozi va kenue ia tu sa Kinubekubere Hope sa Inavoso Leana koe Ebarahami sapu guahe: “Koa goi si kote tamanae sari doduru butubutu tie pa kasia popoa,” gua.* Zen 12:3 9 Raṉeraṉe se Ebarahami ke tamanae; ke sari doduru pu raṉea sa Tamasa, si kaqu tamanae.

10 Arini pu kalavarae koasa vinatabena sa Tinarae te Mosese, si koa pa korapa tinalevei. Ura zama sa Kinubekubere Hope: “Asa sapu lopu va tabei doduru totoso sari doduru sapu gua ta kubere koa sa buka Tinarae, si koa pa tinalevei te Tamasa si asa!” gua.* Diut 27:26 11 Ego, bakala mo sapu loke tie si tava toṉoto koasa Tinarae te Mosese, sina tie sea beto si gita doduru, ba zama sa Kinubekubere Hope: “Sa tie sapu tava toṉoto koe Tamasa pa rinaṉeraṉe si kaqu toa,” gua.* Hbk 2:4 12 Ba sa Tinarae te Mosese si lopu koa gua koasa rinaṉeraṉe, ba pa tinavete mo. Ura guahe sapu ta zamae pa Kinubekubere Hope: “Asa sapu taveti sari doduru hiniva tanisa Tinarae si kaqu toa,” gua.* Liv 18:5

13 E Karisito si ele mae harupu gita koari na tinaleveida koasa Tinarae te Mosese. Ura vagia Sa sa tinalevei sipu mate hobe gita Sa. Ura guahe si ta zamae pa Kinubekubere Hope: “Ta levei tugo koe Tamasa si asa sapu tava sigoto, meke mate koa keke huda,” gua.* Diut 21:23 14 Evaṉia Karisito si hie, pude gua sapu va tatara nia Tamasa koe Ebarahami, si kaqu ta poni koari na tie Zenitailo pa korapana e Zisu Karisito. Pude pa korapa rinaṉeraṉe si boka vagia gita sa Maqomaqo Hope, sapu ele va tatara nia sa Tamasa.

15 Kasa tasiqu, keke ginugua sapu hoke ta evaṉa si va bakalia sapu korapa gunia rau he: Be karua tie si variva ego nia si keke tiṉitoṉa, meke kubere pozadia koasa dia vinariva egoi asa, si loke tie kote boka huaria, babe tomo la ni kaiqa toṉa pule koasa vinariva egoi asa. 16 Ego, ele ponia Tamasa sa Nana vina tatara koe Ebarahami, meke koa sa tutina. Sa Kinubekubere Hope si lopu zama “koari na tutimu” ba “koa sa tutimu” gua mo. Kekeke tie mo si gunia sa, sapu e Karisito mo.* Zen 12:7 17 Sapu gunia rau si guahe: Ele tavetia Tamasa sa Nana vinariva egoi koe Ebarahami, meke ele va tatara nia Sa sapu kaqu va gorevura ia Sa sa vinariva egoi asa. Sa Tinarae te Mosese pu poni Tamasa, sapu hola made gogoto toloṉavulu vuaheni pa mudina Ebarahami, si lopu boka huaria sa vina tatara te Tamasa, meke sa vinariva egoi asa.* Ekd 12:40 18 Ura be sa minana te Tamasa si mae gua koa sa Tinarae te Mosese, si lopu kaqu mae gua koasa vina tatara si asa. Ba sa Nana minana sapu ponia Sa koe Ebarahami, si mae gua tu koasa Nana vina tatara.* Rom 4:14

19 Ke sa ṉati tinarae tanisa Tinarae te Mosese si hie mo: Ta poni tomo mae si asa pude vata dogoro vura nia sa kinaleana, meke tava turu paki mo si asa, osolae mae kamo sa tutina e Ebarahami, sapu e Karisito, sapu tava tatarana. Sa Tinarae te Mosese si ta vala koari na mateana, meke ta poni koe Mosese sa tie varikarovae sapu va kamoa koari na tie. 20 Ba sa tie varikarovae si lopu ta hivae, be keke mo sa tie pu tavetia sa vina tatara, sapu e Tamasa mo.

21 Pude gua asa, si vegua? Sa Tinarae te Mosese si kana koasa vina tatara? Lokari hokara! Be ele vagia rina tie si keke tinarae sapu boka poni sa tinoa, si kote boka tava toṉoto mo si arini koe Tamasa pa vina tabena mo sa tinarae asa. 22 Ba zama sa Kinubekubere Hope, sapu sari doduru tie pa kasia popoa si ta pusi mo pa ṉiniraṉira tanisa sinea, gua asa ke sa vinariponi sapu tava tatarana pa korapa rinaṉeraṉe koe Zisu Karisito, si ta poni koarini pu va hinokara.* 3:2,8,9

23 Ba sipu lopu ele kamo sa totoso tana rinaṉeraṉe koe Karisito, si ta pusi si gita koasa Tinarae te Mosese, osolae mae kamo sa totoso tanisa rinaṉeraṉe koe Karisito. 24 Ke gua asa, si ta kopue si gita koa sa Tinarae te Mosese, osolae mae kamo se Karisito, pude boka tava toṉoto si gita koe Tamasa pa korapa rinaṉeraṉe. 25 Ego, kamahire si ele kamo sa totoso tanisa rinaṉeraṉe koe Karisito, ke lopu ta kopue si gita koa sa Tinarae te Mosese.

26 Ke pa korapa rinaṉeraṉe mo koe Zisu Karisito, si na tuna Tamasa si gamu doduru. 27 Ele ta papitaiso si gamu koasa mia kineke koe Karisito, meke ele vagia tugo gamu sa tinoa soti Tanisa. 28 Ke gua asa, si loke vinotikaena pa varikorapadi rina tie Ziu, meke na tie Zenitailo; na pinausu ba be lopu na pinausu, na palabatu meke na barikaleqe; ba keke mo si gamu doduru koasa mia kineke koe Zisu Karisito. 29 Be na tie te Karisito si gamu, si na tutina e Ebarahami si gamu, meke kaqu somana tagoa gamu sapu gua ele va tatara nia sa Tamasa.* Rom 4:13