Buka Hope Ekeleziasiti 2

1 Balabala si arau, “Ego, maqu podekia sa qinetuqetu pa kasia popoa pude tumae nia nasa si leana koasa.” Ba va sosodea rau sapu asa ba loke laena tugo. 2 Meke zama si rau, “Hegehegere si na pinekipeki. Ke nasa si ta vagi koasa qinetuqetu pa kasia popoa?” 3 Podekia rau pude qetuqetu pa kali napo vaeni, ke va kapae ia rau sa pinekipeki, ba sa qua binalabala si korapa ta turaṉa koasa ginilagilana. Hiva hata vagia rau nasa si leana koari na tie pude tavetia pa kauruna sa maṉauru koari na visavisa rane pa dia tinoa.

4 Va tupiti pule nau koari na tinavete nomadi. Taveti rau sari qua vetu meke sari na inuma vaeni nomadi.* 5 Tavete inuma meke na linetelete huda si rau, na kobi votivotiki huda vuvua si lete i rau. 6 Taveti rau si kaiqa kopi pude poni kolo sari na kobi hudahuda. 7 Holu va soku pinausu si rau meke koadia sari pinausu sapu pododi pa qua vetu. Tagoi rau sari bulumakao na sipi sapu soku hola, hola ni tadi doduru baṉara pukerane pa Zerusalema.* 8 Va omunu vekoi rau sari siliva na qolo, meke vagi si rau koari na baṉara pa votiki butubutu na popoa. Vagi tie kerakera si rau, koreo na vineki, meke soku qua barikaleqe pinausu leleadi gua sapu hoke qetu ni ri na hiniva tadi tie.* 9 Meke noma hola tu sa laequ hola ni doduru pu ele koadi pa Zerusalema pukerane. Ba doduru totoso si koa turaṉau mo sa qua ginilagilana lohina.*

10 Lopu hukata pule nau si rau koari doduru pu okoro ni sa mataqu.

Lopu koroqu ni rau sari na hahanana qinetuqetu.

Qetu beto ni rau sari doduru qua tinavete,

meke asa sa qua pinia koari doduru qua ṉinataṉata.

11 Gua, ba totoso viliti rau sari doduru pu taveti sari limaqu

meke saripu voriti ni rau pude va evaṉi,

si doduru si loke laedi beto mo, na hadu luli givusu mo;

loketoṉa si gavoria rau pa kauruna sa rimata.

12 Meke podalae vilitia rau sa ginilagilana,

meke gua tugo sa dinuviduvili meke sa pinekipeki.

Ura sa si boka tavetia sa tuna sa baṉara?

Loketoṉa ba arini mo sapu ele taveti ari na baṉara pa kenuna.

13 Dogoria rau sapu sa ginilagilana si leana hola nia sa pinekipeki,

gua sapu leana hola nia kalalasa sa huporo.

14 Sa tie gilagilana si koa ia mata batuna,

ba sa tie pekipeki si ene pa huporo;

ba vagia rau sa binalabala

sapu kamo beto mo pa keke ginugua sari karua.

15 Meke balabala pa buloqu si rau,

“Sa ginugua sapu kamo koari tie pekipeki si kote kamo la ia tugo rau.

Ke sa si va gavoria rau koasa qua ginilae?”

Zama si rau pa buloqu,

“Hie ba loketoṉa tugo laena.”

16 Ura sari tie gilagilana si kote gua mo ari tie pekipekidi,

sapu loke tie kote balabala va nonoga vekoi;

koari na rane pu korapa mae si kote ta muliṉae beto mo sari karua.

Sa tie gilagilana ba kaqu mate gua tugo sa tie pekipeki!

17 Ke hakohako hola nia rau sa tinoa, sina sa tinavete pa kauruna sa rimata si kamo la mo pa tinasuna. Dodurudi si loketoṉa laedi, na hadu luli givusu mo.

18 Kamo sapu hakohako ni mo rau sari doduru ginugua sapu tavetaveti rau pa kauruna sa rimata, sina kote veko hola lani mo rau koa sa pu luli mudi mae koa rau.

19 Meke kote vea beka, kote tie gilaena sia ba na pekipekina? Gua, ba kote asa na kopu ni sari doduru pu tavetaveti na va evaṉi rau pa qua binokaboka pa kauruna sa rimata. Hie tugo ba loke laena.

20 Ke podalae balabala mamata ni arau sari doduru qua tinavete sapu ṉataṉata ni arau pa kauruna sa rimata.

21 Ura sa tie si kote tavetavete pa nana ginilagilana, tinumatumae, meke binokaboka, meke kote luara beto lani sa koasa pu lopu hite ṉataṉata ni. Hie tugo si loketoṉa laena meke na tinasuna nomana.

22 Na sa si vagia sa tie koari doduru nana minabo, meke balabala mamata ni sapu taveti sa pa kauruna sa rimata?

23 Doduruna sa nana tinoa si ta sigiti meke voriti hola si asa koari nana tinavete; pana boṉi ba lopu magogoso sa nana binalabala. Hie ba loketoṉa laena tugo.*

24 Loketoṉa si boka tavete valeania sa tie, ba na hena meke napo meke qetuni mo sari nana tinavete. Ba hie dogoria rau si maena pa limana sa Tamasa,* 25 ura pude lopu tavetavete pude va qetua si Asa, si esei si boka hena na napo meke qetuqetu?

26 Asa pu va qetuna, si ponia ginilagilana, tinumatumae, meke qinetuqetu sa Tamasa, ba koasa tie pu tavete va sea si ponia Sa sa tinavete pude varivarigara meke naqiti tinagotago pude vala ni koarini pu va qetuna sa Tamasa. Hie tugo si loke laena, na hadu luli givusu mo.*