1 Dariasi si vizatia pude va turu i si ka keke gogoto hiokona puta tie pude qavuna nia sa doduruna sa nana butubutu baṉara, 2 meke ka ṉeta koimata pude totoli ni sari kasa arini si vizati sa. Keke koari ka ṉeta si e Daniela. Sari na qavuna si kote olaṉa la koari ka ṉeta tie totoli pude va gorevura i sari na hiniva tanisa baṉara. 3 Ego, se Daniela si tavetavete va leana holani sari kasa koimata totoli meke sari na qavuna, koa gua koari nana binokaboka sapu noma hola, ke balabala sa baṉara pude va kopu nia koasa sa doduruna sa butubutu baṉara. 4 Ke podekia ri na qavuna meke ari koimata totoli pude hata nia siraṉa pude zutu ia. Ba pa nana tinavete si lopu boka ta zutu si asa, sina sa nana hahanana si toṉoto meke ta raṉena si asa; loke nana sinea babe kaiqa vasina si loposo nia sa. 5 Vina betona si zama si arini, “Lopu kote boka vagia gita si keke ginugua pude zutu ia se Daniela osolae vagia pa kaiqa ginugua la gua tu koasa tinarae tanisa nana Tamasa.”

6 Ke topue varigara la sari na qavuna na koimata totoli pude dogoria sa baṉara, meke zama, “Baṉara Dariasi, mu toa hola ninae rane! 7 Gami na tie totoli, na qavuna meke sari na dia tie varitokae, si ele va ego ia pude garunu nia agoi sa baṉara si keke tinarae sapu va ṉiṉira ia sa binalabala sapu loke tie kote varavara la pa kaiqa tamasa pule koari ka toloṉavulu puta rane sapu mae hire, ba koa agoi baṉara mo. Asa pu varavara la pa kaiqa tamasa si kote ta gona nuquru la pa pou lohina tadi na laione. 8 Ego, baṉara, mu garunia sa vina turu asa, mamu kubere gore nia pude lopu kote boka ta hobe gua sapu hoke ta tavete koari na tinarae tadi pa Media meke Pesia, sapu lopu boka ta hobe.” 9 Ke kubere gore nia e Dariasi sa baṉara sa tinarae.

10 Totoso tumae nia Daniela sapu ele ta tavete sa vina turu asa, si pule la pa nana vetu si asa meke sage la pa nana lose pa kali sage, vasina koa sari vuida sapu tukele la pa Zerusalema. Ṉeta totoso pa hopeke rane si kokotuṉu si asa meke varavara, zama leana la koasa nana Tamasa, gua mo sapu ele hoke tavetia sa doduru rane.

11 Meke topue varigara la si ari kasa tie hire meke dogoria se Daniela korapa varavara meke tepa tinokae la koasa nana Tamasa. 12 Ke la si arini koasa baṉara meke la nanasa nia sa nana vina turu: “Vea, lopu kuberia tu goi sa tinarae sapu koa ri ka toloṉavulu puta rane sapu korapa mae si doduru tie kote varavara la koa goi mo, gua? Loke tie si kote varavara la pa kaiqa votiki tamasa babe na tie. Ura asa sapu lopu lulia sa tinarae, si kaqu ta gona nuquru la pa korapana sa pou lohina tadi na laione.”

Olaṉa sa baṉara, “Uve, sa vina turu si asa tugo gua sapu ta tavete pa tinarae tadi Media meke Pesia, sapu lopu kaqu ta hobe.”

13 Meke zama si arini koasa baṉara, “E Daniela, sapu keke arini pu ta raovo mae pa Ziuda, si lopu hite hiva va tabe igo sa si agoi baṉara, babe koasa vina turu sapu kubere gore nia goi. Korapa varavara ṉeta totoso pa hopeke rane si asa.” 14 Totoso avosia sa baṉara sapu guahe, si talotaṉa hola si asa; meke sipu lopu ele lodu sa rimata si podeke sisigitia sa pude harupia se Daniela.

15 Meke ene varigara la sari kasa tie koasa baṉara meke zama la koa sa, “Mu va nonoga ia baṉara sapu koasa tinarae tadi pa Media meke Pesia si loke vina turu sapu tavetia sa baṉara si boka ta hobe.”

16 Ke vala nia sa baṉara sa zinama, meke turaṉa vagia rini se Daniela meke gona la nia pa pou lohina tadi na laione. Meke zama sa baṉara koe Daniela, “Mani harupu igo sa mua Tamasa si agoi, Asa sapu nabulu nia goi doduru totoso!” 17 Keke patu si tava veko la pa ṉuzuna sa pou, meke tokoro la nia sa baṉara sa nana riṉi meke gua tugo sari riṉi tadi nana koimata, pude lopu kaqu boka ta harupu tugo se Daniela. 18 Meke pule sa baṉara koasa nana vetu baṉara, meke lopu henahena si asa koasa boṉi asa; loketoṉa linopilopi va qetuqetu tie si ta evaṉa tugo. Meke lopu boka puta si asa.

19 Koasa kalalasa kekenu pana vaqavaqasa, si tekulu sa baṉara meke bebeno la koasa pou tadi na laione. 20 Totoso tata la tugo sa koasa pou tadi na laione, si kuliusuna meke titioko la si asa koe Daniela, “Daniela, nabulu tanisa Tamasa toana, vea, boka harupu igo sa mua Tamasa sapu vahesia goi doduru totoso, koari na laione?”

21 Olaṉa se Daniela, “Baṉara, mamu toa hola ninae rane! 22 Garunu mae nia sa qua Tamasa sa Nana mateana meke kumuhi ṉuzudi sari na laione. Lopu hite garatau rini sina loke qua sinea si arau pa Kenuna Sa. Meke koa goi, baṉara, ba loke kinaleana si ele tavetia rau pa kenumu.”

23 Qetu hola sa baṉara meke vala zinama pude ovulu vura nia se Daniela koasa pou. Meke totoso ta ovulu vura se Daniela si loke bakora si ta dogoro koa sa, sina raṉea sa sa nana Tamasa. 24 Pa ginarunu tanisa baṉara si ta vagi saripu zutuna se Daniela meke ta gona nuquru la pa korapa pou tadina laione, turaṉae dia barikaleqe meke koburu. Sipu lopu ele kamo pa hatara si arini si horu vagi mo ari laione meke garata moku pani susuridi.

25 Meke kubere la se Dariasi sa baṉara koari doduru tie, na butubutu meke tie pa doduru vinekala pa doduruna sa popoa pepeso:

28 Ke ravutu se Daniela koari na binaṉara tadi Dariasi meke Saerasi sa tie Pesia.