1 Meke mae koe Devita sari doduru butubutu Izireli pa Heboroni meke zama, “Gami si na masamu na eharamu soti. 2 Pa totoso ele hola, sipu korapa mami baṉara se Saula, si agoi mo turaṉa lani pa vinaripera sari na tinoni Izireli, meke ele va tatara nia Zihova sapu agoi kaqu turaṉi na kopu ni sari Nana tinoni pude na dia baṉara, gua.” 3 Ke mae koe Devita, sa baṉara pa Heboroni, sari doduru koimata pa popoa Izireli. Ke tavetia sa si keke vinariva egoi madina koa rini pa kenuna e Zihova. Va madia rini meke ta evaṉae na baṉara pa Izireli si asa. 4 Ka toloṉavulu puta vuahenina se Devita sipu ta evaṉae baṉara, meke koa baṉara si asa ka made ṉavulu puta vuaheni.* 1 Baṉ 2:11; 1 Koron 3:4, 29:27 5 Koa baṉara pa Heboroni koari na tie Ziuda si asa koari ka zuapa vuaheni kukuruna, meke pa Zerusalema koari doduru tie Izireli meke pa Ziuda ka toloṉavulu ṉeta vuaheni.

6 Sa binaṉara pa Zerusalema si podalae guahe. Ene vura la se Devita meke sari nana tie pude rapata nia si pa Zerusalema. Sari na tie Zebusi, saripu koa vasina, si balabala ia sapu lopu kaqu boka va kilasia Devita sa vasileana lavata, gua asa ke zama si arini koa sa, “Lopu kaqu boka nuquru hokara mae tani si agoi. Ari na behu na ike mo ba kote boka hadu panigo si goi.”* Zos 15:63; Zaz 1:21 7 Ba zau vagia Devita sa vasileana pa korapana sa bara ṉiṉirana pa Zaione, meke ta gilana sapu ta evaṉae na “Vasileana Lavata te Devita” si asa.

8 Pa rane sana si zama se Devita koari nana tie, “Sa tie pu hiva va kilasi sari na tie Zebusi si mani ene nuquru sage lulia sa siraṉa tana kolo meke kaqu tiqe kamoi. Mani sage lulia sa siraṉa tanisa kolo pa korapa bae, meke haele koasa berukehe vasina vagi kolo rini. Mamu la rapatani gedi sari na qua kana, arini pu zama, ‘Na tie behu na ike,’ gua.” Arini pu kana ia se Devita gua asa ke ta pozae, “Na tie behu na tie ike ba lopu boka nuquru pa vetu tanisa baṉara.”

9 Sipu ele zau vagia sa sa vetu ṉiṉirana, si koa vasina se Devita meke poza nia sa, “Sa Vasileana Lavata te Devita si asa.” Podalae pa gasa rimata panapeka kamoa panaulu si va siṉi nia patu na pepeso rini meke tavete vari likohae nia vetu ṉiṉiradi sa sa vasileana lavata asa. 10 Ke ṉiṉira nono latu se Devita, sina se Zihova Tadi na Qeto Minate si somana koa koasa.

11 Sa Baṉara Hiramu pa Taea si garunu lani sa sari na tie paleke inavoso koe Devita; poni nia dekuru huda sida meke sari na kamada na tie peqo patu sa pude tavetia sa vetu baṉara. 12 Gua asa ke gilania Devita sapu ele va turu va nabua e Zihova si asa pude na baṉara pa Izireli, meke tava ululu sa nana butubutu baṉara pa laedi rina nana tinoni pa Izireli.

13 Sipu rizu taluarae pa Heboroni meke mae pa Zerusalema si arini, si vagi va soku barikaleqe pule se Devita, meke sari na nabulu barikaleqe, meke sokudi nana koburu koreo na vineki. 14 Hire sari na pozadi rina tuna Devita pa Zerusalema, ari Samua, Sobabu, Netani, Solomone, 15 Ibaha, Elisua, Nepeqi, Zapia, 16 Elisama, Eliada, meke Elipeleti.

17 Ta tozi nia ri na tie Pilisitia sapu tava baṉara se Devita pa Izireli gua, ke topue sari na tie varipera pude la saputu vagia gana si asa gua. Sipu avoso nia Devita sapu gua asa, si gore la si asa koa keke vasina ṉiṉirana. 18 Kamo mae pa lolomo Repaemi sari na tie Pilisitia meke koa vasina. 19 Tepa la koe Zihova se Devita, “Vea kaqu la rapati rau sari na tie Pilisitia hire? Vegua kaqu poni nau Goi sa minataqara?” gua.

Meke olaṉa se Zihova, “Uve, la mamu rapati, sina kote ponini gamu Rau sa minataqara pude va kilasi sari na tinoni Pilisitia.”

20 Ke la pa Beolo Perazimi se Devita meke vasina si va kilasi sa sari na tie Pilisitia. Zama si asa, “E Zihova si ele huara nuquru la i sari na qua kana guana naqe.” Gua asa ke ta pozae Beolo Perazimi* Sa ginuana Beolo Perazimi si na “Baṉara tanisa Huara Nuquru.” sa vasina asa. 21 Sipu govete sari na tie Pilisitia si veko pani rini sari dia beku, ke paleke taloa ni Devita meke ari kasa nana tie si arini.

22 Meke pule la pule pa lolomo Repaemi sari na tie Pilisitia meke la koa vasina. 23 Ke nanasa pulea Devita se Zihova meke olaṉa si Asa, “Mu lopu ene toṉoto la pude rapata ni koasa vasina sana, ba mamu likoho la tu. Mamu rapata ni si arini pa mudidia, tata koari na hudahuda balasamu. 24 Pana avosia gamu sa ene halabutu pa batu huda, si mamu tiqe rapata ni, sina Arau si kaqu ene va kenue koa gamu pude va kilasia sa qeto minate Pilisitia.” 25 Lulia Devita gua sapu garunu nia e Zihova, meke hadu pule ni sa sari na tie Pilisitia podalae pa Qeba meke kamo la tu pa Qeza.