1 Dotu, marilaena hola sa tataru te Tamasa koa gita. Nomana hola sa Nana tataru ke boka ta pozae na koburu Tanisa si gita, meke hinokara tugo. Gua asa ke lopu gilana gita rina tie tana kasia popoa si gita, meke lopu gilania tugo rini sa Tamasa.* Zn 1:12 2 Kasa qua baere ta tatarue mia, kamahire si na koburu te Tamasa si gita, ba gilania gita sapu pana vura pule mae se Karisito, si kote ta evaṉa gua puta tugo Asa si gita, sina kote dogoro sotia gita sa guguana Sa. 3 Sa tie sapu aqa va ṉoṉo nia sa pinule mae te Karisito si va via pule nia si asa, meke via kekeṉoṉo gua tugo sa tinoa te Karisito. 4 Asa sapu tavete va sea, si sekea sa sa Tinarae te Tamasa. Ura sa nada sinea si na sinekena sa Tinarae te Tamasa. 5 Gilania mia gamu sapu mae nia Zisu Karisito si pude vulasa pani sari nada sinea, ba loke Nana sinea si Asa.* Zn 1:29 6 Asa sapu koa keke koe Karisito, si lopu kote tavete va sea nono latu, ba asa sapu tavete va sea nono latu, si lopu hite dogoria na gilania sa se Zisu Karisito.

7 Kasa tuqu koe Karisito, mi lopu ta turaṉa va sea koa keke tie. Asa sapu evaṉia sa tinoṉoto si toṉoto tugo si asa, meke toṉoto gua puta tugo e Karisito. 8 Asa sapu tavete va sea, si na tie te Setani d tugo si asa. Ura se Setani si ele sea mae tu pa pinodalaena. Sapu mae nia sa Tuna Tamasa, si pude huaria sa tinavete te Setani. 9 Ura asa sapu ta podona koe Tamasa, si lopu kote tavete va sea nono latu. Sina sa tinoa te Tamasa si koa koa sa, meke sina ta podona koe Tamasa sa Tamana si asa, ke lopu tavete va sea nono latu si asa. 10 Pa siraṉa hie si boka gilania gita sapu esei sa koburu te Tamasa, meke esei sa koburu te Setani. Asa sapu lopu lulia sa tinoṉoto, meke lopu tataru nia sa tasina si lopu te Tamasa si asa.

11 Hie tugo sa inavoso sapu ele avosia gamu pa pinodalaena: mada koa varivari tatarue si gita, gua.* Zn 13:34 12 Mada lopu koa gua e Keni si gita. Asa si na tie te Setani, sapu va matea sa sa tasina soti, se Ebolo. Na vegua ke va matea sa? Koa gua sapu kaleana sa nana tinavete, ba se Ebolo si tavete va toṉoto.* Zen 4:8

13 Kasa tasiqu koe Karisito, be kukitini gamu rina tie pa kasia popoa si gamu, si mi lopu magasa nia. 14 Gilania nada gita sapu ele hola nia gita sa minate, meke karovo la pa tinoa, sina tataru ni gita sari na turaṉada koe Karisito. Asa sapu lopu tataru ni sari na turaṉana koe Karisito, si tana minate si asa.* Zn 5:24 15 Asa sapu kukiti nia sa tasina koe Karisito, si na tie variva mate tugo si asa. Meke gilania mia gamu sapu sa tie variva mate si lopu tagoa sa sa tinoa hola. 16 Gua hie gilana gunia gita sa tataru: poni hobeni gita Karisito sa Nana tinoa. Meke garoda tugo gita si pude poni sari nada tinoa koari na turaṉada koe Karisito. 17 Be keke tie si tago va leana nana likakalae, meke dogoria nana sa sapu koa malaṉa si keke turaṉana, ba lopu toka nia sa; vegua meke boka tataru nia sa sa Tamasa? 18 Ke gua asa kasa tuqu koe Karisito, mada lopu va vura ia sa tataru pa zinama mo, ba mada va gorevura ia pa tinavete, meke pa hinokara.

19 Gua asa meke kote gilania gita sapu koa pa hinokara si gita, meke pude gua asa si kote boka raṉeraṉe si gita pa kenuna sa Tamasa. 20 Be sari buloda teleda si zutu puleni gita, si mada tumae nia sapu sa Tamasa si noma hola ni sari na buloda, meke gilani Sa sari doduru tiṉitoṉa. 21 Ke gua asa, kasa qua baere, be lopu zutu gita rina buloda soti, si raṉeraṉe nada si gita pa kenuna sa Tamasa. 22 Poni gita Tamasa gua saripu tepai gita koa Sa, sina va tabei gita sari Nana tinarae, meke taveti gita gua saripu variva qetu koa Sa. 23 Sapu garunu nia sa Tamasa koa gita si guahe: pude mada va hinokaria gita se Zisu Karisito sa Tuna meke pude mada koa vari tatarue, gua puta tugo sapu ele garununi gita e Karisito.* Zn 13:34, 15:12,17 24 Asa sapu va tabei sari na Tinarae te Tamasa, si koa koe Tamasa si asa, meke sa Tamasa si koa koa sa. Guahe ke tumae nia gita sapu koa si Asa koa gita: Tumae nia gita sina koa koa gita sa Maqomaqo Hope sapu ponini gita Sa.