1 Meke keke koari ka zuapa mateana sapu taṉinidi ri ka zuapa baolo, si mae koa rau meke zama guahe: “Mae maqu va dogoro nigo sa vina kilasa sapu kote ta evaṉa koasa maqota sapu ta avosaena, sapu habotuna koari na kolo.* Zer 51:13 2 Sari na baṉara koasa popoa pepeso si ele somanae koasa nana binarabarata na vinarivosa, meke ele ta turaṉa va sea sari na tiena sa popoa pepeso koasa nana hahanana maqota, guana napo viviri vaeni variva pekipekina si arini,” gua.* Ais 23:17; Zer 51:7

3 Beto asa si turaṉau sa mateana si rau koasa ṉiniraṉira tanisa Maqomaqo Hope, meke la pa soloso qega. Meke dogoria rau vasina si keke barikaleqe sapu habotu nana koa keke kurukuru kaleana sapu ziṉaziṉarana, meke ta kubere pa doduru tinina sari na pozapoza vinahesi pule, sapu na tamasa ṉiṉira si asa, gua. Ka zuapa batuna, meke ka manege puta kikihona si asa. 4 Meke pokopoko pepolo na ziṉara sa barikaleqe hie, meke tava sarie qolo na patu arilaedi, meke na vovoto davi si asa. Meke taṉinia nana pa limana si keke kapa qolo, sapu siṉia na hahanana variva kurekuredi, meke na bonidi ri nana binarabarata na vinarivosa.* Zer 51:7 5 Meke hire sari pozapoza pu ta tome ginuadi saripu ta kubere pa raena:

Meke sipu dogoria rau sa barikaleqe asa si magasa sisigiti si rau. 7 Meke nanasa mae guahe sa mateana koa rau, “Na vegua ke magasa si goi? Ego, maqu tozi va bakala poni nigo sa ginua tomena tanisa barikaleqe hie, meke sa kurukuru kaleana pu ka zuapa batuna meke ka manege puta kikihona sapu sa kurukuru vasina hake sa barikaleqe. 8 Sa kurukuru sapu dogoria goi sana si ele koa tu visoroihe, ba lopu koa si asa kamahire, ba kote vura sage mae pa korapa pou loke kokoina si asa, meke kote la koasa vina kilasa koa holana. Podalae tu pa pinodalaena sa kasia popoa, si ta kubere pozadi sari kaiqa tie pa buka tinoa. Ba pana dogoria ri na tie pu lopu ta kubere pozadi pa buka tinoa sa kurukuru kaleana, si kote magasa nia rini si asa. Asa sa kurukuru kaleana sapu ele koa visoroihe, ba lopu koa kamahire, meke sapu kote vura pule mae.* Diut 7:7; Rev 11:7; Sam 69:28

9 Meke ta hivae sa ginilagilana lohina d pude gilania sa ginuana sa kurukuru kaleana hie. Sari ka zuapa batuna si sari ka zuapa toqere, vasina pu habotu sa barikaleqe, meke ari ka zuapa baṉara tugo si arini. 10 Ka lima si ele hola sa dia binaṉara, keke si korapa koa, meke sa vina zuapa si lopu ele mae. Meke pana mae si asa si kaqu papakana mo sa nana totoso pude koa baṉara. 11 Meke sa kurukuru kaleana sapu ele koa visoroihe, meke lopu koa kamahire, si asa tugo sa baṉara vina vesu, meke asa tugo si keke sapu lulia sa hahanana tadi ka zuapa, sapu kote la koasa nana vina kilasa koa holana.

12 Sari ka manege puta kikiho saripu dogori goi si ari ka manege puta baṉara, saripu lopu ele koa baṉara koari hopeke dia binaṉara. Ba pa keke totoso papakana hite mo, si kote koa baṉara turaṉia rini sa kurukuru kaleana.* Diut 7:24 13 Sari ka manege puta hire si keke mo sa dia hiniva, meke kaqu poni la nia rini sa dia ṉiniraṉira koasa binaṉara tanisa kurukuru kaleana pude ṉiṉira sa nana tinarae. 14 Meke kote raza ia rini sa Lami, ba kote va kilasi Sa si arini. Ura Asa tugo sa Ṉati Hiniva tadi na ṉati hiniva, meke sa Baṉara tadi na baṉara. Meke kaqu koa mataqara turaṉi tugo Sa sari Nana tie ta vizatadi, na ta tiokodi, saripu turu va nabu pa dia rinaṉeraṉe koa Sa.”

15 Meke zama sa mateana koa rau: “Sari na kolo pu dogori goi vasina pu habotu sa maqota, si sari na tinoni meke sari na puku tie pa ninae butubutu, na vinekala, na popoa. 16 Sari ka manege puta kikiho, meke sa kurukuru kaleana saripu dogori goi, si kote kukiti nia rini sa maqota. Meke kote vagi betoi rini sari doduru nana likakalae saripu tagoi sa, meke va dodoho veko hola ia rini si asa, meke kote gania rini masana meke sulu pania rini si asa. 17 Ura ele vekoa Tamasa pa korapa bulodia, pude di va gorevura ia sa Nana hiniva. Meke va egoa rini pude vala nia koasa kurukuru kaleana sa dia ṉiniraṉira pude koa baṉara si asa, osolae kaqu tava gorevura beto sari doduru zinama te Tamasa. 18 Sa maqota sapu dogoria goi sana, si sa vasileana nomana, sapu baṉara ni sari doduru binaṉara pa popoa pepeso,” gua.