65
Vinahesi meke na Zinama Leana
(Keke kinera te Devita)
1 Kei Tamasa, garo tugo pude vahesi Igo gami si Goi pa Zaione,
meke kopu ni sari mami vina tatara koa Goi,
2 sina hoke olaṉi Goi sari na vinaravara.
Ke sari doduru tinoni pa kasia popoa si kaqu mae koa Goi,
3 koa gua koari na dia sinea.
Tava kilasa si gami koa gua koari na mami sineke tinarae,
ba taleosaeni gami Goi.
4 Tamanae tugo sa tie pu vizatia Goi pude koa tata koa Goi pa Mua vasina hopena.
Kaqu qetu nia gami sa lineana koasa Mua vetu hopena sapu sa Mua Zelepade hope.
5 Pa Mua inolaṉa si poni gami Goi sa minataqara,
meke variva magasa sari na Mua tinavete pude harupu gami.
Sari doduru tie pa kasia popoa meke pa kali karovodi rina kolo si kalavarae Igo si Goi.
6 Agoi sapu va turui sari na toqere pa Mua ṉiniraṉira,
meke vata dogoro nia Goi sapu na patutokaemu si Agoi.
7 Va bulei Goi sari na ovaṉadi rina kolo lamana,
meke sa puzakadi rina tovovo,
va nosoa Goi sa vinari kakatorai tadi na tinoni.
8 Sa doduruna sa kasia popoa
si magasa hola ni sari na tiṉitoṉa pu evaṉi Goi,
meke velavela nia rini pa kinera vinahesi na qinetuqetu.
9 Va hoqa ia Goi sa ruku pude kopu nia sa kasia popoa meke va masuria.
Va siṉi ni kolo Goi sari na ovuku.
Ponia linetelete Goi sa pepeso.
Gua asa kopu gunia Goi sa pepeso.
10 Va gorea Goi sa luturu* Na ruku ṉiṉirana. koari na ilaka pepeso pu ta gelidi pude va bobosi.
Va malohori Goi sari na pepeso koasa ruku remiremisi,
meke va toqoli Goi sari na linetelete.
11 Va masuria Goi sa vuaheni,
ke soku sa pinakepakete pa inuma.
Vasina la Goi si koa tugo sa minamutu.
12 Sari na ilaka duduli si siṉi na rovana sipi,
meke doduru tiṉitoṉa si guana tie pu kera qetuqetu pa dia zinama leana koe Tamasa.
13 Sari doduru vasidi si siṉi na rovana sipi.
Sari na lolomo si siṉi na huiti.
Kekeṉoṉo gua na tie sapu kera pa qinetuqetu si arini.