6
Pitu ia Zihova se Izireli
1 Va avoso la koasa zinama te Zihova:
Turu sage mae gamu, mi tozia sa mia vivinei pa kenudi ri na toqere;
mani avosia ri na toa sapu nasa si hiva tozia gamu.
2 Va avoso, gamu na toqere, avosi sari zinutu te Zihova;
va taliṉa gamu, vasina sapu sokirae ninae rane sa popoa pepeso.
Ura e Zihova si zutu ia sa Nana butubutu tinoni;
na zinutuna Izireli si paleke mae nia Sa.
3 “Gamu na Qua tinoni, nasa si tavete va sea atu nia Arau?
Na pinaleke sa si va mamatani gamu Rau? Olaṉa Au.
4 Arau turaṉa vurani gamu pa Izipi
meke harupu gamu koasa popoa pinausu asa.
Arau garunu atu nia se Mosese pude turaṉa gamu,
meke gua tugo sari Eroni meke e Miriami.* Ekd 4:10-16, 12:50-51, 15:20
5 Gamu na Qua tinoni, balabala pule la ia
sapu hiva tavetia e Balaki sa baṉara pa Moabi
meke sa inolaṉa te Belami sa tuna koreo e Beoro.
Balabala ia sa hinebala tamugamu pa Sitimi kamo la pa Qiliqali,
pude mi tumae ni sari tinavete toṉotodi te Zihova.”* Nab 22:2 kamo hinia 24:25; Zos 3:1 kamo hinia 4:19
Gua sapu Okoro nia e Zihova
6 Na sa si kaqu paleke la nia rau pa kenuna e Zihova,
meke la todoṉo pa kenuna sa Tamasa ululuna?
Kaqu paleke la ni rau pa kenuna Sa sari vinukuvukihi va uququ,
turaṉae tuna bulumakao sapu keke vuahenidi?
7 Vea, kote qetu ni e Zihova sari tina na tina sipi kokoreo,
meke manege puta tina ovukuna sa oela?
Vea, kaqu va vukivukihi nia rau sa tuqu kenuna pude vulasa pani sari qua sinea,
sa vuana sa tiniqu koari na sinea tanisa maqomaqoqu?
8 Lokari, ele va dogoro nigo Sa gua sapu leana.
Ke nasa si okoro nia e Zihova koa goi?
Pude tavetia gua sapu toṉoto meke vata dogoro nia sa tataru
meke pude ene turaṉia sa mua Tamasa pa pinamaṉa.
9 Saripu pamaṉa nia sa Pozana e Zihova si tagoa sa ginilagilana lohina.
Va avoso! E Zihova si korapa titioko la koasa vasileana lavata,
“Balau nia sa kolu sekeseke meke sapu Asa pu garunu nia.
10 Kei butubutu kaleanamu, vea kaqu muliṉini tu Arau,
sari mua tinagotago hinikodi
meke sari padapada kokohadi, sapu ta leveidi?
11 Vea kaqu taleoso nia Rau sa tie sapu padapada pa sikele kokohana,
sapu tavetavete ni sari mamamata kokohadi?
Vea, kaqu va maluara ia Arau sa tie padapada pa sikele kokohana,
sapu tago huneke sapu koaia mamamata kokohadi?
12 Sari nana tie tagotagodi si hoke variva mate;
sari nana tinoni si na tie kokohadi
meke sari meadi si tumaedi zama sekesekei.
13 Gua ke, ele podalae huara gamu Arau,
pude va ṉovala gamu koa gua koari na mia sinea.
14 Kote hena si gamu ba kote lopu deṉa;
sa tiamia si kote kokoba eko mo.
Kote kopu si gamu ba loketoṉa si kote va naqiti ia gamu,
sina saripu naqiti gamu si kote valani Rau koasa vedara.
15 Kote lelete si gamu ba lopu kote pakepakete;
kote munala vua olive si gamu ba lopu kote tavetavete nia gamu sa oela,
kote neti qurepi si gamu ba lopu kote napo ia gamu sa vaeni.
16 Sari tinarae te Omiri sa baṉara si kopuni gamu
meke sari doduru hahanana tanisa tutina e Ehabi sa baṉara,
meke luli gamu sari dia vina turu.
Gua ke kote valani gamu Arau pa tinahuara
meke sari mia tinoni si kote ta hakohakoe koari doduru tie;
kote tava sisirei si gamu koari na votiki butubutu.”* 1 Baṉ 16:23-34, 21:25-26
*6:4 Ekd 4:10-16, 12:50-51, 15:20
*6:5 Nab 22:2 kamo hinia 24:25; Zos 3:1 kamo hinia 4:19
*6:16 1 Baṉ 16:23-34, 21:25-26