1 Meke zama se Zihova koari Mosese e Eroni, 2 “Be tubu kapuna sa tie, ba be moqo ba be kina sapu boka ta evaṉae minoho kaleana hola pa kapu, si kaqu ta turaṉa la koasa hiama sapu se Eroni babe tuna pa tutina sa. 3 Kaqu vilitia sa hiama sa tubu meke be ta ilirae keoro sari na pulupulu pa korapana sa tubuna, meke ta dogoro sapu lohi hola nia sa tubu sa kapuna, si ta gilana sapu na minoho kaleana hola si asa. Kaqu tozi vura nia sa hiama sapu boni sa tie pa dinoṉo te Zihova. 4 Ba be keoro sa tubu, meke lopu doṉo guana lohi hola nia sa sa kapuna pa vari likohaena, meke sari na pulupuluna si lopu doṉo guana keoro, si kote veko va ilolae ia sa hiama sa tie koari ka zuapa rane. 5 Sa hiama si kote viliti pulea si asa koasa rane vina zuapa, meke be dogoria sa sapu doṉo kekeṉoṉo mo sa tubuna, lopu toa, si kote veko vata kale pulea sa ka zuapa rane pule. 6 Kaqu viliti pulea sa hiama si asa koasa rane vina zuapa, meke be ibu sa tubu, meke lopu toa, si kote tozi vura nia sa sapu via si asa, sapu na tubu mo si asa. Kaqu ṉuzapa va via i sa tie sari nana poko meke kaqu tiqe via si asa pa dinoṉo te Zihova. 7 Ba be toa sa tubu pa mudina sapu vilitia sa hiama, meke ta tozi vurae sapu via si asa gua, si kaqu ta viliti pule koasa hiama si asa. 8 Kaqu viliti pulea sa hiama si asa, meke be toa tugo si asa, si kaqu tozi vura nia sa sapu boni si asa; na minoho pa kapu sapu kaleana hola.

9 Be keke tie si koa ia na minoho kaleana hola pa kapuna, si kaqu ta turaṉa la koasa hiama si asa, 10 meke kaqu vilitia sa hiama si asa. Be doṉo keoro sa moqo sapu va keori sari na pulupulu meke siṉia na muzi, si 11 na minoho pa kapu sapu ele koa seunaena hola si asa. Sa hiama si kaqu tozi vura nia sapu boni si asa, meke lopu ta hivae pude veko va ilolae ia telena, sina ele bakala mo sapu boni si asa. 12 Be hola la sa minoho kapu hie pa doduru tinina sa tie, podalae pa batuna kamoa nenena, 13 kaqu viliti pulea sa hiama si asa. Be dogoria sa sapu hinokara ene betoa sa sa doduruna sa tinina, si kaqu tozi vura nia sa sapu via si asa. Be ta ilirae keoro sa doduru tinina meke beto sa minoho kapu si via si asa pa dinoṉo te Zihova. 14 Ba be koasa totoso tugo asa si lera vura mae sa tubu, si boni si asa. 15 Kaqu viliti pulea sa si asa, meke be dogoria sa hiama sapu lera sa tubu, si kaqu tozi vura nia sa sapu boni si asa. Na tubu lerana ginuana si na minoho kaleana hola pa kapu meke boni sa tie. 16 Ba sipu ibu sa tubu meke keoro pule, si kaqu la koasa hiama sa tie, 17 meke kaqu viliti pulea sa si asa. Be ta ilirae keoro sa tubu, si via si asa pa dinoṉo te Zihova, meke kaqu tozi vura nia sa hiama sapu via si asa.

18 Be keke tie si moqo meke ta salaṉa, 19 meke pa mudina asa si vura mae sapu keoro sa moqo, ba be kidakida ziṉara keoro sa moqo, kaqu la koasa hiama si asa. 20 Kaqu vilitia sa hiama si asa, meke be guana lohi hola nia sa tubu sa kapu pa vari likohaena, meke sari na pulupuluna si keoro, si kaqu ta tozi vurae sapu boni si asa. Na minoho kapu kaleana hola si asa, sapu podalae nia sa moqo. 21 Ba be vilitia sa hiama si asa meke sari na pulupulu pa korapana si lopu keoro, meke lopu lohi hola nia sa kapuna pa vari likohaena, ba doṉo guana kaka si asa, si kaqu veko va seu ia sa hiama si asa koari ka zuapa rane. 22 Be vari karovi sa kidakida, si kaqu tozi vura nia sa hiama sapu boni si asa; na ele seunaena sa nana minoho. 23 Ba be loketoṉa si ta evaṉa meke lopu varikarovi sa minoho; ba na kira mo si koa hola koasa pinodalaena sa moqo, si kaqu tozi vura nia sa hiama sapu via si asa.

24 Koasa tie sapu kina, be sa olarana si doṉo keoro babe ziṉara, 25 sa hiama si kaqu vilitia si asa, be keoro sari na pulupuluna pa olarana, meke ta dogoro sapu lohi hola nia sa sa kapuna pa vari likohaena, na minoho kaleana hola pa kapu si asa, sapu ta podalae koasa kina. Kaqu tozi vura nia sa hiama sapu boni si asa. 26 Ba be sari na pulupulu pa olarana si lopu keoro, meke lopu lohi hola nia sa sa kapuna pa vari likohaena, ba doṉo guana kaka mo si asa, si kaqu veko va seu ia sa hiama si asa ka zuapa rane. 27 Kaqu viliti pulea sa hiama si asa koasa vina zuapa rane, meke be toa si asa, na minoho kaleana hola pa kapu si asa. Kaqu tozi vura nia sa hiama sapu boni si asa. 28 Ba be lopu hobe sa dinoṉona, meke lopu toa tugo, ba doṉo guana kaka mo si lopu na minoho kaleana hola si asa. Kaqu tozi vura nia sa hiama sapu via si asa pa dinoṉo te Zihova, sina na kirana mo si asa.

29 Pana tubu batuna ba be asena si keke tie, ba be keke barikaleqe, 30 si kaqu vilitia sa hiama si asa. Be guana lohi hola nia sa sa kapu pa vari likohaena, meke sari na pulupulu pa olarana si doṉo guana meava meke karakara; si na minoho kaleana hola si asa. Kaqu tozi vura nia sa sapu boni si asa. 31 Ba pana vilitia sa hiama meke doṉo guana lopu lohi hola nia sa tubu sa kapu pa vari likohaena, meke lopu karakara sari na pulupulu koasa olarana, si kaqu va koa vata kale ia sa si asa koari ka zuapa rane. 32 Kaqu viliti pulea sa hiama sa tubuna koasa rane vina zuapa meke be lopu toa si asa, meke loke pulupulu meavadi pa olarana, meke lopu doṉo guana lohi hola nia sa sa kapu vari likohaena, 33 si kaqu neria sa tie sa batuna, ba lopu koasa vari likohaena sa tubu. Kaqu veko vata kale ia sa hiama si asa koari ka zuapa rane. 34 Koasa rane vina zuapa si kaqu viliti pulea sa hiama sa tubuna, meke be lopu toa si asa, meke lopu doṉo guana lohi hola nia sa kapu pa vari likohaena, si kaqu tozi vura nia sa sapu via si asa. Kaqu ṉuzapi sa tie sari nana poko meke kaqu via si asa. 35 Ba be toa pa mudina sipu ele ta tozi vurae sapu via si asa gua, 36 si kaqu viliti pulea sa hiama si asa. Be toa tugo si asa, si lopu garona pude doṉo hatai sari na pulupulu meavadi, sina bakala mo sapu lopu via sa tie. 37 Ba be ibu sa tubu pa vinizata tanisa hiama, meke sari na pulupuluna si toa valeana pa olarana, meke ta salaṉa sa tubu, si kaqu tozi vura nia sa hiama sapu via si asa. 38 Pana kamoa na kidakida si keke tie babe keke barikaleqe pa tinina, 39 kaqu vilitia sa hiama sa tie sana. Be doṉo guana rida keoro sa kidakidana, si lopu kaleana sisigiti sa minoho, ke via sa tie.

40-41 Be keke tie si vuvusu taloa kaluna pa kizuna ba be raena, si lopu boni si asa. 42 Ba be keke tubu si vura mae pa pakana sapu ziṉara keoro si kaleana hola sa minoho asa. 43 Kaqu vilitia sa hiama si asa, meke be ziṉara keoro si asa, 44 si kaqu tozi vura nia sa hiama sapu boni si asa, sina na minoho kaleana hola si koa pa batuna.

45 Sa tie sapu koa ia na minoho kaleana hola pa kapuna si kaqu va sagea sa poko rikarikatana, lopu kaqu sutia sa sa kaluna, kaqu nobia sa sa isumatana, meke zama velavela guahe: ‘Boni, boni si rau!’ gua, pude va balau i sari na tie. 46 Sa binoni tanisa tie si kaqu lulia sapu ve seunaena gua koa sa tie sa minoho. Kaqu koa vata kale pa kinoa tie si asa, pude lopu koa tata pa tie.

47 Pana karovia sa nokonoko kaleana hola meke toa koasa poko, be na vulu sia, ba be na poko lineni sia, 48 be ta tigisina, babe ta hokena, babe koa pa keke kapu sapu tava popana sapu tavete nia rina likakalae, 49 be doṉo guana buma sia, babe ziṉara, na binoni kaleana hola sapu vari karovi, meke ta hivae pude kaqu va dogoro nia koasa hiama. 50 Kaqu vilitia sa hiama si asa, meke kaqu veko va seu ia sa hiama sa tiṉitoṉa asa koari ka zuapa rane. 51 Kaqu viliti pulea sa hiama si asa koasa vina zuapa rane, meke be toa sa binoni kaleana asa, si kaqu ta pozae boni sa tiṉitoṉa asa. 52 Kaqu sulu pania sa hiama si asa, sina vari karovi sa nokonoko asa, meke ta hivae pude kaqu tava murimuri palae pa nika si asa.

53 Ba be pana vilitia sa si asa, meke dogoria sa hiama sapu lopu toa sa nokonoko kaleana asa koasa tiṉitoṉa asa, 54 si kaqu garunu nia sa sa tie pude ṉuzapa va via ia, meke veko va seu ia ka zuapa rane. 55 Beto asa, si kaqu viliti pulea sa, meke be korapa toa si asa ba lopu hobe sa dinoṉona sa minoho kaleana; meke be lopu vari karovi si asa; ba kaqu ta pozae boni tugo si asa. Kaqu sulu pania tugo goi si asa, be pa kenuna babe pa mudina si koa sa kinaleana. 56 Ba be pana viliti pulea sa hiama si asa, meke murimuri palae sa nokonoko kaleana, si kaqu rikata pania sa sa kukuruna sa poko babe na kapu sapu bonina tatasana. 57 Ba be vura pule mae sa nokonoko kaleana koasa poko, si toa halala pule si asa; sa tie pu tagona si kaqu sulu pania sa tiṉitoṉa asa. 58 Be ele ṉuzapa va viaia sa sa poko babe na kapu asa, meke lopu ta dogoro sa nokonoko sapu koa koasa poko, si kaqu ṉuzapa va via pulea sa si asa, meke kaqu tiqe via si asa pa dinoṉo te Zihova.”

59 Arini sari na tinarae tanisa nokonoko sapu koa pa poko; be na vulu sia, babe na poko lineni, babe keke tiṉitoṉa ta tavetae pa kapu kurukuru. Gua asa sa hahanana vinizata pude tozia be via babe boni si asa pa dinoṉo te Zihova.