1 Totoso korapa koa ta pusi seni se Zeremaea somanae koari na tie pa Zerusalema meke Ziuda pu korapa ta raovo la pa Babiloni meke sipu dogoro vagia meke rupahia e Nebuzaradani sa tie tuturaṉa koari na tie kopu tanisa baṉara si asa pude la pa Rama, si kamo la sa zinama te Zihova koa sa. 2 Totoso dogoro vagia e Nebuzaradani se Zeremaea si zama si asa koasa, “E Zihova sa mua Tamasa ele zama nia sa tinahuara tanisa popoa hie. 3 Meke kamahire si va gorevura ia Sa; ele tavetia Sa gua sapu tozia Sa sapu kote ta evaṉa. Doduru hire si ta evaṉa sina gamu na tinoni si tavete va sea la koa Sa meke lopu va tabea gamu si Asa. 4 Ba ṉinoroi hie si vata rupaha igo rau koari na seni pa limamu. Pude hiva agoi si luli au, mada la pa Babiloni, meke kote arau kopu nigo; ba pude lopu hiva agoi si koa mua. Doṉo la, sa doduru popoa lavata hie si koa pa kenumu; la pavei hiva la agoi.” 5 Ba sipu lopu ele taliri taloa se Zeremaea si zama pule la se Nebuzaradani, “Pule la koe Qedalaea sa tuna koreo e Ahikama, sapu sa tuna koreo e Sapani. Na asa si huhuku ia sa baṉara pa Babiloni pude kopuni sari vasileana pa Ziuda. Mamu la koa koa sa, turaṉae koari na tie pu kopu ni sa babe la mua pavei hiva la agoi,” gua si asa.

Meke ponia ginani na poata sa se Zeremaea meke tiqe va taloa ia sa. 6 Ke la se Zeremaea koe Qedalaea sa tuna koreo e Ahikama pa Mizipa meke koa turaṉia sa somanae koa rina tinoni pu koa holadi pa popoa.

7 Totoso avoso nia ri kaiqa koimata tadi tie varipera pu govete la koa pa sada vasileana sapu va qavuna ia sa baṉara pa Babiloni se Qedalaea sa tuna koreo e Ahikama pude kopuni sari tie, barikaleqe na koburu pu malaṉadi hola koasa popoa meke lopu ta raovo taloa la pa Babiloni, 8 si kamo la si arini koe Qedalaea pa Mizipa. Ari Isimeli sa tuna koreo e Netanaea, ari Zohanana meke e Zonatani sari karua koreo te Karea, Seraea sa tuna koreo e Tanahumeti, sari tuna koreo e Epai na tie Netopa meke Zazanaea tuna koreo Ma'aka meke sari dia tie si mae koa sa. 9 Tokotokoro se Qedalaea sa tuna Ahikama, sa tuna koreo Sapani koa rini pude va manoti sari dia binalabala, “Mi lopu matagutu pude va nabulu la koari pa Babiloni,” gua si asa. “Koa va leana pa mia popoa, mamu va nabulu la koasa baṉara pa Babiloni, meke kote leana sa mia kinoa. 10 Arau hie si kote koa mo pa Mizipa pude zama poni gita koari pa Babiloni pana ene mae gua si arini koa gita. Ba gamu si la pakete mia vaeni, na vuvua pa totoso maṉini meke oela olive, meke va naqiti koari mia zagi, mamu koa i sari na vasileana pu vagi hobei gamu.”

11 Sipu avoso nia ri doduru tie Ziu pa Moabi, Amoni, Edomu, meke doduru popoa pule sapu ka visavisa tie pa Ziuda si veko hola i sa baṉara pa Babiloni meke sapu va turu ia sa se Qedalaea pude na dia qavuna, gua, 12 si pule beto mae pa popoa Ziuda sari doduru, koari doduru popoa pu govete la i rini, meke mae koe Qedalaea pa Mizipa. Meke pakepakete va soku si arini, hola toa sa kolo vaeni, gua tugo sari na vuvua piqi meke olive.

13 Mae koe Qedalaea pa Mizipa se Zohanana sa tuna koreo e Karea meke sari doduru palabatu varipera pu govete vuradi koasa vasileana lavata, 14 meke la zama koa sa, “Vegua lopu gilania goi sapu se Balisi sa baṉara pa Amoni si ele garunia sa se Isimeli sa tuna koreo e Netanaea pude va mate igo?” gua si asa. Ba lopu va hinokaria e Qedalaea sa tuna koreo e Ahikama.

15 Meke zama golomo la se Zohanana sa tuna koreo e Karea koe Qedalaea pa Mizipa, “Va malumau, maqu la va matea se Isimeli sa tuna koreo e Netanaea; na loke tie kote gilania. Na vegua ke kaqu va mate igo tu sa meke va govete pulei sari tie Ziu pu korapa koa vari likohae dia koa goi, meke va matei tu sari ka visavisa tie koa holadi pa Ziuda?”

16 Ba zama se Qedalaea sa tuna koreo Ahikama koe Zohanana sa tuna koreo e Karea, “Lopu tavete gua asa! Sa vivineina Isimeli sapu tozia goi si lopu hinokara,” gua si asa.