49
Manani meke Leveni Zekopi sari na Tuna Koreo
1 Meke tioko varigara ni Zekopi sari na tuna koreo meke zama i sa, “Varigara beto mae si gamu doduru; maqu tozini gamu gua sapu kaqu ta evaṉa koari na rane vugo na repere:
2 Gamu na tuqu, mi varigara mae;
mamu va avoso mae koa rau.
Mi avosia sa tamamia Izireli.
3 Agoi Rubeni, sa qua koburu kenuna, meke na qua ṉiniraṉira,
na koburu kekenu pa pinodopodo pa qua pinalabatu,
arilaemu hola pa vina noma pule nigo
meke ṉiṉira hola ni goi sari na tasimu.
4 Kekeṉoṉo guana naqe si goi sapu raza ia sa popoa.
Gua asa si lopu kaqu boka koimata ni goi sari na tasimu koreo,
sina eko turaṉia goi sa qua nabulu barikaleqe pa qua teqe
meke lopu pamaṉa nau goi si rau.
5 Ari Simione e Livae si karua tamatasi soti
meke sari na dia vedara si variva mate.
6 Koroqu va egoi rau sari dia kinuhana golomodi.
Meke lopu kaqu somana ni rau sari dia vivinei.
Ura koasa dia binugoro si seke va mate tie si arini.
Qetu si arini pa dia binugoro pude seke kumati sari na pikupikutu makasidi rina bulumakao.
7 Namu ta levei sa dia binugoro, sina ṉiṉira sisigiti si asa,
meke na ṉinovaṉovala nomana koari na tie.
Kaqu vari paqapaqaha ni rau pa doduru popoa Izireli si arini,
meke kaqu va hihia i rau koari na tudia rina tuqu.
8 Agoi Ziuda si kaqu vahesi igo rina tasimu.
Kaqu neti goi ruadi sari na mua kana,
meke kaqu todoṉo pa kenumu goi sari na tasimu.
9 Kekeṉoṉo guana laione se Ziuda, sapu va matea sa nana boso meke kekere pule la pa nana bae;
eko magogoso si asa,
meke loke tie si hiva va tekulia.* Nab 24:9; Rev 5:5
10 Keke tumu goi si kaqu na baṉara,
meke sa tutimu si kaqu tagoa sa ṉiniraṉira pude na baṉara
osolae kamo mae sa tuna pu garona pude tagona sa ṉiniraṉira,
meke kaqu todoṉo na va tabea ri na butubutu si Asa.
11 Pusi nia sa sa nana doṉ'ki koasa huda vaeni,
meke sa tuna doṉ'ki koasa lelaṉa vaeni toa valeanana;
sina kote soku hola sari na huda vaeni pa nana popoa sapu soku hola vuadi,
ke leana hola pude na ginani tadi na kurukuru,
meke be hiva si kote boka ṉuzapi sa sari nana poko koasa kolo vaeni ziṉara.
12 Sari na matana si ziṉara koasa ninaponapo vaeni,
meke sari na livona si keoro koasa ninapona sa meleke.
13 E Zeboloni si kaqu koa pa masamasa kolo;
meke kaqu ta evaṉae na sigotoana vaka si asa;
meke sa kokoina sa nana popoa si kaqu kamo la gua pa Saedoni.
14 Isaka si kekeṉoṉo guana doṉ'ki ṉiṉirana,
sapu eko varikali nia na vovoina likakalae mamatadi.
15 Ba sipu dogoria sa sapu sa vasina magomagogosoana si leana, meke variva qetu sa popoa tanisa,
si kokopo gore nia sa avarana pude paleki sari na pinaleke mamata,
meke ta evaṉae pinausu pu ta zukuru pa tinavete si asa.
16 E Dani si kaqu koimata ni na kopu ni na totoli ni sari nana tinoni meke kaqu ta evaṉae keke butubutu pa Izireli.
17 Kaqu kekeṉoṉo guana noki sapu koa pa kali siraṉa sapu variva matena,
meke garatia sa sa nenena sa hose,
ke sa tie pu hake koasa si hoqa gore taloa pa mudina.
18 Ke Zihova, aqa nia rau sa Mua tinaharupu.
19 Keke puku tie varipera hikohiko si kaqu rapatia se Qadi,
ba kaqu va kilasi sa meke hadu va seui sa si arini.
20 Kaqu masuru valeana sa pepeso te Asa,
meke kaqu va vura nia sa ginani arilaena hola gua padana keke baṉara.
21 Napitalai si kekeṉoṉo guana kurukuru sapu ta pozae dia sapu ta rupahana,
meke sari na tuna pu podoi sa si leleadi.
22 E Zosepa si guana huda vaeni sapu vua katakata,* Kaiqa tie si balabala ia sapu sa zinama Hiburu pa vesi hie si tozia: “Zosepa si guana keke doṉ'ki pinomona tata pa keke kolo bukaha, meke sa tuna doṉ'ki pa kali toqere.”
meke toa valeana tata koasa bukaha,
meke sari na lelaṉana si haele sage hola nia sa goba.
23 Meke rapata va ṉiṉira la ia ri nana kana,
meke gona nia tupi rini si asa.
24 Ba va totoanae valeana nia sa sa nana bokala,
meke tava ṉiṉira sari na limana,
koasa ṉiniraṉira tanisa Tamasa Heheda te Zekopi,
meke koasa Sepati sapu lavelave kopuna se Izireli guana Patu aqoroana.
25 Sa Tamasa tanisa tamamu si toka nigo,
meke sa Tamasa pu tagoi sari doduru ṉiniraṉira si mana nigo,
meke ponigo sa ruku pa galegalearane,
meke na bukaha sapu vura mae gua pa kauru pepeso,
meke kaqu soku na mua kurukuru na koburu.
26 Sa tinamanae tanisa tamamu si noma holani sari na toqere koadi,
holani sari doduru tiṉitoṉa tolavaedi na toqere toa holadi.
Sari na tinamanae hire si madi koa pa batuna e Zosepa guana toropae baṉara pa batuna sapu ta paqaha pude na koimata koari na tasina.
27 E Benisimane si kekeṉoṉo guana siki variva mate na oviana;
sapu pana munumunu si gania sa sa gana boso sapu ele vagia sa,
meke pana veluvelu si va hia i sa sari na vinagi pa vinaripera.”
28 Arini sari ka manege rua butubutu Izireli; meke sari na zinama tinamanae gotogotodi pu hopeke zamani sa tamadia koarini.
Mate meke Ta Pomunae se Zekopi
29 Meke zamai Zekopi sari na tuna, “Tata mate si rau kamahire. Meke pana mate rau si mamu la pomunu turaṉa nau koari na tamaqu koasa bae te Eporoni pa nana inuma, sapu na tie Hitaiti, 30 pa Makapela, pa kali gasa rimata pa Mamere pa popoa Kenani. Ele holua Ebarahami sa pepeso hie koe Eporoni pude na vasina popomunuana.* Zen 23:3-20 31 Vasina si ta pomunae se Ebarahami, meke sa nana barikaleqe sapu se Sera, meke vasina tugo si ta pomunae se Aisake meke sa nana barikaleqe sapu se Ribeka, meke vasina tugo si pomunu nia rau se Lia.* Zen 25:9-10, 35:29 32 Sa pepeso meke sa bae vasina, si ele ta holudi koari na tie Hitaiti, ke mamu pomunau vasina.” 33 Meke sipu beto totozini Zekopi sari na tuna koreo sari nana hiniva hire, si poloi sa sari na nenena pa teqe. Eko pule, meke tiqe mate si asa.* TTA 7:15
*49:22 Kaiqa tie si balabala ia sapu sa zinama Hiburu pa vesi hie si tozia: “Zosepa si guana keke doṉ'ki pinomona tata pa keke kolo bukaha, meke sa tuna doṉ'ki pa kali toqere.”