27
Na Kinera Vari Pomunae te Taea
1 Kamo mae koa rau sa zinama te Zihova: 2 “Tuna na tie, kera nia keke kinera taruqoqo te Taea. 3 Zama la ia sa popoa Taea, sapu koana pa sasada vura la pa lamana, na tie holuholu si asa koari soku tie koari na raratana pa seu, ‘Hiera gua si zama nia e Zihova sa Baṉara:
Agoi Taea, si zama guahe,
“Gotogoto sa qua tinolava,” gua.
4 Mua tinoa si koari na kolo bogusu;
sari pu kuri igo na tavete va gotogoto igo.
5 Arini taveti sari doduru mua labete
koari na huda pa Toqere Hemoni;
vagi huda sida si arini pa Lebanoni
pude tavete poni igo dedegere tepe.
6 Na huda oaku pa popoa Basani
si tavete nia qelu rini tamugoi;
na huda saeparasi pa raratana Saeparasi
si tavete nia hatara rini, kadakada nia livo elopaniti.
7 Mua tepe si na poko lineni sapu ta piti va sari koari lozi leleadi, mae guana pa Izipi
meke asa tugo sa mua pitipiti.
Sari mua ipi kadesi si buma meke pepolo
mae guadi pa raratana pa Nusa Saeparasi.
8 Sari mua tie qelu si mae guadi pa Saedoni meke Avadi.
Kei Taea sari mua tie matazoṉa si tavetavetedi mo pa vaka.
9 Sari kamada mae guadi pa Bibilosi* Bibilosi si ta pozae Qebala meke koa pa popoa raratana Lebanoni. si koa dia pa vaka
aqa tuvatuvaka.
Doduru vaka pa hebalana meke sari dia tie tavetavete
si hoke atu kapae pa kalimu pude atu vari hobe tinagotago koa goi.
10 Sari tie pa Pesia, Lidia, meke Libia,
si na tie varipera pa mua qeto minate.
Va sigoti rini sari dia lave na toropae koari na mua goba,
arini poni igo sa mua tinolava.
11 Ari tie pa Avadi meke Heleki
si kopu koari mua goba pa vari kalimu;
ari tie pa Qamadi
si koa koari na mua vetu hakehakei ululudi.
Va sigoti rini sari dia lave koari mua goba,
somana vata dogoro nia rini sa mua tinolava sapu gotogoto.
12 Ari pa Tasisi si atu holuholu koa goi sina soku nigo na tinagotago; atu vari hobei ni rini sari dia siliva, aeana, teni, meke ledi pude vagi dia likakalae arilaedi koa goi.
13 Ari pa Qurisi, Tubala, meke Meseki si holuholu koa goi; vari hobe ni rini sari dia pinausu, tiṉitoṉa boronizi pude vagi dia likakalae arilaedi koa goi.
14 Ari tie pa Beti Toqama si atu vari hobe hose tavetavete, hose varipera, meke miulu pude vagi dia likakalae arilaedi.
15 Ari pa nusa Rodesi si holuholu tugo koa goi, meke gua tugo sari kasa pa soku raratana; na livo elopaniti meke huda eboni si vari hobeni rini koa goi.
16 Ari pa Siria si holuholu koa goi, na soku mua likakalae; poko pepolo, meke turakoisi,* Turakoisi si buma gua sa kopi pa sagauru pa rane sapu gona rimata., poko ta piti va sari koari lozi leleadi, poko lineni, patu binu meke patu ziṉara rubi si vari hobeni rini koa goi.
17 Ari pa Ziuda meke Izireli si holuholu koa goi; na huiti mae guana pa vasileana Miniti, palava memehena, zipale, oela olive, meke na meresena oto huda si vari hobeni rini koa goi.
18 Na soku nigo na tinagotago meke likakalae ari laedi, ke holuholu kolo vaeni se Damasikasi koa goi mae guana pa Heliboni meke na vulu mae guana pa Zaha.
19 Ari tie pa Dani meke Qurisi koadi pa Uzali si holui sari mua likakalae arilaedi; na aeana malohorona pude tana vina sari, na pasapasa tana ginani si vari hobe ni rini.
20 Ari pa Dedani si holuholu baleqete koa goi tana habotu pa hose.
21 Ari pa Arebia d meke doduru koburu tavia pa Kedara si atu holuholu koa goi; na tuna sipi, sipi kokoreo nomadi meke na qoti si vari hobe ni rini koa goi.
22 Sari tie holuholu pa Siba meke Rama si holuholu koa goi; na pasapasa sapu leanadi hola meke na soku votivotiki patu ṉedala meke na qolo si vari hobeni rini koa goi pude vagi sari mua likakalae arilaedi.
23 Sari pa Harani, Kane, Idini, meke sari tie holuholu pa Siba, Asura, meke Kilimadi si holuholu koa goi. 24 Pa mua maketi si holu vagi dia poko leleadi koa goi si arini, na poko buma, na poko piti tava sari koari na lozi leleadi, meke poko tana hatara sapu visoviso meke koa i na iku sapu ta vuzala va nabu.
25 Sari vaka pa Tasisi* Rev 18:11-19
na paleke poni igo sari mua likakalae leleadi.
Na siṉi igo na sinuraṉa mamatadi
pa korapana sa lamana labena.
26 Sari mua tie qelu na turaṉigo
koasa kolo bogusu.
Ba sa givusu pa gasa rimata kote va inete igo
pa korapana sa lamana labena.
27 Sari mua tinagotago, likakalae arilaedi tana holuholu,
mua tie tavetavete pa vaka, tie turaṉa vaka, meke tie tuvaka vaka
mua tie holuholu meke tie varipera,
meke doduru sapu koa pa korapa vaka
si kote lodu pa korapana sa lamana labena
koasa rane sapu lodu sa mua vaka.
28 Sari na popoa pa masa si kote hodahodaka
pana gagaemana sari mua tie tavetavete pa vaka.
29 Doduru pu taṉini qelu
si kote luara palae vaka;
sari tie turaṉa vaka meke sapu tavetavete pa vaka
si kote turu dia pa masamasa.
30 Kote va ululu i rini sari mamalaiṉi dia
meke kabo igo rini;
kote vuvusu ni kavuru rini sari batudia
meke topili pa eba.
31 Kote neri batu si arini pa guguamu agoi
meke va sage poko baika.
Kote kabo igo rini na ta sigiti maqomaqo dia
meke kote koa talotaṉa meke taruqoqo.
32 Meke totoso kabo meke talotaṉa nigo rini,
si kote kabo zamazama si arini pa guguamu agoi;
“Esei si ele lopu kulu gugua sa popoa Taea,
pa korapana sa kolo lamana?”
33 Totoso karovo lamana sari mua likakalae holuholuana,
si va qetui goi sari soku butubutu;
koari mua tinagotago nomadi meke likakalae
si va tagoi agoi sari binaṉara pa popoa pepeso.
34 Ba kamahire si ta huara nigo pa kolo,
pa korapa lamana peava koasa hebalana;
sari mua likakalae holuholu meke mua tie holuholu
si ele lodu turaṉigo rini pa lamana.
35 Sari doduru tie koadi koasa raratana,
si hodahodaka nia sa mua tinasuna;
sari dia baṉara si matagutu hola,
sari isumatadia si doṉo duta.
36 Sari butubutu holuholu si magasa nigo dia;
variva matagutu hola sapu va kamo ia goi
meke lopu kote ta dogoro pule.’ ”