1 Hola sapu gua asa, si va namanama ia Abusalamu si keke nana totopili varipera, sari na hose meke ka lima ṉavulu tie pude haqala va kenue koa sa, gua. 2 Hoke vaṉunu munumunu hokara se Abusalamu meke la turu pa kapa siraṉa koa sa sasada barana sa vasileana lavata. Pana be mae si keke tie vasina sapu koa pa vinaritokei meke hiva nia sa sa vinatoṉoto tanisa baṉara gua, si hoke tiokia Abusalamu meke nanasia sapu pavei mae guana si asa, gua. Meke pana tozi nia sa tie sa nana vasileana vasina sapu maea sa, 3 si hoke zama kokoha guahe se Abusalamu, “Dotu sa tinarae si ele koa mo pa kalimu goi sana, ba loke tie ta vizatana koa sa baṉara si koa, pude avosia meke va toṉotia sa mua tinasuna.” 4 Meke hoke zama gua tugo he si asa, “Be guana arau sa tie varipitui! Meke be arini saripu ari dia vinari nominomi babe kaiqa dia hiniva si boka mae mo koa rau, meke arau kaqu vizata ponia koa sa sa tinoṉoto.” 5 Be guana la vura koe Abusalamu si keke tie pude todoṉo pa kenuna sa gua, si hoke qaqama la se Abusalamu, tuqe vagia sa, meke ahoa si asa. 6 Tavete guni e Abusalamu sari doduru tie Izireli saripu hoke mae pude dogoria sa baṉara pa vinatoṉoto, gua asa ke sari doduru tie Izireli si qetu nia se Abusalamu pude guana na dia baṉara, gua.

7 Sipu hola ka made vuaheni si zama se Abusalamu koe Devita sa baṉara, “Baṉara, mu va malumau pude la pa Heboroni, pude maqu la tavetia sa vina tatara sapu ele va egoa rau koe Tamasa. 8 Sipu korapa koa si rau pa Qesura pa popoa Siria, si va tatara nia rau koe Zihova sapu pana turaṉa pule nau Sa si arau pa Zerusalema si kaqu vahesia rau si Asa pa Heboroni gua.”

9 “Ego, mu latu pa binule,” gua sa baṉara. Ke tiqe la pa Heboroni se Abusalamu. 10 Ba garunu golomo lani inavoso sa sari doduru butubutu pa Izireli, meke zama guahe, “Pana avosi gamu sari na mamalaiṉidi rina buki, si mi kukili guahe: ‘Abusalamu si ele tava baṉara koari doduru tie Izireli pa Heboroni!’ mi gua.” 11 Karua gogoto tie pu ruvati e Abusalamu sapu taluarae mae guadi pa Zerusalema si luli koasa, namu lopu hite gilania rini sa ṉatina sa ginugua. 12 Sipu tavetia sa sa vina vukivukihi, si garunu la tie tugo pa vasileana Qailo se Abusalamu pude hata ia se Ahitopeli, sapu keke rina tie totoli te Devita. Ba zuka ia sa se Abusalamu kamahire meke sa binalabala pude hobea se Devita sa baṉara gua si ṉiṉira lalanana; meke sari na tie te Abusalamu si sokudi hola.

13 Mae si keke tie koe Devita meke tozia sa sa inavoso, sapu sari na tie Izireli si podalae va lavatia se Abusalamu pude na dia baṉara, gua.

14 Ke zamai Devita sari doduru nana palabatu pu koa turaṉi sa pa Zerusalema, “Mada tuturei taluarae mo si gita kamahire, be hiva govete nia gita se Abusalamu! Tuturei! Sina gina kote lopu sana mae kamo mo tani si asa, meke va kilasa gita na va matei sari doduru pa vasileana lavata!”

15 “Uve, mami baṉara,” olaṉa gua si arini. “Kaqu tavetia gami gua sapu hiva nia goi.” 16 Ke taluarae sa baṉara lulia ri doduru nana tamatina meke sari nana koimata, ba ari ka manege puta barikaleqe nabulu mo, si koa hola pude kopu nia sa vetu baṉara gua.

17 Sipu taluarae sa baṉara meke sari doduru nana tie koasa vasileana lavata, si la noso si arini koasa vetu vina betobeto. 18 Turu turaṉia ri doduru nana koimata si asa totoso ene hola sari na tie kopu tanisa baṉara pa kenuna sa. Sari ka onomo gogoto tie varipera saripu luli koasa totoso taluarae pa Qati si asa, ba ene hola tugo. 19 Meke zama sa baṉara koe Itai, sa dia koimata, “Na vegua ke luli tu koa gami si goi? Pule, mamu la koa turaṉia sa mua baṉara vaqura. Na tie karovomu si goi, na tie govetemu pa mua popoa soti. 20 Na koa vasinahite mo si goi tani, ke na vegua ke kaqu ene luli lamae koa rau si goi? Arau ba lopu gilana hokaria sa vasina pu korapa la ia rau, ke mamu pule, mamu turaṉa puleni sari na turaṉamu. Mani tataru va ṉoṉo nigo e Zihova si goi.”

21 Ba olaṉa se Itai, “Baṉara, tokotokoro atu koa goi si rau pa korapa pozana e Zihova sapu kaqu luli koa goi si rau doduru totoso vasina pu la goi, osolae kamoa minate.”

22 “Leana!” gua se Devita. “Ene atu!” Ke luli se Itai meke sari doduru nana tie meke sari dia tamatina tugo. 23 Kabo va ululae sisigiti sari na tie sipu taluarae taloa sari na tie te Devita. Karovia sa baṉara sa lolomo Kidoroni, lulia tugo ri nana tie meke tiqe ene varigara taloa si arini la gua tu pa soloso qega.

24 Zedoki sa hiama si koa nana, meke koa tugo koa sa sari na tie pa butubutu Livae, saripu palekia sa Bokese Vinariva Egoi. Va habotu gorea rini si asa, meke lopu ovulu sage pule nia rini, osolae taluarae beto tu pa vasileana lavata sari doduru tinoni. Sa hiama Abiata ba koa nana tugo. 25 Meke zama sa baṉara koe Zedoki. “Mu paleke pule la nia pa vasileana lavata sa Bokese Vinariva Egoi te Zihova. Be qetu nau Zihova si rau si keke rane kote boka va malumau Sa pude pule mae, meke la dogoria sa vasina koa ia Sa. 26 Ba be lopu qetu nau Sa si arau, si leana mo, mani evaṉia mo Sa koa rau gua sapu balabala ia Sa.” 27 Meke zama la tugo koe Zedoki si asa, “Ego, vagia sa mua koburu Ahimaza meke e Abiata meke sa tuna se Zonatani. Mamu pule la pa vasileana lavata pa binule. 28 Kamahire si kaqu ene mo si rau koari na karokarovoana ovuku pa korapa soloso, osolae vagia rau sa inavoso koa goi.” 29 Ke palekia ri Zedoki e Abiata sa Bokese Vinariva Egoi te Zihova, meke pule la pa Zerusalema meke koa vasina.

30 Kabo meke ene sagea Devita sa Toqere Olive. Lopu va sage sadolo si asa, meke nobia tugo sa sa batuna pude va dogoro nia sa nana tinalotaṉa. Sari doduru pu luli koa sa si nobi betoi tugo rini sari batudia meke kabo. 31 Sipu tozi nia rini se Devita sapu somana tu koe Abusalamu se Ahitopeli gua, si varavara si asa, “Tepaigo rau, Zihova, mamu iliri la nia pa pinupuhu sa binalabala te Ahitopeli!”

32 Sipu kamoa Devita sa batuna sa toqere, vasina sapu koa si keke vasina vahesihesiana te Tamasa, si mae tutuvia keke nana baere ta ronuna si asa, e Husai na tie Arakaiti, rikarikatana sa nana poko, meke tale pepesona batuna. 33 Zama se Devita koa sa, “Lopu kaqu boka ta tokae si rau be luli koa rau si goi, 34 ba kaqu toka nau goi si rau be pule la pa vasileana nomana si goi meke tozi nia se Abusalamu sapu kaqu nabulu va gorevura nia goi si asa, kekeṉoṉo gua sapu nabulu nia goi sa tamana. Mamu podeke sisigitia pude va kari sari kaiqa binalabala pu va turui e Ahitopeli. 35 Sa hiama Zedoki meke Abiata si korapa koadia vasina, tozi koarini sari doduru tiṉitoṉa pu avosi goi pa vetu tanisa baṉara. 36 Koadia sari dia koburu ari Ahimaza meke Zonatani, meke kote boka garunu maeni goi si arini koa rau meke sari doduru inavoso pu vagi goi.”

37 Ke pule la koa koasa vasileana lavata se Husai sa baere te Devita, meke totoso kamo vasina si asa, si kamo tugo se Abusalamu.