1 Totoso beto kuri Devita sari nana vetu soti pa Zerusalema, sa popoa te Devita, si va namanama nia tugo Devita si keke vasina tanisa Bokese Vinariva Egoi te Tamasa, meke va turu ponia sa si keke ipi pude ipi nia. 2 Meke zama si asa, “Ari na tie Livaeti mo si garo pude palekia sa Bokese Vinariva Egoi te Tamasa sina arini mo si vizati e Zihova pude palekia meke nabulu nia pa tinavete vina vukivukihi si Asa doduru rane ka rane.”* Diut 10:8 3 Meke garuni Devita sari na tinoni Izireli pude mae pa Zerusalema pude paleke mae nia sa Bokese Vinariva Egoi pa vasina sapu ele va namanama nia sa. 4 Beto si tioko varigara ni Devita sari na tutina e Eroni meke sari doduru tie Livaeti. 5 Pa tutina Kohati pa butubutu Livae si e Urieli; palabatu ni sa si ka keke gogoto hiokona puta ari na turaṉana soti. 6 Pa tutina e Merari si e Asaea; palabatu ni sa si ka karua gogoto hiokona puta turaṉana soti. 7 Pa tutina e Qerisoni si e Zoili; palabatu ni sa si ka keke gogoto toloṉavulu puta turaṉana soti. 8 Pa tutina e Elizapani si e Semaea; palabatu ni sa si ka karua gogoto turaṉana soti. 9 Pa tutina e Heboroni, si e Elieli: palabatu ni sa sari ka vesu ṉavulu puta turaṉana soti. 10 Meke pa tutina e Uzieli si e Aminadabi: palabatu ni sa sari ka keke gogoto manege rua turaṉana soti.

11 Tioko varigara ni e Devita sari na hiama, e Zedoki meke Abiatad meke ka onomo tie pule pa butubutu Livae: Urieli, Asaea, Zoili, Semaea, Elieli, meke Aminadabi. 12 Zama si asa koarini, “Gamu sina palabatu koari na tuti mia pa butubutu Livae. Va madi puleni gamu meke gua tugo sari na tasimia, pude mi boka palekia gamu sa Bokese Vinariva Egoi te Zihova, sa Tamasa pa Izireli, la koasa vasina sapu ele va nama nia rau. 13 Sina lopu gamu na palekia pa totoso kekenu ke va kilasa gita e Zihova, sa nada Tamasa, pa Nana binugoro. Na lopu nanasa la si gita koa Sa pude luli gua sapu garo pude paleke va rizu ia gita.”

14 Ke sari na Hiama na tie Livaeti si va madi pule ni pude boka paleke va rizu ia sa Bokese Vinariva Egoi te Zihova, sa Tamasa pa Izireli. 15 Meke va hakea rina tie Livaeti pa avaradia sari na palepalekeana huda pa varikalina sa Bokese meke kokovaria rini, gua sapu ele ta tozi koasa zinama te Zihova koe Mosese.* Ekd 25:14

16 Garuni tugo e Devita sari na koimata tadi na tie Livaeti pude poni tinavete sari kaiqa tasidia pude kera qetuqetu na lopi va ululae ni sari na mike, hapu, meke na sibolo. 17-21 Koari na puku tie kerakera si ta vizata sari na tie hire pude lopi ni sari na sibolo boronizi: E Hemani tuna e Zoili, e Asapa tuna koreo e Berekaea, meke Etani tuna e Kusaia, pa tutina e Merari. Vizati pule rini si kaiqa tie Livaeti pude toka ni pude lopi ni sari na mike hapu tana mamalaiṉi sage: E Zakaraea, Azieli, Semiramoti, Zehieli, Uni, Eliabi, Maseia, meke e Benaea.

Pude mike ni sari na hapu tana mamalaiṉi gore, si vizati rini sari na tie Livaeti hire: E Matitia, Elipelehu, Mikineia, Azazia, meke sari karua tie kopu pa Zelepade, ari Opeti Edomu, meke e Zeieli.

22 Ta vizata si e Kenania pude palabatu nia sa kinerakera, sina bokabokana na tumatumaena pa kinera. 23-24 Ari Berekaea e Elikana, meke gua tugo sari Opeti Edomu, meke e Zehia si ta vizata pude na tie kopu koa sa Bokese Vinariva Egoi. Sari na hiama si e Sebanaea, Zosapati, Netanela, Amasai, Zakaraea, Benaea, meke e Elieza si ta vizata pude ivui sari na buki pa kenuna sa Bokese Vinariva Egoi.

25 Ke topue qetuqetu la sari Devita sa baṉara meke sari na koimata tadi pa Izireli, meke gua tugo sari na koimata tadi na tie varipera, la pa vetu te Opeti Edomu pude vagia sa Bokese Vinariva Egoi. 26 Va vukivukihi ni rini si ka zuapa bulumakao meke ka zuapa sipi pude va soti ia sapu kote toka ni e Zihova sari na tie Livaeti saripu kote palekena sa Bokese Vinariva Egoi. 27 Va sagea Devita si keke poko doduru, na poko lineni arilaena, meke gua tugo sari doduru tie Livaeti saripu palekena sa Bokese Vinariva Egoi, sarini pu kerakera na mikemike, meke gua tugo sa koimata tadi na tie kerakera, se Kenania. Va sagea tugo Devita si keke poko hiama. 28 Ke ene turaṉia ri doduru tie Izireli sa Bokese Vinariva Egoi te Zihova sage la kamo pa Zerusalema. Luli nia kukili na iraṉa rini pa qinetuqetu, ivui rini sari na ivivu na buki meke vari seke ni rini sari na sibolo, meke lopi i rini sari na mike hapu.

29 Totosona pu kamo la sa Bokese Vinariva Egoi koasa vasileana te Devita, si hopiki vura pa vuida se Maekolo, sa tuna vineki e Saula, meke dogoria sa se Devita, sa baṉara, korapa qetu peka na horu, si hakohako nia mo sa se Devita pa bulona.