1 Yesus konda numa letek mai, boe ma hatahori noꞌuk ka rame-rame reu fo tunggan. 2 Medak neu ma, hambu hatahori hedi kusta esa mai nasare mbalin. Ana sendek luu-langgan fo noke tulu-falik neu Yesus nae, “Lamatuak, ee! Tulu-fali au dei! Mete ma Lamatuak nau, na, Lamatuak bisa mamopo au heding ia, mita fo hatahori boso nunute au bali, boe ma au bisa hule-haradoi seluk nai uma huhule-haradoik dale.”

3 Yesus namanene nala naa, boe ma Ana loo liman de nafaroe neu hatahori kusta naa, ma kokolak nae, “Au nau a mesan! O hai leo!” Medak neu ma, hatahori naa hedin mopon tutik ka. 4 Boe ma Yesus nafadan nae, “Masaneda, ee! O hai ena, tehuu ta bole mafada esa boe na. O muste tungga baꞌi Musa hohoro-lalanen dei. Dadi muni malangga anggama muu fo ana parisa o ao-inam, mita fo ana bubuluk o hedim mopon tebe-tebe ena, do beik. Boe ma o muste muni o fefeem tanda makasi fo basa hatahorir bubuluk rae, o hai tebe-tebe ena.”✡ Malangga Anggamar Hohoro-lalanen 14:1-32

5 Basa boe ma Yesus maso neni nggorok Kapernaum neu. Nai naa, hambu komedan soldadu Roma esa mai noke tulu-falik nae, 6 “Papa, ee! Au ana mana maue-osang esa namahedi berak nai uma. Ana ta bisa nambadeik laꞌo ela mamana susunggun, de ana doidoso nalan seli.”

7 Yesus naselu nae, “Malole! Dei fo Au uu tao ahain.”

8 Tehuu komedan naa nae, “Papa! Papa hae makamamangguk aom fo mai bali, huu au ta andaa simbok Papa nai au umang. Sadi Papa kada kokolak numa ia mai leo, neu ko au ana mana maue-osang naa, hai tutik kana. 9 Au bubuluk dalak ia, nahuu au malanggang naena koasa fo parenda au. Ma au oo aena koasa fo parenda au soldadung nggara boe. Mete ma au parenda au ana nuning ae, ‘Muni naa muu!’ Neu ko ana neu. Mete ma au ae, ‘Ia mai!’ Neu ko ana mai boe. Mete ma adenu au hatahori mana maue-osang ae, ‘Tao ia!’ Neu ko ana tao talo naa. De sadi Papa kada kokolak, neu ko au ana mana maue-osang naa, hai tutik kana.”

10 Yesus namanene nala naa, boe ma Ana heran. Ana kokolak neu hatahori noꞌuk kara mana tunggan nae, “Heran, ee! Doo basa ia, Au bei ta atonggo ita hatahori Yahudi esa boe na, fo nemeheheren matea sama leo hatahori Roma ia! 11 Nenene, ee! Neu ko hambu hatahori feꞌek noꞌuk ka sama leo hatahori Roma ia ruma dulu mai, ma ruma muri mai. Ara mai fo ranggatuuk raꞌa feta sama-sama ro baꞌi Abraham, baꞌi Isak ma baꞌi Yakob nai Manetualain uman nai nusa tetuk do inggu temak.✡ Lukas 13:29 12 Leo mae Manetualain here nala hatahori Yahudir fo dadi reu Ndia hatahorin, tehuu hambu noꞌuk ka ta tao matak neu sana. Neu ko Ana timba heni sara reni mamana makiu-makahatuk dale reu. Nai naa, ara buꞌi rakarereu ma doidoso ralan seli.”✡ Mateos 22:13; 25:30; Lukas 13:28

13 Yesus kokolak basa talo naa, boe ma nafada komedan naa nae, “Ama fali leo. Huu ama ana mana maue-osan naa hai ena, sama leo ama nemeheheren.” Ndaa no hatematak naa, kanak naa hai tutik kana.

14 Laꞌe esa, Yesus neni Petrus uman neu. Ana mete-nita Petrus ari-inan sunggu nai mamana susungguk lain, huu ana sumai. 15 Yesus toꞌu nala liman, boe ma ina lasik sumain mopon tutik ka. De ana nambadeik neu nalalau Yesus asa.

16 Neu ledo sangga tesa, boe ma hatahorir mai reni sira hatahorin fo nitu saꞌek kara. De Yesus parenda nitur raa nae, “Weeh, nitu! Malai heok laꞌo ela hatahorir ia leo!” Boe ma nitur raa ralai tutik ka. Ana oo tao nahai basa hatahori hedis sara boe. 17 Ana tao basa iar, tungga hata fo Manetualain mana toꞌu dedeꞌan Yesaya surak memak kana nae,

18 Basa naa, Yesus mete-nita hatahori noꞌuk ka mai eko ralan. Boe ma Ana nadenu ana nunin nara nae, “Mai fo ita saꞌe ofak teni dano boboan seri teu.”

19 Boe ma hambu meser anggama esa mai kokolak nae, “Papa Meser! Papa neni bee neu a mesan, na, au ae tungga akandoo ua Papa!”

20 Tehuu Yesus naselu nae, “Malole, boe! Tehuu masaneda talo ia. Basa hatahorir ma banda-manur kamamana leleo-luluꞌuk mesan. Busa fui fali neni ndia bolo luluꞌun neu. Mbuik fali neni ndia ndunun neu. Tehuu Au, Hatahori Dae-bafo Isi-isik ia, ta aena uma heli-heling fo fali uni naa uu. Mamana ndae langgak neu oo, ta hambu boe.”

21 Boe ma hatahori laen esa bali, fo mana tungga-tungga no Yesus mai noke nae, “Lamatuak! Au nau tungga Lamatuak, tehuu elan fo au fali fo faduli ina-amang nggara dei. Mete ma au amang maten ena, na, dei fo au tungga.”

22 Boe ma Yesus kokolak nae, “Talo ia! Elan numa naa fo hatahorir ta mana ramahere neu Manetualain, ara rafafaꞌu sira hatahori mana maten. Tehuu mete ma o mae tungga Au, na, o muste tungga no tebe-tebe!”

23 Basa boe ma Yesus hene neni ofak lain neu sama-sama no Ndia ana nunin nara. 24 Neu ara saꞌe ofak reni dano boboan seri reu, boe ma Yesus sunggu. Ta dook ka boe ma ani makarumbuk mai. Rii tufa reu-mai, de oe lala neni ofak dale neu. 25 Yesus ana nunin nara mete-rita naa, boe ma ara fafaen rae, “Lamatuak! Lamatuak, ee! Mambadeik fo fali mala ai dei! Te ita sangga molo mate ia ena!”

26 Boe ma Yesus naselu nae, “Heeh, tao hata de ei mamataꞌu!? Ei ta mamahere Au, do?” Boe ma Ana nambadeik. De Ana kaꞌi anin ma rii naa nae, “Hahae leo!” Boe ma rii no anin lende tutik kana leo.

27 Yesus ana nunin nara heran. Ara kokolak rae, “Awii! Ndia ia see, ee? Talo bee de Ana bisa parenda anin no rii fo tungga Ndia hihii-nanaun?”

28 Ta dook ka boe ma, ara losa dano tatain seri nai hatahori Gadara* Susura dedeꞌa Yunani neulaun lenak nai buku Mateos surak nae, Gadara. Hambu susurak ketuk bali surak rae, Gergesa, ma ketuk laen bali surak rae, Gerasa. nusan. Numa naa, hambu hatahori fo nitu saꞌek dua, ara leo rai lua batu mamana hatahori mates. Sira raa, manggaraun nara seli, de ta hambu hatahori esa boe na nambarani laꞌok nesik naa. Ara mete-rita Yesus mai, 29 boe ma ara eki rae, “Wooi, Manetualain Anan! Tao hata de O mai pode-ura babalik ai? Leo mae fain fo sangga huku-doki ai bei ta losa, tehuu O mae tuni-ndeni ai ena.”

30 Deka-deka no mamanak naa, hambu bafi noꞌuk ka sosoka dae sangga nanaꞌak. 31 Boe ma nitur raa roke-hule neu Yesus rae, “Mete ma O nau husi ai, na, madenu ai maso meni kada bafir raa dale miu!”

32 De Yesus parenda sara nae, “Miu leo!” Basa naa, nitur raa kalua laꞌo ela hatahori kaduak kara raa, de maso reni bafir raa dale reu. Bafir raa ralaik ralenggu-pikok, boe ma ara tuda tungga mbiak tatain reni dano dale reu. De basa sara mate rasamele.

33 Mana manea bafir mete-rita mandadik naa, boe ma ara ralaik fali reni nggorok reu, de ara tui basa-basan. 34 Hatahori noꞌuk kara ramanene rala tutuik naa, boe ma ara kalua reni mamanak naa reu. Ara ratonggo ro Yesus, de ara kokoen nakandoo fo Ana laꞌo ela sira mamanan.