22
Lee fo oe na neni sodaꞌ, ma ai-huuꞌ fo neni sodaꞌ
1 Boe ma eilaꞌo-limalope ria natudu au lee esa, fo riꞌ oe na neni sodaꞌ. Oe ria makaneneun sama leoꞌ tiroao. Faa neme Manetualain no Bibi-lopo Anaꞌ ria kadera manapareta na mai.✡ Yeskial 47:1; Sakaria 14:8 2 Ana faa leo okafoo ina fo nai kota ria talada a. Nai lee ria suun dua si, mori ai-huuꞌ esa neni sodaꞌ. Ai-huuꞌ ria teuꞌ esa sona naboa laiꞌ sanahulu dua, bulaꞌ esa na laiꞌ esa. Doo na bisa dadi neuꞌ modo-aidoo fo ramodo reniꞌ basa lahenda nusaꞌ rai dae-bafoꞌ a.✡ Tutui Masososaꞌ 2:9 3 Tehuu, basa-basan fo parnaa Manetualain tipa henis ma fees kutuk a, reꞌes ana kota ria. Nai naa nana, noi Manetualain ma Bibi-lopo Anaꞌ a ratuuꞌ homu pareta rai Sira kadera manapareta nara, ro Sira lahenda nadedenun fo doꞌo-tabe Si a.✡ Sakaria 14:11
4 Sira basa bisa rita Manetualain mata-idun. Ma Ramatuaꞌ a nade Na manaduiꞌ nai sira dedei nara. 5 Ta hapu hatuꞌ nai naa fa. De Ramatuaꞌ a lahenda nara ta parlu ledo, do dededeꞌ, huu fo Manetualain riꞌ tao na kota ria makaledoꞌ a. Neuꞌ ko, ara homu pareta nai naa losa doo na neu.✡ Yesaya 60:19; Daniel 7:18
Ramatua Yesus nateꞌe Ria hehelu Na
6 Basa de, eilaꞌo-limalope ria nafada au nae, “Basa-basan fo au afada o a, nana tebe. Basa lahenda bisa ramahere au dedea ka. Tepoꞌ ria Manetualain pake Dula-dale Na fo nafada Ria Hara-dasin neuꞌ mana nesimata nara. Tehuu basa boe ma Ana pake eilaꞌo-limalopen neme nusatetu-ikutemaꞌ a mai bali, de nafada ana nara laꞌeneuꞌ basa hata fo ta dooꞌ a soꞌ te, muste dadi.”
7 Huu fo Yesus riꞌ dedea nae, “Mafarereneꞌ! Ta dooꞌ a soꞌ te, Au mai. Nai susuraꞌ ia, manaduiꞌ basa-basan, laꞌeneuꞌ hata fo neuꞌ ko dadi. Basa lahenda fo tuka susuraꞌ ia isi-liin, neuꞌ ko ara raua-ranale ran seli.”
8 Au ia Yohanis, riꞌ duiꞌ susuraꞌ ia. Au riꞌ amanene ma ita basa hata ia ra. Amanene basa boe ma, au sundaꞌ undulaka ka uuꞌ eilaꞌo-limalope ria ei dae na. Huu fo ria riꞌ natudu basa hata ia ra reuꞌ au. 9 Tehuu ana nasaꞌai au nae, “Ae! O bosoꞌ tao leo naꞌ! O muste doꞌo-tabe noi neuꞌ Manetualain. Bosoꞌ doꞌo-tabe neuꞌ au. Huu fo au boe, Manetualain lahenda nadedenun sama leoꞌ o, ma o toranom fo dadi reuꞌ Ria mana nesimatan, ma basa lahenda fekeꞌ fo ara tao tuka hata manaduiꞌ nai susuraꞌ ia daleꞌ.
10 O bosoꞌ mafuni susuraꞌ ia isi-liin neuꞌ lahenda fekeꞌ a. Ta dooꞌ a soꞌ te, basa hata fo manaduiꞌ nai susuraꞌ ia daleꞌ a, tantu dadi.
11 Basa lahenda fo tao makekeo-makakanuꞌ sona,
pesi si remeꞌ na, ela ara tao raroo makekeo-makakanuꞌ.
Tehuu, basa-basan fo rasoda lalao-lalafuꞌ a,
ara muste rasoda lalao-lalafuꞌ raroo.
Basa lahenda fo tao tadaluꞌ,
nemeꞌ na ela ara tao raroo tadaluꞌ.
Tehuu basa-basan fo tao malole,
ara muste tao malole raroo.”✡ Daniel 12:10
12 Basa ria boe ma, Yesus dedea seluꞌ nae, “Mafarereneꞌ matalolole! Ta dooꞌ a soꞌ te, Au mai. Neuꞌ ko Au balas basa lahenda ra, tuka sira nonoi-tataon.✡ Yesaya 40:10; 62:11; Sosoda Iꞌio-oꞌoaꞌ ara 28:4; Yeremia 17:10
13 Au ia,
Alfa losa Omega.
Au ia,
A losa Z.
Basa-basan reme Au mai,
mulai neme masososa na losa babasan.✡ Daebafo Rupa-lole Bebeuꞌ a 1:8; Yesaya 44:6; 48:12; Daebafo Rupa-lole Bebeuꞌ a 1:17; 2:8
14 Lahenda fo safe makamomoi bua-loas nara a, sira raua-ranale.
Huu fo, neuꞌ ko ara hapu hak fo leo kota ria daleꞌ reu, masoꞌ tuka lelesu bafaꞌ ina a.
Lahenda fo rasoda nai malalao-malalafuꞌ a, raua-ranale.
Nana huu, neuꞌ ko ara hapu lelaꞌ de raa ai-boaꞌ neme ai-huu fo neni sodaꞌ a.✡ Tutui Masososaꞌ 2:9; 3:22
15 Tehuu, lahenda fekeꞌ a, ta bole masoꞌ leo naꞌ reu fa.
Ta Ramatuaꞌ a lahendan fa, sona ta bole leo rai naa.
mana hohoke, mana soko,
kanisa lahendaꞌ, manaateiꞌ,
mana mapuputaꞌ.
Basa sira, ta bole masoꞌ leo naꞌ reu.
Foa ela sira basa, adaꞌ deaꞌ.
16 Au ia, Yesus. Au riꞌ fee eilaꞌo-limalope Ka neme nusatetu-ikutemaꞌ a mai, fo nafada basa-basan riꞌ o mita a, ela emi meu mafada Au hehelu Ka neuꞌ saraniꞌ kahituꞌ ara.
Au ia, mane Daud a tititi-nonosin.
Au ia, Maneꞌ mana homu pareta.
Au makaledo Ka nahaa matetuꞌ,
Sama leoꞌ Ruu fo nai Dulu.
Au makaledo Ka tande na seli,
sama leoꞌ Ruuꞌ Dulupilaꞌ.”✡ Yesaya 11:1, 10
17 Manetualain Dula-dale Na naloo nae, “Leo iaꞌ mai!”
Manakabi inaꞌ ria boe naloo nae, “Maiꞌ leo!”
Basa-basan fo ramanene a rae, “Mai leo!”
Ela leoꞌ bea basa mana mamada-meti heduꞌ ara, mai rinu leo!
Ela leoꞌ bea na basa-basan nau rinu oe fo neni sodaꞌ,
mai aso leo!
Lahenda bole aso pardeo
oe ria.
Lahenda bole rinu oe ria
ta tifa-bae fa.”✡ Yesaya 55:1
Yohanis hehelu mateꞌe na
18 Au ia, Yohanis, fee nafarereneꞌ neuꞌ basa lahenda fo neuꞌ ko ramanene hata fo Manetualain natudu memaꞌ neuꞌ au nai susura ia, leo iaꞌ: maneniko hapu lahenda tamba seluꞌ ubeaꞌ neuꞌ susura ia, neuꞌ ko Manetualain fee tamba huhukuꞌ neuꞌ ana, neniꞌ soe kahituꞌ fo Ana poꞌa si leo dae-bafoꞌ a reu a. 19 Ma kalu hapu lahenda nakuraꞌ ubeaꞌ nemeꞌ susuraꞌ ia isi na mai, neuꞌ ko Manetualain hai faliꞌ ria hak na, fo ela ana bosoꞌ masoꞌ leo kota malalao-malalafuꞌ ria neu, ma ana bosoꞌ naa ai-boaꞌ masoda, fo riꞌ tao naa lahenda nasoda naroo a.✡ Tui Seluꞌ Laꞌe Neuꞌ Eno Sodaꞌ a 4:2; 12:32
20 Yesus riꞌ natudu basa hata ia ra. Ana helu nae, “Tebe ria! Ta dooꞌ a soꞌ te, Au mai.”
Ramatua Yesus, mai leo!
21 Au hule fo Ramatua Yesus natudu dale malole Na neuꞌ basa Ria lahenda nara. Amin!
Neme au mai,
Yohanis
✡22:1 Yeskial 47:1; Sakaria 14:8
✡22:3 Sakaria 14:11
✡22:5 Yesaya 60:19; Daniel 7:18
✡22:11 Daniel 12:10
✡22:12 Yesaya 40:10; 62:11; Sosoda Iꞌio-oꞌoaꞌ ara 28:4; Yeremia 17:10
✡22:13 Daebafo Rupa-lole Bebeuꞌ a 1:8; Yesaya 44:6; 48:12; Daebafo Rupa-lole Bebeuꞌ a 1:17; 2:8
✡22:14 Tutui Masososaꞌ 2:9; 3:22
*22:15 Susura Makamoiꞌ dedea Yunani manaduiꞌ nae, “busa”. Lahenda Yahudi ra rahiiꞌ pake dedea “busa” ela dadi tutuiꞌ fo natudu fee lahenda ta Yahudi fa, riꞌ lahenda fekeꞌ “fo ta ramahere Ramatuaꞌ a”. Nai lalaneꞌ ia, Yohanis dedea laꞌeneuꞌ lahenda bubua rupaꞌ, fo ta dadi masoꞌ leo nusatetu-ikutemaꞌ a reu. Masososaꞌ a riꞌ, “lahenda fo ta ramahere Ramatuaꞌ a”. De ia nana ta tutui laꞌeneuꞌ busa a masoꞌ leo nusatetu-ikutemaꞌ a neu, do taꞌa.
✡22:16 Yesaya 11:1, 10
✡22:17 Yesaya 55:1
✡22:19 Tui Seluꞌ Laꞌe Neuꞌ Eno Sodaꞌ a 4:2; 12:32