9
Ramatua Yesus puli na lahenda lukuꞌ esa
(Markus 2:1-12; Lukas 5:17-26)
1 Basa de Yesus asa saꞌe ra seluꞌ ofaꞌ a, fo leo dano seriꞌ reu, boe ma ara losa Ria kota Na. 2 Nai naa lahenda rolo reni sira nonoon lukun, leo Ria neu. Yesus nita leo naꞌ boe ma Ana bubuluꞌ nae, ara ramahere Ni bisa puli na sira nonoon ria. Boe ma Ana dedea neuꞌ lahenda lukuꞌ ria nae, “Ana Ki on! Matetea dale ma dei! Huu fo Au sae-safe heni o sala-sikom so.”
3 Tehuu mesen agama Yahudi hida rai naa, ramanene Yesus dedean ria. Boe ma dale nara hanas a, de bei dea rae, “Lahenda ia naparani laiesaꞌ dedea leo naꞌ! Noi Manetualain riꞌ bisa fee ampon neuꞌ lahenda sala-sikon. Tehuu lahenda ia dedea na, tao aon sama leoꞌ ria nana Manetualain. Ana namumulu-namamaeꞌ Manetualain ria so!”
4 Tehuu Yesus bubuluꞌ sira dale na. Boe ma Ana dedea nae, “Ubeaꞌ taon de emi afi mae, Au dedea namumulu-namamaeꞌ? 5 Muda na riꞌ ubeaꞌ? Maneniko Au afada lahenda lukuꞌ ia ae, ‘O sala-sikom hapu ampon so,’ do, Au ae, ‘Foa fo fali leo.’ 6 Maneniko ana foa tutiꞌ a, besaꞌ ko emi mita buti mae, Au nana, Ana Lahenda. Huu fo Au anuu haak fee ampon neuꞌ lahenda sala-sikon.”
Boe ma Yesus pareta lahenda lukuꞌ ria nae, “Foa leo! Hai muni mamana napeu ma, fo fali leo!”
7 Lahenda lukuꞌ ria foa tutiꞌ a, de ana fali neun. 8 Basa lahenda ra rita leo naꞌ, boe ma ara heran. Ara io-oa Manetualain nade Na rae, “Manetualain marela-masaꞌa naan seli! Ana fee kuasa bau-ina leo iaꞌ neuꞌ lahenda nai dae-bafoꞌ a so.”
Ramatua Yesus naloo Mateos fo tuka Ni
(Markus 2:13-17; Lukas 5:27-32)
9 Yesus laꞌo neme naaꞌ mai, boe ma nita lahenda mana susu bea esa, nai mamana sususu bea. Ria nade, Mateos. Yesus leleꞌon nae, “Mai tuka Au!” Mateos namanene leoꞌ na, boe ma foa de neu tuka tutiꞌ Ana.
10 Boe ma Mateos hule Yesus asa mai raa-rinu nai uma na. Ana hule nonoo mana susu bea nara, ma fui fekeꞌ ara boe, fo mai raa-rinu sama-sama roo si.
11 Tehuu lahenda hida reme partei Farisi a, mai ramuu-radau nai Yesus ana mana tuka dea nara rae, “Ubeaꞌ taon, de emi mesen ma natuuꞌ naa-ninu sama-sama noo lahenda masala-masikoꞌ ara, leo-leoꞌ mana susu bea ra, ma sira tia-lai lahenda tadalu nara?”✡ Lukas 15:1-2
12 Tehuu Yesus nafada si nae, “Tebe lahenda kamahedis ara parluu doter. Tehuu lahenda sodaꞌ a ta parluu soꞌ. 13 Malole lenaꞌ emi fali fo lees matalolole Manetualain Dedea-nafadan, fo riꞌ fai a ulu na Ana nadenu mana nesi matan Hosea duiꞌ nae,
‘Au hihii-nanau Ki, riꞌ,
Au lahenda kara rasue-ralai ao ma ratudu dale kasian ara.
Maneniko ara ta tao leo naꞌ, sona,
sira banda tutunu-hohotun fo riꞌ reni fee Au a,
ta nanuu sosoa-raraaꞌ hata-hata esa boeꞌ.’
Ria riꞌ Manetualain nafada nae. Huu ria na, Au ta mai urus lahenda fo tao ao nara dadi lahenda roos, tehuu Au mai urus lahenda masala-masikoꞌ ara.”✡ Mateos 12:7; Hosea 6:6
Lahenda ratane, ubeaꞌ taon de Ramatua Yesus ana mana tuka dea nara ta puasa
(Markus 2:18-22; Lukas 5:33-39)
14 Boe ma Yohanis Mana Saraniꞌ a ana mana tuka dea nara leo Yesus reu. Ara ratane rae, “Ami fo tuka Yohanis a, biasa puasa. Lahenda Farisi ra boe puasa. Tehuu ubeaꞌ taon, de Papa ana mana tuka dea mara raa-rinu raroo? Ara ta puasa ralelaꞌ fa, do?”
15 Tehuu Yesus nataa si, pake nasasamaꞌ nae, “Leo iaꞌ: maneniko feta kakabiꞌ, fui ra ta puasa fa, tehuu ara raa-rinu rabete. Maneniko mana kabi touꞌ a bei nai naa, tantu ara raa-rinu. Tehuu maneniko laiꞌ esa nai ria lahenda fekeꞌ ara hopu roo mana kabi touꞌ a, boe ma tia-lai nara susa dei, faiꞌ ria besaꞌ ko ara puasa.
16 Lahenda ta hai na temaꞌ bibia bebeuꞌ, fo tapa neuꞌ badu paraa saiꞌ a. Huu fo maneniko safe badu ria, temaꞌ bebeu manatapaꞌ a uꞌulu. No ria na badu paraaꞌ a sii nambera.
17 Leoꞌ na boe, lahenda ta isi tua nasu beuꞌ neuꞌ hai paraaꞌ daleꞌ. Huu fo neuꞌ ko haiꞌ ria hean, boe ma tua nasu a nosi henin. De tua nasu beuꞌ a muste disin leo hai bebeuꞌ daleꞌ neu, fo ela haiꞌ a bosoꞌ hean ma tua nasuꞌ a ta nosi henin!”* Dudui dedea Yunani teaꞌ a nae, “Bosoꞌ sali oe anggor bebeuꞌ leo tas paarou paraaꞌ daleꞌ neu, te bosoꞌ losa hean fo sii henin.” [No ria na, Yesus nanori si nae Ria nanori-nafadan, bebeuꞌ. De bosoꞌ epo-seoꞌ ana no nanori-nafada paraaꞌ.]
Ramatua Yesus puli na inaꞌ esa poꞌa-poꞌa mesan daa, ma fee ana fetoꞌ esa nasoda seluꞌ
(Markus 5:21-43; Lukas 8:40-56)
18 Yesus bei dedea no Yohanis ana mana tuka dea nara, te malaka uma mamaso Yahudi esa mai naneta no Ni. Lahenda ria sundaꞌ undulaka na neuꞌ Yesus matan, fo hule nae, “Papa, ee! Tulu-fali dei! Huu fo au ana feto ka besaꞌ ko maten. Papa mai fo fua lima ma neuꞌ ana dei, ela bisa nasoda seluꞌ.”
19 Yesus namanene leoꞌ na, boe ma no ana mana tuka dea nara tuka tutiꞌ lahenda ria.
20-21 Inaꞌ esa tuka no si rai eno taladaꞌ. Ana poꞌa-poꞌa mesan daa teuꞌ sanahulu dua, ta teꞌe matetuꞌ fa. Ana afi nai dale na nae, “Sadi au bisa afaroe laꞌe Yesus badu na, tantu au teꞌe a ao ki.” Huu ria na, de ana neu nafaroe Yesus badu peda na.
22 Yesus nameda naan, boe ma Ana lipe aon fo mete inaꞌ ria. Ana dedea nae, “Ana Ki on! Matetea dale ma. Huu fo o mamahere tebe-tebe neuꞌ Au, de o teꞌe ma aom.” No besaꞌ ria boe, inaꞌ a teꞌe tutiꞌ a.
23 Yesus asa laꞌo raroo leo malaka uma mamaso Yahudi a, uma na reu. Losa naa boe ma Ana masoꞌ leo uma daleꞌ neu, ma nita mana mamina musik luumata-pinuiduꞌ, ma lahenda dodouꞌ dola. 24 Tehuu Yesus nafada si nae, “Emi hahae dodolaꞌ a, fo fali leo! Huu fo anaꞌ ia ta maten fa, ana suku ria.” Tehuu ara hiꞌa ma peko bafa nara ro Ni.
25 Basa lahenda sira kalua, boe ma Yesus masoꞌ leo anaꞌ ria kaman daleꞌ neu, ma tai na lima na. Boe ma anaꞌ ria nasoda seluꞌ. 26 Lahenda ra rita leoꞌ na, boe ma ara mulai ratuiꞌ rule-feo sira nusa-namon laꞌe-neuꞌ hata fo Yesus tao a.
Ramatua Yesus puli na lahenda pokeꞌ dua
27 Basa boe ma Yesus laꞌo naroo. Nai eno taladaꞌ, lahenda pokeꞌ dua tutukaꞌ Ana. Ara raloo bou-bou rae, “Mane Daud tititi-nonosin! Kasian neuꞌ ami dei!”
28 Yesus masoꞌ uma daleꞌ neu, boe ma lahenda poke kaduaꞌ sira mai. Ana natane si nae, “Emi mamahere tebe-tebe, mae Au anuu kuasa fo tao emi bisa mita-dae?”
Ara rataa rae, “Awii! Papa bosoꞌ matane bali, huu fo ami mamahere tebe-tebe neuꞌ Papa.”
29 Yesus namanene leoꞌ na, boe ma Ana nafaroe sira mata nara, ma dedea nae, “Kalu leoꞌ na, sona ela dadi tuka emi namahere ma!” 30 Yesus dedea basa leoꞌ na, boe ma ara rita-dae tutiꞌ a. Yesus nafarereneꞌ fee si nae, “Mafarereneꞌ. Emi bosoꞌ mafada lahenda hata mana dadiꞌ ia!”
31 Tehuu ara ta bisa ranenete fa. Boe ma ara laꞌo rule-feo nusaꞌ ria fo tui-beka laꞌe-neuꞌ Yesus nonoi-tataon.
Ramatua Yesus puli na lahenda pakanaaꞌ
32 Lahenda poke kaduaꞌ sira kalua, boe ma lahenda roo lahenda fekeꞌ esa leo Yesus neu. Lahenda ria ta bisa nadedea fa, huu fo nitu a heke naan. 33 Yesus nita leoꞌ na, boe ma Ana pareta nitu a kalua neme lahenda ria mai. Nitu a kalua boe ma lahenda ria bisa nadedea tutiꞌ a. Basa lahenda fo rai naa, ara heran, ma rae, “Awii! Ami lahenda Yahudi a bei ta parnaa mita leo iaꞌ fa!”
34 Tehuu lahenda Farisi ra dale nara ta loaꞌ a. Ara dedea rae, “Ae! Nitu ra malaka na riꞌ feen kuasa fo ela Ana bisa usi kalua nitu.”✡ Mateos 10:25; 12:24; Markus 3:22; Lukas 11:15
Ramatua Yesus nita lahenda dodouꞌ boe ma kasian neuꞌ asa
35 Basa de Yesus laꞌo rule-feo kota ma koroꞌ dodouꞌ, fo nanori-nafada nai uma mamaso Yahudi ra. Ana nanori-nafada lahenda laꞌe-neuꞌ Manetualain Tutui Malole Na, ma tao leoꞌ bea fo ara bisa dadi reuꞌ Ria lahendan. Ana puli na basa hedis rupaꞌ ara, ma lahenda luku-lakaꞌ ara boe.✡ Mateos 4:23; Markus 1:39; Lukas 4:44 36 Yesus nita lahenda kadodouꞌ sira, boe ma Ana kasian neuꞌ asa, huu fo ara ta bubuluꞌ rae tao leo beaꞌ. Nana huu sira basa sama leoꞌ bibi-lopo fo ta ranuu mana foo.✡ Susura Dudui Nadeꞌ a 27:17; 1 Maneꞌ ara 22:17; 2 Israel no Yahuda Tutui na 18:16; Yeskial 34:5; Sakaria 10:2; Markus 6:34 37 Boe ma Yesus dedea no ana mana tuka dea nara nae, “Lahenda kadodouꞌ ia ra, sama leoꞌ oka-tine a buna-boan. Leo mae buna-boan dodouꞌ, tehuu lahenda mana noi ta dai fo etu-oru buna-boaꞌ sira, ma peda si reuꞌ mamana pepeda-fufuaꞌ. 38 Huu ria na, emi muste hule Manuu okaꞌ a fo fee lahenda mana noi seluꞌ, fo ela ara reu rabubua ra Ria buna-boa nara.”✡ Lukas 10:2
✡9:13 Mateos 12:7; Hosea 6:6
*9:17 Dudui dedea Yunani teaꞌ a nae, “Bosoꞌ sali oe anggor bebeuꞌ leo tas paarou paraaꞌ daleꞌ neu, te bosoꞌ losa hean fo sii henin.”
✡9:34 Mateos 10:25; 12:24; Markus 3:22; Lukas 11:15
✡9:35 Mateos 4:23; Markus 1:39; Lukas 4:44
✡9:36 Susura Dudui Nadeꞌ a 27:17; 1 Maneꞌ ara 22:17; 2 Israel no Yahuda Tutui na 18:16; Yeskial 34:5; Sakaria 10:2; Markus 6:34