1-2 Tepoꞌ ria, lahenda Ismael sira ro Yusuf leo Masir reu. Nai naa, hapu lahenda bauinaꞌ esa, nade Potifar. Ria nana malaka neme basa soldadu fo ranea mane Masir uma mana pareta na. Potifar asa na Yusuf nemeꞌ papalele sira mai, dadi ata nai ria uma na. Nai naa, MANETUALAIN tulu-fali Yusuf, losaꞌ ria nonoi-tataon basan dadi no malole. 3 Malaka na nita Yusuf nonoi-tataon malole a, boe ma ana bubuluꞌ matetuꞌ nae MANETUALAIN tulu-fali Yusuf. 4 Huu ria na, de malaka na nahiiꞌ Yusuf, ma namahere ni. De, ana soꞌu naa Yusuf dadi mandor nai uma na. Ana fee Yusuf urus ria uma na, ma basa hata posaka nara boe. 5 Mulai neme Yusuf dadi mandor nai naa, Manetualain boe fee ua-naleꞌ neuꞌ malakan, lahenda Masir ria. Ria uma isi nara, ria hata posakan, ria oka-tinen, ma ria nonoi-tataon, basan dadi no malole. 6 Potifar nita Yusuf urus basa nonoi-tataoꞌ no malole, de ana ta afi hata-hata esa boeꞌ, nalelaꞌ adaꞌ noi naa-ninuꞌ a.

Tepoꞌ ria, Yusuf lole na seli. 7 Ana leo nai naa, bei ta dooꞌ a fa, te Potifar sao na nahiiꞌ ana. Boe ma ana leleꞌo Yusuf fo dua si suku rabuaꞌ.

8 Tehuu Yusuf ta nataa fa, de ana sipoꞌ nae, “Bosoꞌ tao leo naꞌ, mama! Au malaka ki Potifar fee au kuasa so, fo urus ria nonoi-tataon katemaꞌ. 9 Nai uma ia, ta hapu lahenda fo homu kuasa lena au soꞌ. Huu fo malaka a fee au urus basa-basan so. Adaꞌ noi mama ka, sona taꞌa. Tao leoꞌ bea fo au bisa tao tadaluꞌ leo naꞌ! Nonoi leo naꞌ a, nalenalaka Manetualain hihii-nanaun so!”

10 Leo mae leoꞌ na boe, tuka-tuka faiꞌ, malaka ria sao na leleꞌo naroo Yusuf. Tehuu Yusuf ta tao daleꞌ neuꞌ ana fa. 11 Laiꞌ esa de Yusuf leo uma daleꞌ neu, fo nau memete ria nonoi-tataon. Faiꞌ ria, ta hapu lahenda fekeꞌ nai uma fa. 12 Boe ma ria malaka na sao na mai, de lobeꞌ na Yusuf badu na ana hela ni, boe ma nae, “Mai leo! Besaꞌ ia ela noi ita dua so. Mai fo ita dua teu tapeuꞌ leo.”

Tehuu Yusuf ta nataa fa. Basa de ana naule, losaꞌ posu heni badu na. Boe ma ana nalai deaꞌ neu. Tehuu inaꞌ a bei hopu nahere badu ria.

13 Potifar sao na nita Yusuf nalai ela badu na, 14-15 boe ma ana naloo lahenda mana noi nara, de nafada nae, “Ae! Emi mai mitaꞌ ia dei! Bisinaaꞌ a tou Ibrani ria, ana masoꞌ leo au kama ka daleꞌ mai. Ana nau tao tadadalu au, tehuu au aloo ambera ina, boe ma ana nalai deaꞌ neu. Mitaꞌ ia dei, ana foa ela badu na riaꞌ. Au sao ka noo lahenda manori-taaꞌ ia mai, fo tao namamaeꞌ ita!”

16 Potifar sao na homu nahere badu ria losaꞌ sao na fali main. 17 Ana tui nae, “Aꞌa, e! Touꞌ Ibrani fo riꞌ aꞌa ka moon mai a, bisinaaꞌ a ana masoꞌ leo au kama ka daleꞌ neu so, fo nau hohoke au! 18 Tehuu au aloo ambera ina lahenda ra. Basa de ana nalai neu fuiꞌ, de foa ela badu na riaꞌ.”

19 Potifar namanene sao na tui nae leoꞌ na, boe ma ana namanasa nan seliꞌ. 20 De ana pareta lahenda ra reu hopu ra Yusuf. Boe ma ara teen leo maneꞌ a uma huhukun daleꞌ neu.

21 Tehuu MANETUALAIN ta nafarene heni Yusuf fa, Ana tulu-fali naroo ni losaꞌ uma huhukuꞌ ria malaka na boe nahiiꞌ na Yusuf seli. 22 Ana namahere Yusuf. Huu ria na, de ana fee Yusuf urus basa lahenda manahukuꞌ ara, ma basa nonoi-tataoꞌ nai naa. 23 Huu ria na malaka a ta laka hediꞌ urus hata-hata esa nai uma huhukuꞌ ria soꞌ. MANETUALAIN tulu-fali naroo Yusuf, de basa nonoi-tataoꞌ nai uma huhukuꞌ ria, dadi malole.