1-3 Tepoꞌ ria, Abram fali neme Masir mai, de leo teuꞌ sanahulu nai Kanaꞌan so. Sao ni Sarai bei ta hapu anaꞌ fa. Sarai nanuu ata inaꞌ esa, lahenda Masir, nade Hagar.

Laiꞌ esa boe ma, Sarai dedea no Abram nae, “Papa! MANETUALAIN ta fee au boki soꞌ. Malole lenaꞌ papa ka mu suku moꞌ au ata ki Hagar, ela ana boki fee au.”

Boe ma Abram tuka sao na nafada na. Basa de Sarai fee Hagar leo Abram neu fo dadi sao muri na. 4 Basa de, Abram neu suku noꞌ Hagar, boe ma inaꞌ ria nairu. Tehuu Hagar bubuluꞌ nae ana nairu so, boe ma ana koa ao, de ta hika-hadaꞌ neuꞌ Sarai.

5 Boe ma Sarai dedea no Abram nae, “Au riꞌ fee ata ria fo dadi neuꞌ sao muri ma. Tehuu inaꞌ ria bubuluꞌ nae nairu, boe ma ana ta hika-hadaꞌ au soꞌ. Basa ia ra nana o salam. Nemeꞌ na fo MANETUALAIN naetuꞌ ita dua dedea na. Besaꞌ ko o bubuluꞌ!”

6 Abram nataa nae, “Leo iaꞌ! O ia, nana au sao ulu ka. Tehuu ria adaꞌ noi sao muriꞌ! De o riꞌ pareta ni. De o mae tao ni leoꞌ bea, nemeꞌ o mai!” Boe ma Sarai piruꞌ-piru no Hagar, losaꞌ ana nalai heni aon.

7 Hagar nalai losa nai manana lino-nees. Boe ma MANETUALAIN eilaꞌo-limalopen esa neme nusatetu-ikutemaꞌ a mai, naneta noo ni naneneaꞌ oe mataꞌ nai enoꞌ fo leo Sur neu. 8 Basa de ana nae, “Ae! Hagar, Sarai atan! Ubeaꞌ taon de o nai ia? O meme beaꞌ mai, ma sakaꞌ leo beaꞌ mu?”

Hagar nataa nae, “Au alai ela au ina mane ka!”

9 Boe ma MANETUALAIN eilaꞌo-limalopen oꞌoe ni nae, “Leo iaꞌ! Malole lenaꞌ o fali seluꞌ leo ina mane ma mu. Ana tao o leoꞌ bea boe, moi sipo-sipoꞌ a. 10 O bosoꞌ bii. Neuꞌ ko au tao a o tititi-nonosi mara ramefu, losaꞌ lahenda ta bisa reke rala si. 11 Besaꞌ ia o mairu so. Ta dooꞌ a soꞌ, te o boki ma ana touꞌ esa. O muste foin nade, Ismael, (hiiꞌ nae sama leoꞌ dedea fekeꞌ esa sosoa na nae, ‘Manetualain namanene’), nana huu MANETUALAIN namanene o dodola ma so. 12 Tehuu anaꞌ ria nambau-ina mai, ana nasoda dooꞌ a neme toranoo nara mai. Huu fo ria sama leoꞌ dara fuiꞌ, de ta namanene nalelaꞌ pareta. Ana soaꞌ sudi bea a. Ma basa lahenda ra soaꞌ seluꞌ ana.”

13 Hagar namanene basa dedeaꞌ sira, boe ma ana dodoo neuꞌ dale na nae, “Au ita MANETUALAIN so, fo riꞌ Ana relu-natanae au.” Basa de, ana mulai naloo neuꞌ Manetualain pake nadeꞌ, “Ramatuaꞌ fo riꞌ nafaduli au.” 14 Huu ria na, de lahenda ra ranade oe mataꞌ ria rae, Beer Lahai Roi, sosoa na nae, “Oe mataꞌ nemeꞌ Ria fo masodaꞌ, riꞌ nafaduli au.” Oe mataꞌ ria mamana na, nai koro Kades no Beret talada. Oe mataꞌ ria bei nai naa, losaꞌ besaꞌ ia.

15 Basa ria boe ma, Hagar fali neun. Boe ma boki na ana touꞌ esa. Abram foin nade, Ismael. 16 Hagar boki Ismael nana, Abram teun faluhulu nee so.