1 Tepoꞌ ria, lahenda ra boe-boe tamba. Ara kofela basa mamanaꞌ nai dae-bafoꞌ a. Ara boki ra ana inaꞌ boe. 2 Manetualain ana tou nara* ‘Manetualain ana tou nara’ bea sira, ta makaledoꞌ a fa. Hapu lahenda malelaꞌ ruma rae, sira nana maneꞌ ara ana nara. Hapu ruma rae sira nana, lahenda reme masodaꞌ fo ta lahenda fa. Hapu ruma afi rae, sira nana Manetualain eilaꞌo-limalopen reme nusatetu-ikutemaꞌ a mai. Tehuu ta hapu esa bubulu matetuꞌ boeꞌ. rita lahenda a ana feto nara napuꞌ mesan. Boe ma ara reu sao ra ana fetoꞌ fo rahiiꞌ asa a. 3 Boe ma MANETUALAIN nae, “Au sotaꞌ no lahenda ia ra masoda taohiro-taohari nara so. Au Dula-dale Ka fo riꞌ fee si sodaꞌ a, ta nau fee si rasoda raroo soꞌ.† Dedea Ibrani nai ia, ta makaledoꞌ fa. Ara muste mate. De neuꞌ ko ara rasoda losa adaꞌ noi teuꞌ natun esa dua huluꞌ a.”

4 Tepo-leleꞌ ria, ma tepo-leleꞌ mabuiꞌ ara, hapu lahenda parnaka-ina rai dae-bafoꞌ a.‡ Dedea Ibrani a nae, ‘lahenda Nefil ara’. Tehuu sosoa na, ta makaledoꞌ fa. Manetualain ana tou nara sao ra lahenda dae-bafoꞌ a ana feto nara, boki ra lahenda kahereꞌ ara, siꞌ parani musu manade nai tutui fai uluꞌ ara.

5 Tepoꞌ ria, MANETUALAIN nita lahenda dae-bafoꞌ a tadalu nara talalu so. Sira dale nara afi raroo adaꞌ noi tadaluꞌ. 6 Boe ma MANETUALAIN nasale dale adu naa si fo leo rai dae-bafoꞌ ia. No enoꞌ ria, riꞌ tao na dale Na hedis naan seli. 7 Huu ria na, Ana dedea nae, “No leo naꞌ a, neuꞌ ko Au tao alulutuꞌ lahenda fo riꞌ Au adu aa si rai dae-bafoꞌ ia so. Manupuiꞌ ara ma banda fekeꞌ ara boe, Au tao alulutuꞌ katemaꞌ asa. Huu fo Au asale dale adu a si so.” 8 Tehuu adaꞌ noi Noh riꞌ tao na MANETUALAIN dale na namahoꞌo.

9-10 Noh tutui na leo iaꞌ: Ria ana toun telu, siꞌ Sem, Yafet ma Ham. Noh nasoda roo-tetuꞌ, ta tao tadaluꞌ fa. Tepoꞌ ria adaꞌ noi ria riꞌ malole. Ana nasoda naneneaꞌ no Manetualain.

11-12 Tehuu Manetualain nita basa lahenda fekeꞌ ara basan tadaluꞌ. Nai bea-bea oo, lahenda eno masoda nara tadalu raan seli. Manetualain nita adaꞌ noi lahenda dae-bafoꞌ a tadalu nara. 13 Basa de Manetualain nafada Noh nae, “Nai mamanaꞌ bea-bea oo, Au ita adaꞌ noi lahenda a tadalu nara. De Au aetuꞌ so ae, Au nau tao alulutuꞌ dae-bafoꞌ ia no basa oe-isin. 14 De leo iaꞌ, Noh! Besaꞌ ia o tao ma ofa bau-inaꞌ esa, neme ai matea a mai. Nai ofaꞌ a daleꞌ, o tao kama dodouꞌ. Basa nanadudu dama neuꞌ ofaꞌ a. 15 O tao ofaꞌ a nanaru naa meter natun esa telu hulu telu; loloa na meter duahulu dua; ma dedema na meter sanahulu telu. 16 Tao puniꞌ neuꞌ ofaꞌ a. Tehuu fee puniꞌ ria doo a baiꞌ neme dindi a lain mai, ee meter seseriꞌ esa. O bati ofaꞌ a neuꞌ tadaꞌ telu. Basa sona tao lelesu esa nesiꞌ poo na.

17 Mafarereneꞌ matalolole! Neuꞌ ko Au aonda faa ina, fo namate basa-basa masodaꞌ ara rai dae-bafoꞌ ia, losaꞌ ta ela hata esa boeꞌ. 18 Tehuu Au nau heke hehelu-barataa ia neuꞌ o. Neuꞌ ko o masoꞌ leo ofaꞌ a daleꞌ mu, sama-sama mo sao ma, ma ana-manafeu mara.

19-20 Neme basa banda ra, o muste mu hai ma pasang be esaꞌ, muni si leo ofaꞌ daleꞌ reu, ela ara rasoda sama-sama roo o. Leo-leoꞌ banda aeꞌ, manupuiꞌ ara, ma banda manlodo-manraeꞌ ara, fo ela basa si rasoda. 21 O muste muni nanaa rupaꞌ ara, leo ofaꞌ a daleꞌ neu, soaneuꞌ emi, ma soaneuꞌ banda-manuꞌ ara.”

22 Noh namanene leoꞌ na, boe ma ana tao tuka Manetualain pareta Na katemaꞌ.