1 Ae! Lahenda Galatia emin! Maulu na au riꞌ afada mataꞌ emiꞌ, laꞌeneuꞌ Yesus Kristus mamate Na nai ai kake a so. Tehuu besaꞌ ia lahenda edi-fule mamataꞌ emi! Emi pakanaa man seli! 2 Au nau atane noi hal esa. Emi sipo Manetualain Dula-dale Na, nana huu emi tuka atoran agama a, do? Taꞌa, hete! Ria Dula-dale Na onda neuꞌ emi, nana huu emi mamahere Tutui Malole fo mamanenen a. 3 Ubeaꞌ taon, de emi pakanaa man seliꞌ leoꞌ na? Maulu na emi masoda tuka Dula-dale Malalao-malalafuꞌ a hihii-nanaun so. Tehuu besaꞌ ia emi matafali seluꞌ fo masoda tuka lahenda dae-bafoꞌ a hihii-nanaun. 4 Tepoꞌ fo emi besaꞌ ko mulai mamahere Kristus, emi hapu eese-rurumuꞌ dodouꞌ. Boso losa basa sira dadi reuꞌ sosoa-raraa taaꞌ! (Sekona te, mamahere Kristus ta bisa sosoa-raraa taaꞌ fa.) 5 Tepoꞌ fo Manetualain fee Dula-dale Na, ma natudu tanda heran rupaꞌ ara nai emi matam, emi afi mae Ana tao leo naꞌ, nana huu emi tuka atoran agama a, do? Taꞌa, hete! Ana tao leo naꞌ, nana huu emi mamahere Tutui Malole fo mamanenen a.

6 Mafarene lahenda Yahudi ra baꞌin, Abraham. Manaduiꞌ nai Manetualain Susura Makamoi Na nae, “Huu no namahere Manetualain, de Ana sipoꞌ nan no malole.”✡ Tutui Masososaꞌ 15:6; Roma 4:3

7 De, emi muste bubuluꞌ matalolole hal ia! Lahenda fo namahere sama leoꞌ Abraham, sona tebe-tebe sira dadi reuꞌ Manetualain lahendan.* Susura Makamoiꞌ dedea Yunani teaꞌ a manaduiꞌ nae, “ara dadi reuꞌ Abraham ana nara”. Lahenda Yahudi ra biasa rae, ‘Abraham ana nara’ sosoa na nae, ‘Manetualain lahenda nara’. Meten nai Roma babati kahaan lalane kasanahulu neen. 8 Manetualain nafada memaꞌ nai Ria Susura Makamoi Na daleꞌ nae, neuꞌ ko Ana sipoꞌ lahenda nusa fekeꞌ ara boe, kalu ara ramahere Ni. Fai a ulu na, Ana nafada memaꞌ Tutui Malole a neuꞌ baꞌi Abraham nae, “Neuꞌ ko basa lahenda nusaꞌ nai dae-bafoꞌ a hapu ua-naleꞌ nana huu o.”✡ Tutui Masososaꞌ 12:3 9 Huu no Manetualain hehelu-barataa Na, de Ana fee ua-naleꞌ neuꞌ basa lahenda fo ramahere Ni, sama leoꞌ Ana fee neuꞌ Abraham.

10 Lahenda fo tuka atoran agama, ela Manetualain sipoꞌ ana no malole, sona ana muste lepa beraꞌ atoran sira katemaꞌ, sama leoꞌ ana hapu kutuk. Manaduiꞌ nai Susura Makamoiꞌ a daleꞌ nae, “Lahenda fo ta tuka naroo atoran agama a losa leo lulutu-raraen, ana hapu kutuk!”✡ Tui Seluꞌ Laꞌe Neuꞌ Eno Sodaꞌ a 27:26 11 Tehuu tea na, Manetualain ta sipoꞌ lahenda, nana huu ana tuka atoran agama. Huu fo manaduiꞌ nae, “Lahenda muste namahere Au, besaꞌ ko Au sipoꞌ ana no malole sama leoꞌ lahenda dale roos, ela ana hapu soda matetuꞌ.”✡ Habakuk 2:4

12 Maneniko lahenda nau nasoda tuka atoran agama a hihii-nanaun, ana muste tao tuka basa-basan losa lulutu-raraen! Manetualain nafada memaꞌ nai Susura Makamoiꞌ a nae, “Lahenda fo nau nasoda tuka atoran a, neuꞌ ko ana nasapute adaꞌ noi atoran sira.”✡ Malaka Agama ra Atoran 18:5

13 Tehuu Kristus bae etu so, de poꞌi-tata na ami meme atoran agama fo riꞌ nanahekeꞌ neuꞌ ami. Maulu na, atoran agama ria beraꞌ na seli bati neuꞌ ami sama leoꞌ lahenda fo hapu kutuk. Tehuu besaꞌ ia, Ramatua Yesus soꞌu heni kutuk ria neme ami mai so. Ita bubuluꞌ ria nana huu manaduiꞌ nai Susura Makamoiꞌ a nae, “Lahenda fo manalonda naisaꞌ nai ai sele a, ana hapu kutuk.”✡ Tui Seluꞌ Laꞌe Neuꞌ Eno Sodaꞌ a 21:23 14 Tepoꞌ fo Yesus Kristus maten, ela fee ita sodaꞌ a, ua-naleꞌ fo Manetualain feen neuꞌ Abraham, onda nai lahenda nusa fekeꞌ ara boe. No ria na, basa lahenda fo ramahere Kristus bisa sipoꞌ Manetualain Dule-dalen fo Ana helu a.

15 Toranoo kara emin! Besaꞌ ia au nau pake natutuduꞌ esa, neme ita masoda fai-fai na mai. Maneniko lahenda duiꞌ na susura hata posakaꞌ, boe ma ana lima ree nade na neuꞌ susuraꞌ ria, sona dadi neuꞌ susuraꞌ teteaꞌ so. Lahenda fekeꞌ ta bisa ratika hata fo manaduiꞌ nai susuraꞌ ria, ma ta bisa duiꞌ tamba seluꞌ hata-hata esa neu boeꞌ. 16 Leoꞌ na boe, tepoꞌ fo Manetualain heke hehelu-barataaꞌ neuꞌ Abraham no tititi-nonosi nara. Manetualain ta nae, “Au tao hehelu-barataaꞌ ia, oo tititi-nonosi mara”, nana huu Ana ta helu-barataa soaneuꞌ lahenda dodouꞌ fa. Tehuu Ana helu-barataa fee noi Abraham tititi-nonosin lahenda esaꞌ a, riꞌ Kristus.† Susura Makamoiꞌ dedea Yunani nai ia manaduiꞌ nae, “ta nae ‘tao hehelu-barataaꞌ neuꞌ o bini-kee mara’, tehuu ‘neuꞌ o bini-keem”. Nai hehelu-barataaꞌ ia daleꞌ, dedea Yunani “bini-kee” sosoa na nae, “tititi-nonosiꞌ”. Meten nai Tutui Masososaꞌ babati kasanahulu duan lalane kahitun. 17 Leo iaꞌ: Manetualain tao nauluꞌ hehelu-barataaꞌ noo baꞌi Abraham. Boe ma teuꞌ natun haa telu hulu, besaꞌ ko Ana naonda atoran agama fee lahenda Yahudi ra, tuka sira baꞌin Musa. Leo mae leoꞌ na, tehuu Manetualain ta natika hehelu-barataaꞌ, fo Ana tao nauluꞌ ana a.✡ Kalua reme Masir 12:40 18 Manetualain ta fee Abraham ua-naleꞌ, nana huu ana tao tuka atoran a. Tehuu Ana fee ua-naleꞌ nana huu Ana helu memaꞌ neme uluꞌ mai, nau fee hihiiꞌ neuꞌ Abraham. Ria sama leoꞌ anaꞌ esa sipo posaka neme papa na mai. Ana sipo nana huu papa na helu memaꞌ, ta huu anaꞌ ria tao tuka atoran a fa.✡ Roma 4:14

19 Besaꞌ ia au atane leo iaꞌ: maneniko Manetualain sipoꞌ baꞌi Abraham no malole, nana huu ana namahere, tao leoꞌ bea de Manetualain fee tamba atoran agama tuka baꞌi Musa bali? Ana tamba atoran agama, fo nanori lahenda dae-bafoꞌ a laꞌeneuꞌ sira sala-siko rupa nara. Ria dale na nae ela lahenda dae-bafoꞌ a nasoda tuka atoran ria hihii-nanaun, losa Abraham tititi-nonosi kaesa ni ria mai. Maneniko tititi-nonosiꞌ ria, riꞌ Kristus mai, sona ta parluu atoran ria soꞌ.

Tepoꞌ fo Manetualain fee atoran agama Yahudi a, Ana ta fee mataꞌ fa. Tehuu Ana pake eilaꞌo-limalope nai nusatetu-ikutemaꞌ a, boe ma ara renin mai de feen neuꞌ baꞌi Musa lima na, besaꞌ ko Musa fee ni leo lahenda Yahudi ra reu. No ria na, Musa dadi lelete soaneuꞌ Manetualain noo Ria lahenda nara. 20 Tehuu tepoꞌ fo Manetualain tao hehelu-barataaꞌ noo Abraham, Ana nafada matan ta nadenu lahenda fa. No ria na, ita bubuluꞌ tae, Manetualain hehelu-barataan, kahereꞌ lena nemeꞌ atoran sira mai.

21 Atoran fo Manetualain feen neuꞌ baꞌi Musa ta naseiꞌ noo Ria hehelu-barataan fa. Tehuu leo iaꞌ: kalu tebe-tebe lahenda dae-bafoꞌ a bisa tao tuka atoran ria tantu Manetualain bisa sipoꞌ ana noo malole, fo ela ana bisa nasoda, sona atoran lahenda Yahudi ra bisa paken. Tehuu ta bisa fa, nana huu leo mae lahenda dae-bafoꞌ a tao tuka atoran lahenda Yahudi ra, ta hapu esa tao laꞌe Manetualain dale Na, ela Ana sipoꞌ nan noo malole. 22 Nai Manetualain Susura Makamoi na manaduiꞌ nae, basa lahenda dae-bafoꞌ a nanaheke naisaꞌ noo sala rupaꞌ ara. Huu ria na, de noi lahenda fo namahere Yesus Kristus, riꞌ bisa sipo hata fo Manetualain helu basa so a.

23 Tepoꞌ fo Kristus bei ta mai fa, ami lahenda Yahudi a nanaheke naisaꞌ noo atoran sira, losaꞌ ta bisa poꞌi ma ao mara fa. Tehuu losa ledo-fain te, Manetualain soi enoꞌ, ela ami ao mara loan neme atoran sira mai, kalu ami mamahere Kristus. 24-25 De, atoran agama sira sama leoꞌ manea a, nanori natalolole ita losaꞌ Kristus mai. Tehuu maneniko Ana mai, sona besaꞌ ko ita tamahere Ni, ela Manetualain sipoꞌ ita. Huu ria na, de besaꞌ ia ita ta parluu manea ria soꞌ.

26 Besaꞌ ia emi dadi meuꞌ Manetualain ana nara, nana huu emi mamahere Yesus Kristus. 27 Emi basa sarani so, ela dadi meuꞌ Ria lahendan, boe ma nanaheke naisaꞌ moo Ni. 28 Basa lahenda fo ramahere Kristus nana sama reuꞌ esa so. De, leo mae emi lahenda Yahudi, do ta Yahudi fa, ata do ta ata fa, inaꞌ do touꞌ, lahenda fo nanahekeꞌ roo Yesus Kristus a, nana basan sama. 29 Kristus nana, Abraham tititi-nonosin fo Manetualain helu memaꞌ neme uluꞌ mai so. Huu no emi nanahekeꞌ moo Kristus, de emi boe dadi meuꞌ Abraham tititi-nonosi matetun. No ria na, emi boe bisa sipo ua-naleꞌ fo Manetualain helu memaꞌ neuꞌ Abraham.✡ Roma 4:13