1 Emi nana, Manetualain ana susuen. Huu ria na, emi muste masoda tuka Ria hihii-nanaun. 2 Ma emi muste masue-malaiao esa no esa, sama leoꞌ Kristus sue-lai emi. Nana huu Ana fee heni ao-ina Na, fo mate kati ita so. No ria na, Ana dadi neuꞌ tutunu-hohotu maboomeniꞌ, ela tao namahoꞌo neuꞌ Manetualain.✡ Kalua reme Masir 29:18; Sosoda Iꞌio-oꞌoaꞌ ara 40:6

3 Emi boe, Manetualain lahenda lalao-lalafun. De, bosoꞌ masoda nai makakeo-makakanuꞌ! Afi hata makakeo-makakanuꞌ boe, bosoꞌ! Bosoꞌ hohoke! Bosoꞌ tendetuu-dalesala! 4 Bosoꞌ dedea tadaluꞌ! Ma bosoꞌ dedea mafararaꞌu! Huu fo Ramatuaꞌ a lahendan, sona ta naraa dedea leo naꞌ fa. Malole lenaꞌ emi dedea noi malole a, ma hule makasi neuꞌ Ramatuaꞌ a. 5 Mafarereneꞌ matalolole! Huu fo Manetualain ta sipoꞌ lahenda fo nasoda makakeo-makakanuꞌ, ma lahenda mana hohoke! Sira ta bisa dadi reuꞌ Kristus lahendan, ma Manetualain ta dadi neuꞌ sira Manen fa. Manetualain boe, ta sipoꞌ lahenda mana tendetuu-dalesalaꞌ a, nana huu sira seti heni Ni, ma soꞌu radedema hata fekeꞌ ara.

6 Bosoꞌ fee lahenda tipu-dai ralaꞌ emi reniꞌ dedea fufudiꞌ fo riꞌ rae, “Ta parluu masoda makamoiꞌ!” Manetualain tantu namanasa neuꞌ lahenda fo ta nasoda tuka Ria hihii-nanaun. 7 Huu ria na, de emi bosoꞌ mabua moo lahenda rupa leo naꞌ. 8 Fai a ulu na, emi sama leoꞌ lahenda fo nasoda nai maiuꞌ daleꞌ, nana huu emi ta malelaꞌ Manetualain fa. Tehuu besaꞌ ia, Ana naonda makaledo Na, de tao na emi dadi meuꞌ Ria ana nara. Huu ria na, de emi muste masoda nai Ria makaledon daleꞌ. 9 Lahenda fo nasoda naroo nai makaledoꞌ a daleꞌ, ana tao hata malole, nasoda roo-tetuꞌ, ma dedea no matetuꞌ. 10 Saka enoꞌ fo tao ma Manetualain dale Na namahoꞌo, huu fo Ria nana ita Ramatua na. 11 Bosoꞌ mabua moo lahenda fo nasoda nai maiuꞌ daleꞌ. Huu fo sira nonoi-tataon ta ranuu sosoa-raraaꞌ hata esa boeꞌ. De emi muste masaꞌai si, ma matudu sira sala nara. 12 Hata fo ara taon no nafufuniꞌ, nakekeo nan seliꞌ losaꞌ ita nau dedea ni boe maeꞌ. 13 Au fee natutuduꞌ leo iaꞌ: maneniko lahenda fee makaledoꞌ neuꞌ hata-heto fo rai maiuꞌ daleꞌ, tantu lahenda rita hata sira no makaledoꞌ. 14 Leoꞌ na boe, maneniko ita fee makaledoꞌ neuꞌ hata tadaluꞌ fo lahenda taon, ana bisa bubuluꞌ nae, hata fo riꞌ ana tao ni a, tadaluꞌ. Sosodaꞌ esa nae,

15 Huu ria na, mete matalolole emi masoda mara, ela bosoꞌ emi sama leoꞌ lahenda koa-pakanaaꞌ. Malole lenaꞌ pake duduꞌa-aafi malole. 16 Besaꞌ ia, lahenda dodouꞌ tao hata tadaluꞌ raroo. De, maneniko hapu ledo-fai tao hata malole, sona tao leo. Bosoꞌ mahani bali!✡ Kolose 4:5 17 Afi matalolole fo malelaꞌ ita Ramatua na hihii-nanaun, ela emi bosoꞌ pakanaaꞌ.

18 Bosoꞌ mafuꞌ, huu fo nininuꞌ sira siꞌ ator emi, de emi tao hata ta malole ra fa. Tehuu buka dale mara, fo ela Manetualain Dula-dale Malalao-malalafu Na riꞌ ator emi. 19 No ria na, neuꞌ ko emi esa dedea mo esa pake dedeaꞌ neme Manetualain Susura Makamoi na, neme sosoda io-oa neuꞌ Ana, ma neme sosodaꞌ fo emi hapu nemeꞌ Ria Dula-dale Malalao-malalafu Na mai. Ma kalu soda, sona bosoꞌ noi nai bafadoo pedaꞌ a. Tehuu io-oa neuꞌ Manetualain sona no matetuꞌ. 20 Yesus Kristus dadi neuꞌ ita Ramatuan, ma Amaꞌ Manetualain tao hata dodouꞌ fee ita so. Huu ria na, de ita hule makasi taroo neuꞌ Ana.✡ Kolose 3:16-17

21 Emi basa muste mamania-mamanene esa no esa. No ria na, emi matudu hada-horomataꞌ neuꞌ Yesus Kristus.

22 Saoinaꞌ ara! Emi muste mamania-mamanene neuꞌ saotou mara, sama leoꞌ mamania-mamanene neuꞌ emi Ramatuam Yesus Kristus. 23 Huu fo saotouꞌ a sama leoꞌ saoinaꞌ a malaka na. Ma Kristus boe dadi malaka neuꞌ Ria lahenda nara. Huu fo Ria riꞌ soi enoꞌ, de ara hapu sodaꞌ a.✡ Kolose 3:18; 1 Petrus 3:1 24 Huu ria na, de Kristus lahenda nara muste ramania-ramanene neuꞌ Ana. Leoꞌ na boe, saoinaꞌ ara muste ramania-ramanene neuꞌ saotou nara nai basa hata a lalaꞌen.

25 Leoꞌ na boe, saotouꞌ ara! Emi muste sue saoina mara, sama leoꞌ Kristus sue lahenda nara, losaꞌ Ana fee heni ao-ina Na, fo mate kati si.✡ Kolose 3:19; 1 Petrus 3:7 26 Ana tao leo naꞌ, ela ara dadi lalao-lalafuꞌ nai Manetualain matan, nana huu ara tuka Ria Dedea-nafadan, ma ara sarani so. 27 Yesus Kristus lahenda nara boe, sama leoꞌ manakabi inaꞌ a kakao-papake natalolole na aon, nana huu manakabi touꞌ a sakaꞌ mai nala ni. Leoꞌ na boe, Kristus sakaꞌ mai nala lahenda nara. Huu ria na, de sira muste rasoda malole ma lalao-lalafuꞌ, losaꞌ ta hapu salaꞌ baiꞌ boeꞌ.

28 Leoꞌ na boe, saotouꞌ ara! Emi muste sue-lai saoina mara, sama leoꞌ sue-lai ao-ina heheli mara. Maneniko saotouꞌ a sue-lai saoina na, ria sosoa na nae, ana sue-lai ao-ina heheli na. 29 Ta hapu lahenda eteꞌao na no ao-ina heheli na. Tehuu ana urus ma naboi natalololen, sama leoꞌ Kristus urus natalolole Ria lahenda nara, 30 huu fo ita ia nana, sama leoꞌ Ria ao-ina Na. 31 Nai Manetualain Susura Makamoi Na, manaduiꞌ nae, “Huu ria na, de touꞌ a muste foa ela ina-aman fo neu nasoda daleꞌ esa no saoina na, nana huu sira dua dadi esaꞌ so.”✡ Tutui Masososaꞌ 2:24 32 Ramatuaꞌ a Dedea-nafada sosoa-raraaꞌ bauinan ria, natudu memaꞌ neme fai a ulun, laꞌeneuꞌ saotouꞌ-saoinaꞌ a nasue-nalai ao nara. Tehuu besaꞌ ia ita bubuluꞌ tae, Dedea-nafadaꞌ sira ratudu laꞌeneuꞌ Kristus susue-lalain neuꞌ Ria lahenda nara. 33 De, saotouꞌ a muste sue-lai saoinaꞌ a sama leoꞌ ria sue ao-ina heheli na. Ma saoinaꞌ a muste hadaꞌ neuꞌ saotou na.